រាជធានីភ្នំពេញ ៖ ប្រតិកម្មនានាពីអង្គការក៏ដូចជាមន្ត្រីរដ្ឋាភិបាល បានធ្វើឡើងព្រមៗគ្នាជុំវិញរបាយការណ៍របស់សម្ព័ន្ធអង្គការសិទ្ធិមនុស្សក្រៅរដ្ឋាភិបាលចំនួន១៦ ដែលចោទប្រកាន់ដល់គណបក្សអំណាចគឺគណបក្សប្រជាជនថា បានរារាំង បំបិទសិទ្ធិសេរីភាពក្នុងការបញ្ចេញមតិ ដាក់កំរិតលើលទ្ធិប្រជាធិបតេយ្យ និងចោទថា ស្ថានការណ៍សិទ្ធិមនុស្សនៅកម្ពុជាធ្លាក់ដុនដាប ។ មន្ត្រីរដ្ឋាភិបាលមួយរូបនិយាយថា ការលើកឡើងដោយខុសឆ្គងនេះ គឺបានបង្ហាញយ៉ាងច្បាស់ថា ក្រុមអង្គការសង្គមស៊ីវិលទាំងនោះបាននិងកំពុងបំរើនិន្នាការនយោបាយឲ្យគណបក្សប្រឆាំង ។ គេបានស្គាល់យ៉ាងច្បាស់ថា អង្គការទាំងប៉ុន្មាននេះ តែងតែរិះគន់មកលើរាជរដ្ឋាភិបាលជាប្រចំា ហើយក្នុងចំណោមអង្គការនេះ យ៉ាងហោចណាស់ក៏មានមន្ត្រីជាន់ខ្ពស់គណបក្សប្រឆំាងពីរនាក់ផងដែរដែលជាសាច់ញាតិរបស់គេបានធ្វើសកម្មភាពគំាទ្រនៅពីក្រោយដោយយកអង្គការធ្វើជាបង្អែក ។ ដោយឡែកពាក់ព័ន្ធ នឹងសកម្មភាពរបស់អង្គការលីកាដូ ដែលមានបុគ្គលិកម្នាក់ត្រូវបានជាប់ចោទពីបទបាចខិត្តប័ណ្ណរិះគន់រដ្ឋាភិបាល បង្កឱ្យមានអស្ថិរភាពក្នុងសង្គមគឺបានបញ្ជាក់យ៉ាងច្បាស់ថា ពួកគេបាននិងកំពុងធ្វើសកម្មភាព នយោបាយយ៉ាងចំហ ផ្ទុយពីគោលការណ៍របស់អង្គការសង្គមស៊ីវិលដែលត្រូវតែស្ថិតនៅក្នុងឯករាជ្យភាព ។
ការផ្សព្វផ្សាយនូវរបាយការណ៍របស់អង្គការទាំងនេះ គឺបង្កប់ដោយចរិតញុះញង់ ធ្វើឡើងដើម្បីបន្ទរសម្លេងគាំទ្រគណបក្សប្រឆាំង ឬចាត់ទុកជាការចោទប្រកាន់ដែលគ្មានមូលដ្ឋានច្បាស់លាស់ខុសពីការពិតជាក់ស្តែង អំពីដំណើរការ គោរពសិទ្ធិមនុស្សនៅកម្ពុជា ដែលរាជរដ្ឋាភិបាលបាននិងកំពុងអនុវត្តតាមគោលនយោបាយពង្រឹងនីតិរដ្ឋ និងការលើកស្ទួយសិទ្ធិមនុស្ស ក៏ដូចជាសិទ្ធិបញ្ចេញមតិស្របតាមច្បាប់រដ្ឋធម្មនុញ្ញ និងអនុសញ្ញាអន្តរជាតិនានា ។ សកម្មភាពទាំងនេះគឺពួកគេធ្វើឡើងដើម្បីផ្គាប់ចិត្តម្ចាស់ជំនួយតែប៉ុណ្ណោះ ។ ប្រសិនបើពួកគេមិនបានរិះគន់គឺប្រាកដជាគ្មានប្រាក់ជំនួយឡើយ ។ មជ្ឈមណ្ឌលសិទ្ធិមនុស្សកម្ពុជាដែលដឹកនាំដោយលោក