រាជធានីភ្នំពេញ ៖ លោក ទួត សាលួន ដែលមានស្រុកកំណើតនៅខេត្តបាត់ដំបងអះអាងថា គាត់បានចំណាយពេលវេលាច្រើនឆ្នាំធ្វើជាងច្នៃគ្រឿងអលង្ការឲ្យគេ ។ មិនថាមាស ឬពេជ្រ លោកអាចច្នៃផលិតតាមការបញ្ជាទិញ ប៉ុន្តែមុខរបរជាងមាសនេះដែលលោកទទួលធ្វើឲ្យថៅកែនេះ មិនកាក់ កបសោះ ទើបលោកសម្រេចចិត្តដឹកប្រពន្ធដើរលក់ទំនិញហូបចុក និងសម្ភារប្រើប្រាស់ខ្លះ តាមរ៉ឺម៉កម៉ូតូវិញ ។ ការងារដែលលោកកំពុងរកស៊ីដោយខ្លួនឯងនេះ ស្តាប់ទៅមិនហ៊ីហារដូចការងារចាស់ តែលោកទទួលបានចំណូលសមរម្យជាងរបរជាងទងនោះ ។

«ជាងមាសពុំមែនសុទ្ធតែអាចរកប្រាក់កម្រៃបាននោះទេ ព្រោះជាងមាសពុំមែនជាថៅកែ ឬក៏អាជីវករលក់មាសឡើយ ។ ជាងមាសមួយចំនួនធ្វើការឲ្យគេទទួលកម្រៃតាមកម្លំាងពលកម្មឬមានប្រាក់ខែ ។ មានន័យថា ជាងមាសគ្រាន់តែជាអ្នកស៊ីឈ្នួលកែច្នៃម៉ូដគ្រឿងអលង្ការឲ្យគេដើម្បីបានប្រាក់ឈ្នួលប៉ុណ្ណោះ» លោក ទូត សាលូន បាននិយាយឲ្យដឹង ។ 

បុរសវ័យ ៤៥ ឆ្នាំ ដែលមានកូនប្រុសស្រីចំនួន ៣ នាក់បាននាំគ្រួសារចេញពីខេត្តបាត់ដំបងមករស់ក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ ជារៀងរាល់ថ្ងៃលោក និងភរិយា ធ្វើដំណើរតាមរ៉ឺម៉កម៉ូតូដែលមានផ្ទុកទំនិញចម្រុះមានទំាងពីមួកក្រណាត់ មួកសុវត្ថិភាព កាបូបយួរ កបូបស្ពាយ កាបូបក្រវាត់ចង្កេះ កាបូបដៃ ម៉ាស់ ស្រោមដៃ ស្រោមជើង ខ្សែក្រវាត់ និងភេជ្ជៈ កំប៉ុង ដបច្រើនមុខ មានទំាងពីកាហ្វេ ទឹកសុទ្ធ ដើរលក់រកប្រាក់ចិញ្ចឹមកូនៗយ៉ាងសប្បាយរីករាយ ។ 

នៅរៀងរាល់ថ្ងៃលោកត្រូវបានដឹកទំនិញចេញពីផ្ទះតាមម៉ូតូសណ្ដោងរ៉ឺម៉កយកទៅលក់នៅ តាមមហាវិថីឈ្នះឈ្នះ ភូមិត្រពាំងទា សង្កាត់ត្រពាំងក្រសាំង គឺស្ថិតនៅមិនឆ្ងាយពីផ្ទះរបស់គាត់ប៉ុន្មានឡើយលុះវេលាល្ងាចត្រឡប់ទៅផ្ទះវិញ ។ លោកសាលួន ឲ្យដឹងថាកាលមិនទាន់មានកូវីដ ១៩ លោករកស៊ីស្រួល ទទួលចំណូលទំាងដើមទាំងចំណេញពី ៥០ ម៉ឺនរៀលឡើងទៅ ។ ប៉ុន្តែចូលមកដល់ការផ្ទុះឡើងជំងឺ COVID-19 ការលក់ដូររបស់បានថយចុះ ជាលំដាប់ ដោយក្នុង ១ ថ្ងៃបច្ចុប្បន្ននេះលក់បានត្រឹមតែជាង ១០ ម៉ឺនរៀល ទៅ ២០ ម៉ឺនរៀលតែប៉ុណ្ណោះ ។

«ការរកស៊ីនេះជារបរផ្ទាល់ខ្លួន យើងមានសេរីភាព ។ កាលធ្វើជាងទងយើងធ្វើការឲ្យគេស្ថិតនៅក្រោមការគ្រប់គ្រងរបស់គេ ទោះមានឈ្មោះជាជាងមាសក្តីតែគ្មានសល់ប្រាក់ទេ «លោក ទួត សាលួន រៀបរាប់ឲ្យដឹង ។ លោក សាលូន បានចាកចេញពីខេត្តបាត់ដំបងមករស់នៅភ្នំពេញក្នុងឆ្នាំ ១៩៩៤ មកដល់ភ្នំពេញលោករៀន និងធ្វើជាងមាសតែម្តង តាំងពីវ័យជំទង់មកម្លេះ ។ លោកធ្វើការឲ្យគេរហូតដល់ពេលមានភរិយានៅអាយុ ២៥ ឆ្នាំ ហើយក្រោយមកដោយសារតែជាងមាសរកប្រាក់ផ្គត់ផ្គង់គ្រួសារពុំសូវបាន ផ្សំភ្នែកចុះខ្សោយពិបាកសំឡឹងផងនោះ ទើបគាត់សម្រេចចិត្តឈប់ធ្វើជាងមាស ចាប់យកមុខរបរថ្មីដល់បច្ចុប្បន្ននេះ ៕