ខេត្តឧត្តរមានជ័យ៖ ប្រជាពលរដ្ឋខ្មែរម្នាក់ ត្រូវបានក្រុមអាជ្ញាធរថៃ ឃាត់ខ្លួន កាលពីថ្ងៃទី២១ ខែសីហា ឆ្នាំ២០១៩ កន្លងទៅនេះ ជាប់ពន្ធនាគារ នៅស្រុកខាន់តាឡាក់…
ខេត្តឧត្តរមានជ័យ៖ ប្រជាពលរដ្ឋខ្មែរម្នាក់ ត្រូវបានក្រុមអាជ្ញាធរថៃ ឃាត់ខ្លួន កាលពីថ្ងៃទី២១ ខែសីហា ឆ្នាំ២០១៩ កន្លងទៅនេះ ជាប់ពន្ធនាគារ នៅស្រុកខាន់តាឡាក់ ខេត្តស៊ីសាកេត ប្រទេសថៃ។ បុរសរូបនោះ ត្រូវបានដោះលែងឱ្យមានសេរីភាពវិញ នៅថ្ងៃទី១៨ ខែសីហា ឆ្នាំ២០២១ នាំខ្លួនយកមកប្រគល់ឱ្យក្រុមអាជ្ញាធរកម្ពុជា តាមច្រកទ្វារអន្តរជាតិជាំ ស្ថិតក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ប្រជាពលរដ្ឋខ្មែរ ដែលក្រុមអាជ្ញាធរថៃ ដោះលែងនោះ ឈ្មោះ ឈុន សុភា ភេទប្រុស អាយុ ៣៣ឆ្នាំ រស់នៅភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។ ក្រុមអាជ្ញាធរថៃដាក់ការចោទប្រកាន់ពីបទឆ្លងដែន កាប់ឈើក្រញូង ខុសច្បាប់ក្នុងទឹកដីថៃ ដោយចូលតាមច្រកទឹកជប់។
មន្ត្រី ដែលបម្រើការងារ នៅច្រកទ្វារអន្តរជាតិជាំ បានឱ្យដឹង ក្រោយពីបានទទួលពលរដ្ឋខ្មែរ ក្រុមការងារ នៅច្រកទ្វារអន្តរជាតិ បានធ្វើការសាកសួរ និងធ្វើកិច្ចសន្យាបញ្ឈប់ឆ្លងដែនខុសច្បាប់បន្តទៀត និងបានប្រគល់គ្រូពេទ្យ ធ្វើតេស្តយកសំណាក ពិនិត្យជាលទ្ធផលអវិជ្ជមាន ហើយបញ្ជូនទៅធ្វើចត្តាឡីស័ក នៅសាលាបឋមសិក្សាទួលថ្មីផងដែរ៕ ឱម សារឿន
ចែករំលែកព័តមាននេះ