ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា ក្រុមគ្រូពេទ្យផ្នែកចត្តាឡីស័កបានធ្វើតេស្តទៅលើសាកស.ពបុរសម្នាក់ដែលដើរសុខៗ ក៏ស្រាប់តែដួលស្លា.ប់បាត់បង់ជីវិតតែម្តង ជាលទ្ធផលនៃការធ្វើតស្ត គឺរកឃើញថា មានវិជ្ជមានកូវីដ១៩ ។ ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៥និង៣០នាទីទៀបភ្លឺ ថ្ងៃទី១៦ ខែសីហា ឆ្នាំ២០២១នេះ ស្ថិតក្នុងភូមិទួលប្រាសាទ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
យោងតាមរបាយការណ៍អាវុធហត្ថស្រុកអន្លង់វែងឱ្យដឹងថា សាកស.ពជនរងគ្រោះខាងលើមានឈ្មោះឆាន់ ឆូន ភេទប្រុស អាយុ៣៨ឆ្នាំ រស់នៅភូមិទួលប្រាសាទ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ។ ហើយជនរងគ្រោះបានដើរដួលស្លា.ប់ក្បែររបងផ្ទះ ដោយស្លៀកខោលីអូពណ៌ប្រផេះ អត់ពាក់អាវ នៅខាងក្រោយផ្ទះរបស់ឈ្មោះ ហឿន ថាន ភេទស្រី អាយុ៤៣ឆ្នាំ រស់នៅនៅភូមិ-ឃុំកើតហេតុខាងលើ។
បើតាមលោក នៅ សំអន ប្រធានប្រតិបត្តិស្រុកអន្លង់វែង និងស្រុកត្រពាំងប្រាសាទ បានឱ្យដឹងថា សាកស.ពជនរងគ្រោះដែលបានដើរដួលស្លា.ប់នោះ ក្រុមការងារគ្រូពេទ្យផ្នែកចត្តាឡីស័កបានចុះទៅធ្វើការពិនិត្យទៅលើស.ព ក៏រកឃើញថា មានវិជ្ជមានកូវីដ១៩ និងបន្តធ្វើការពិនិត្យទៅលើប្រពន្ធរបស់ជនរងគ្រោះទៀត ឈ្មោះគាំ សទ្ធី អាយុ៥១ឆ្នាំ ក៏រកឃើញមានវិជ្ជមានកូវិដ១៩ ផងដែរ។
ប្រភពដដែលបន្តថា ចំណែកមនុស្សប្រុស-ស្រីចំនួន៩នាក់ផ្សេងទៀត ដែលបានពាក់ព័ន្ធជាមួយសាកស.ពរងគ្រោះដែលមានវិជ្ជមានកូវីដ១៩ខាងលើនេះ ក៏ត្រូវបានគ្រូពេទ្យឱ្យធ្វើចត្តាឡីស័ករយៈពេល១៤ថ្ងៃ ដើម្បីយកសំណាកពិនិត្យលើកទី១ និងលើកទី២សិន ដោយឡែកស.ពជនរងគ្រោះ គ្រូពេទ្យបានយកទៅខេត្តឧត្តរមានជ័យ ដើម្បីធ្វើការបូជា ដោយអនុវត្តន៍ទៅតាមក្រសួងសុខាភិបាលផងដែរ៕
ចែករំលែកព័តមាននេះ