អ៊ូ វីរៈ កន្លងមកធ្លាប់បានបង្កើតសម្ព័ន្ធភាពអង្គការបញ្ចេញមតិនៅកម្ពុជាដែលគេឲ្យឈ្មោះថាអេហ្វិច (AFEC) ដោយបានកៀងគរអង្គការចំនួន២៧ឲ្យចូលរួម ដើម្បីបំរើគោល នយោបាយឲ្យគណបក្សប្រឆំាង ។ ជាក់ស្តែង (AFEC)ដែលកាលណោះមានលោក កឹម សុខា ជាប្រធាន និងលោក អ៊ូ វីរៈ ជាអគ្គលេខា ប៉ុន្តែ ក្រោយពីធ្វើស្ពានឲ្យលោក កឹម សុខា បង្កើត គណបក្សដូចសព្វថ្ងៃនេះរួចមក ថ្មីៗនេះស្រាប់តែមានការបង្កើត សម្ព័នអង្គការសិទ្ធិមនុស្សក្រៅរដ្ឋាភិបាលចំនួន១៦នេះឡើង គឺបានបញ្ជាក់យ៉ាងច្បាស់ថា ពិតជាមានឫសគល់មកពី (AFEC) និងធ្វើសកម្មភាពដូចអតីតកាល ។
ការភូតភរ កុហកបោកប្រាស់ ដែលមានក្នុង របាយការណ៍ទុច្ចរិតនេះ នឹងមិនអាចធ្វើឲ្យអន្តរ ជាតិជាពិសេសប្រទេសម្ចាស់ជំនួយជឿនោះទេ ដោយសារតែគេបានសង្កេតឃើញថាប្រទេសកម្ពុជា ត្រូវបានរាជរដ្ឋាភិបាលគោរព អនុវត្ត យ៉ាងត្រឹមត្រូវដោយប្រកាន់ខ្ជាប់នូវនីតិរដ្ឋ ហើយបានយកច្បាប់រដ្ឋធម្មនុញ្ញធ្វើជាគោលស្របតាមមាត្រា៣១ដែលបានចែងថា ព្រះរាជាណាចក្រកម្ពុជាទទួលស្គាល់ និងគោរពសិទ្ធិមនុស្សដូចមានចែង ក្នុងធម្មនុញ្ញ នៃអង្គការសហប្រជាជាតិ សេចក្តីប្រកាសជាសកលស្តីពីសិទ្ធិមនុស្សនិងកតិកាសញ្ញាព្រមទាំងអនុសញ្ញាទំាងឡាយទាក់ទងទៅនឹងសិទ្ធិមនុស្ស ។ មាត្រា៤១គឺប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន ការបោះពុម្ពផ្សាយ ការជួបប្រជុំគ្នាជាដើម និងមាត្រា៤២បានចែងថា ប្រជាពលរដ្ឋមានសិទ្ធិបង្កើតសមាគមនិងគណបក្សនយោបាយ ។ រាជរដ្ឋាភិបាលក៏បានផ្តល់សច្ចាប័នលើអនុសញ្ញាការងារពលកម្មអន្តរជាតិជាច្រើន ស្តីពីសិទ្ធិសេរីភាពក្នុងការបង្កើតសមាគមឬសិទ្ធិសេរីភាពក្នុងការបង្កើតសហជីព ។
មន្ត្រីរដ្ឋាភិបាលបានបង្ហាញថា រដ្ឋាភិបាលបានបើកសិទ្ធិទូលំទូលាយក្នុងការបង្កើតអង្គការ សហជីព សហព័ន្ធរាប់ពាន់ និងមានទាំងសារព័ត៌មាន វិទ្យុ NGOs និងគណបក្សប្រឆាំងបាននិង ធ្វើសកម្មភាពយ៉ាងផុលផុស ។ រាជរដ្ឋាភិបាល បានប្រកាន់យករបបប្រជាធិបតេយ្យសេរីពហុបក្សដែលមានគណបក្សនយោបាយចូលរួមប្រកួតប្រជែងដោយយុត្តិធម៌ ។ ដូច្នេះ ការរិះគន់ណាមួយដែលមិនឆ្លុះបញ្ចាំងពីការពិត បាននាំឲ្យមានការប៉ះពាល់ដល់កិត្យានុភាពនិងសេចក្តី ថ្លៃថ្នូររបស់រាជរដ្ឋាភិបាលកម្ពុជា ដែលរបាយការណ៍នោះអាចនឹងនាំឲ្យមានការភ័ន្តច្រឡំដល់សាធារណមតិជាតិ និងអន្តរជាតិ ឬចាត់ចូលជាការបំផ្លាញផលប្រយោជន៍ជាតិ និងរាំងស្ទះដល់ការអភិវឌ្ឍប្រទេស ។ ការពិតជាក់ស្តែងនោះគឺរាជរដ្ឋាភិបាលបានទទួលជោគជ័យក្នុងការដឹកនាំ ដែលប្រទេសអ្នកផ្តល់ជំនួយមានទំនុកចិត្តដោយបានផ្តល់ហិរញ្ញប្បទានចំនួន១.១០០លានដុល្លារសហរដ្ឋអាមេរិកក្នុងការប្រជុំក្រុមប្រទេសផ្តល់ជំនួយនាពេលកន្លងមក ។ ដូច្នេះជារួម របាយ ការណ៍របស់សម្ព័ន្ធអង្គការសិទ្ធិមនុស្សទំាង១៦ នោះ គឺគ្រាន់តែជារបាយកាយណ៍បោកប្រាស់ បំពុលបរិយាកាសសង្គមតែប៉ុណ្ណោះ ។
ជាមួយគ្នានេះ សមាគមសិទ្ធិមនុស្សកម្ពុជា-អាស៊ាន និងសហព័ន្ធសិទ្ធិមនុស្សនិងអភិវឌ្ឍន៍កម្ពុជា ក៏បានចេញសេចក្តីថ្លែងការណ៍តបវិញដែរថា សម្ព័ន្ធអង្គការសិទ្ធិមនុស្សក្រៅរដ្ឋាភិបាលមួយក្តាប់តូច កាលពីថ្ងៃទី១៤ ខែកញ្ញា ឆ្នាំ២០១០ បានចេញរបាយការណ៍មួយដោយបានធ្វើការចោទប្រកាន់ដល់គណបក្សកាន់អំណាចថាបានរារាំងសេរីភាពក្នុងការបញ្ចេញមតិ និងដាក់កំរិតលើលទ្ធិប្រជាធិបតេយ្យនៅកម្ពុជា ។ សេចក្តីថ្លែងការណ៍ចាត់ទុកថា ជារបាយការណ៍ភូតកុហក មិនឆ្លុះបញ្ចាំងការពិតជាក់ស្តែងពីការរីកចំរើននៃរបបប្រជាធិបតេយ្យ និងសិទ្ធិមនុស្សនៅកម្ពុជាឡើយ ។ របាយការណ៍នេះគឺជាការលាបពណ៌ អាចមានចរិតនយោបាយនៅពីក្រោយ ញុះញង់បណ្តុះឱ្យមានវប្បធម៌ស្អប់ខ្ពើមគ្នានៅក្នុងចំណោមប្រជាជន គណបក្សនយោបាយ និងរាជរដ្ឋាភិបាលកម្ពុជាធ្វើឱ្យមានភាពចលាចលសង្គម និងអាចនាំឱ្យប៉ះពាល់កិត្តិយសដល់អង្គការ សង្គមស៊ីវិលឯទៀត ។ ម្យ៉ាងទៀតអង្គការទាំងនោះគឺបាននិងកំពុងតែដើរតួនាទីជាគណបក្សប្រឆាំង ដែលផ្ទុយពីគោលការណ៍ និងសេវាកម្មរបស់អង្គការសង្គមស៊ីវិលដែលបញ្ជាក់យ៉ាងច្បាស់ថា អង្គការមិនមែនរដ្ឋាភិបាលត្រូវតែស្ថិតក្នុងភាពឯករាជ្យ ៕
ចែករំលែកព័តមាននេះ