ការព្រមព្រៀងគ្នារបស់ព្រះសង្ឃរមែងនាំមកនូវសេចក្តីសុខ
ព្រះមានព្រះភាគត្រាស់ថា សាមគ្គី សាមគ្គានំ តបោ សុខោ ប្រែថា ការព្រមព្រៀងគ្នារបស់អ្នកព្រមព្រៀងគ្នាទាំងឡាយជាតបធម៌នាំមកនូវសេចក្តីសុខ ។ មានន័យថា សង្គមណាក៏ដោយ…
ព្រះមានព្រះភាគត្រាស់ថា សាមគ្គី សាមគ្គានំ តបោ សុខោ ប្រែថា ការព្រមព្រៀងគ្នារបស់អ្នកព្រមព្រៀងគ្នាទាំងឡាយជាតបធម៌នាំមកនូវសេចក្តីសុខ ។ មានន័យថា សង្គមណាក៏ដោយ បើមានការព្រមព្រៀងគ្នាដោយកាយវាចាចិត្តហើយ សង្គមនោះរមែងបានសេចក្តីសុខ ។ មូលហេតុដែលនាំឱ្យកើតសាមគ្គី សូមលើកយកតែធម៌មួយជាចម្បង គឺព្រះសង្ឃគោរពព្រះវិន័យ បើគ្រហស្ថគោរពច្បាប់ជាតិទាំងច្បាប់អន្តរជាតិ នោះសាមគ្គីរមែងកើតមានប្រាកដ ។
ព្រះពុទ្ធបានបញ្ញត្តិព្រះវិន័យទុកជាក្បួនខ្នាតសម្រាប់ព្រះសង្ឃគ្រប់អង្គប្រតិបត្តិតាមដើម្បីសេចក្តីបរិសុទ្ធក្នុងសង្គមសង្ឃ បើព្រះសង្ឃបរិសុទ្ធគ្រប់អង្គហើយ សាមគ្គីរមែងកើតមាន កាលណាបើមានសាមគ្គីហើយ សេចក្តីសុខក៏រមែងកើតមាន ។ ផ្ទុយទៅវិញ បើព្រះសង្ឃបរិសុទ្ធមិនសាមគ្គីជាមួយព្រះសង្ឃដែលមិនបរិសុទ្ធជាអ្នកមិនគោរពព្រះវិន័យ នោះគ្មានឡើយសេចក្តីសុខ ។
ហេតុនេះបើព្រះសង្ឃគ្រប់វត្តអារាមក្នុងប្រទេសកម្ពុជាគោរពព្រះវិន័យ នោះសាមគ្គីរបស់ព្រះសង្ឃរមែងកើតមានទូទាំងប្រទេសដែរ ព្រោះព្រះវិន័យទុកជាបន្ទាត់សម្រាប់ព្រះសង្ឃគ្រប់ព្រះអង្គគោរពទាំងអស់គ្នា ។ បើព្រះសង្ឃអង្គណាមានកំហុសត្រូវអនុវត្តតាមព្រះវិន័យដាច់ខាត ។ ព្រះសង្ឃបរិសុទ្ធពុំអាចធ្វើសង្ឃកម្មជាមួយព្រះសង្ឃអង្គណាដែលមានកំហុសនោះឡើយ ឬមានកំហុសហើយពុំបានសំអាតឱ្យបរិសុទ្ធ ។
កិច្ចការរបស់សង្ឃមានច្រើនដែលព្រះសង្ឃក្នុងព្រះពុទ្ធសាសនាត្រូវព្រមព្រៀងគ្នាធ្វើដូចជា ធ្វើឧបោសថសម្ដែងបាតិមោក្ខជាដើម ឬពេលមានកិច្ចប្រជុំត្រូវព្រមព្រៀងគ្នាប្រជុំ និងព្រមព្រៀងគ្នាក្រោកចាកការប្រជុំជាដើម បើព្រះសង្ឃទាំងអស់អង្គព្រមព្រៀងគ្នាល្អហើយ នោះសាមគ្គីរមែងកើតឡើង ហើយសេចក្តីសុខក៏កើតឡើងព្រមគ្នា ៕ សាន សារិន
ចែករំលែកព័តមាននេះ