រាជធានីភ្នំពេញ ៖ ករណីប្រតិបត្តការបង្ក្រាបក្រុមឧក្រិដ្ឋជនជួញដូរគ្រឿងញៀនមួយយ៉ាងក្តៅគគុក ស្ថិតនៅសង្កាត់ព្រែកលៀប ខណ្ឌជ្រោយចង្វា ដែលមានការផ្ទុះដាក់គ្នារវាងសមត្ថកិច្ច និងឈ្មួញគ្រឿងញៀន ជាលទ្ធផលជនឧក្រិដ្ឋ២នាក់ ត្រូវបានឃាត់ខ្លួន ថ្នាំញៀនជិត៣០គីឡូក្រាមត្រូវរឹបអូស…
រាជធានីភ្នំពេញ ៖ ករណីប្រតិបត្តការបង្ក្រាបក្រុមឧក្រិដ្ឋជនជួញដូរគ្រឿងញៀនមួយយ៉ាងក្តៅគគុក ស្ថិតនៅសង្កាត់ព្រែកលៀប ខណ្ឌជ្រោយចង្វា ដែលមានការផ្ទុះដាក់គ្នារវាងសមត្ថកិច្ច និងឈ្មួញគ្រឿងញៀន ជាលទ្ធផលជនឧក្រិដ្ឋ២នាក់ ត្រូវបានឃាត់ខ្លួន ថ្នាំញៀនជិត៣០គីឡូក្រាមត្រូវរឹបអូស ។
ជនឧក្រិដ្ឋជនដែលចាប់ខ្លួន២នាក់ ម្នាក់ឈ្មោះ គីម តាត់ ភេទប្រុស អាយុ៣៨ឆ្នាំ ជនជាតិខ្មែរ និងម្នាក់ឈ្មោះ ប្រាក់ សឺត ភេទប្រុស អាយុ៥៤ឆ្នាំ ជាជនជាតិថៃ ។
ប្រតិបត្តការនោះប្រព្រឹត្តឡើង កាលពីវេលារសៀលថ្ងៃទី១៨ ខែសីហា ឆ្នាំ២០២១ ដោយអនុវត្តតាមបញ្ជាឯកឧត្តម នាយឧត្ដមសេនិយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម នាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ពីឯកឧត្តម ឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន ។
បើតាមលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀនថ្លែងឲ្យដឹងថា ការចុះបង្ក្រាបករណីជួញដូរគ្រឿងខាងលើនេះ គឺកម្លាំងសមត្ថកិច្ចការិយាល័យទី៧ នៃមន្ទីរប្រឆាំងបទល្មើសគ្រឿងញៀន (ក៧) ដឹកនាំដោយលោកឧត្តមសេនីយ៍ទោ សឿង ណុល នាយករងមន្ទីរ និងមានការចូលរួមពីកម្លាំងជំនាញរបស់ស្នងការដ្ឋាននគរបាលរាជធានីភ្នំពេញ និងមានការសម្របសម្រួលពីលោក វង្ស សាវ៉ាត ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញដែលបានបើកការស៊ើបអង្កេត និងស្រាវជ្រាវរហូតឈានដល់ការបង្ក្រាបជាបន្តបន្ទាប់មាន២គោលដៅផ្សេងគ្នា ។
លោក ឡឹក វណ្ណៈ បន្តថា គោលដៅទី១.ស្ថិតនៅបណ្តោយផ្លូវជាតិលេខ៦A សង្កាត់ព្រែកលៀបខ័ណ្ឌ ជ្រោយចង្វារ រាជធានីភ្នំពេញ ខណៈពេលចុះបង្ក្រាបត្រូវក្រុមឧក្រិដ្ឋជនផ្ទុះអាវុធបាញ់មកលើកម្លាំងសមត្ថកិច្ច ធ្វើឲ្យសមត្ថកិច្ចបង្ខំចិត្តបាញ់តបតវិញ ដើម្បីការពារខ្លួន ដែលករណីផ្ទុះអាវុធបាញ់តដៃគ្នានោះសរុបចំនួន៧គ្រាប់បានធ្វើឲ្យឧក្រិដ្ឋជនឈ្មួញគ្រឿងញៀនទម្លាក់អាវុធ និងប្រគល់ខ្លួនឲ្យសមត្ថកិច្ច ។
ក្រោយពីចាប់ខ្លួនជនសង្ស័យទាំងពីរ សមត្ថកិច្ចបាននាំទៅឆែកឆេរលំនៅដ្ឋានមួយកន្លែងដែលជា គោលដៅទី២.ស្ថិតនៅផ្ទះលេខ៣២ ផ្លូវC ស្ថិតក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
ក្នុងនោះសមត្ថកិច្ចចាប់យកវត្ថុតាងសារធាតុញៀនប្រភេទម៉តំហ្វេតាមីន (ICE) ចំនួន២៤កញ្ចប់ធំ ស្មើទម្ងន់ប្រមាណជាង២៤ គីឡូក្រាម និងសាធាតុញៀនប្រភេទអ៊ិចស្តាស៊ី (MDMA)១៤ កញ្ចប់ ស្មើទម្ងន់ប្រមាណ៤ គីឡូក្រាម (សរុបជិត៣០គីឡូក្រាម) ព្រមទាំងសម្ភារចាប់យកមានរថយន្ត៤គ្រឿង.ទូរស័ព្ទ៦គ្រឿង. អាវុធខ្លី ម៉ាករ៉ូឡូ១ដើម សំបកគ្រាប់៣គ្រាប់ និងគ្រាប់មិនទាន់ផ្ទុះចំនួន៣គ្រាប់ ។
ក្រោយពេលឃាត់ខ្លួនជនឧក្រិដ្ឋទាំង២នាក់ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