មៀនប៉ៃលិនគ្រោងចាក់ចោល៥ម៉ឺនតោន ព្រោះនាំចេញមិនបាននៅឆ្នាំនេះ គិតជាលុយជិត៥០លានដុល្លារ
- ភ្នំពេញ
រាជធានីភ្នំពេញ ៖ វិបត្តិទីផ្សារមៀនប៉ៃលិនរបស់កសិករដាំមៀននៅតាមបណ្ដាខេត្តជាប់ព្រំដែនកម្ពុជា ថៃ កាន់តែធ្ងន់ធ្ងរ ព្រោះដល់រដូវប្រមូលផលហើយ តែកសិករមិនអាចនាំចេញផ្លែមៀនទៅកាន់ដៃគូនៅក្នុងប្រទេសថៃបាន ដូច្នេះបើតាមការប៉ាន់ស្មានផ្លែមៀនប៉ៃលិនឆ្នាំនេះប្រមាណ៥ម៉ឺនតោននឹងត្រូវចាក់ចោល ។
បើតាមលោក សួន ជុំ សមាជិកក្រុមប្រឹក្សាភិបាលនៃសហគមន៍ មៀន ប៉ៃលិន បានឱ្យដឹងថា ចាប់ពីខែសីហានេះ ផ្លែមៀនប៉ៃលិនចាប់ផ្ដើមប្រមូលផលបណ្ដើរៗហើយ ប៉ុន្តែបែរកសិករមិនអាចនាំចេញទៅកាន់រោងចក្រ ដែលជាដៃគូរបស់ខ្លួននៅប្រទេសថៃបានឡើយ ។
រាល់ឆ្នាំដល់រដូវប្រមូលផល កសិករយើងបានប្រមូលផ្លែមៀន ដើម្បីនាំចេញទៅកាន់ដៃគូហើយមិនមានមៀនច្រើនទេ ត្រូវខូចខាតនោះ តែសម្រាប់ឆ្នាំនេះ មៀនបានដាក់ឡានរួចហើយដឹកដល់ព្រំដែនខាងភាគីថៃមិនអនុញ្ញាតឱ្យនាំចូលទឹកដីរបស់គេឡើយ ដោយមិនដឹងថា មកពីបញ្ហាអ្វី ។
លោកបន្តថា បើនិយាយអំពីបញ្ហាកូវីដ១៩ ក៏មិនមែនពីព្រោះទំនិញថៃចូលមកកម្ពុជារាល់ថ្ងៃ ហេតុអ្វីក៏ទំនិញរបស់កម្ពុជាដែលដឹកទៅកាន់រោងចក្រជាដៃគូសោះមិនបាន ។ បញ្ហានេះលោកថា ខាងអាជ្ញាធរកម្ពុជាបានអះអាងនឹងចាត់តំណាងទៅជជែកពិភាក្សាជាមួយអាជ្ញាធរថៃ ដើម្បីបើកច្រកឱ្យទំនិញរបស់កម្ពុជានាំចេញទៅកាន់រោងចក្ររបស់ចិនមួយនៅក្នុងទឹកដីថៃ ។
លោកថា ៖«តាមពិតទៅវិនិយោគិនចិនបានមកដាក់ទុនវិនិយោគរោងចក្រកែច្នៃផ្លែមៀននៅទឹកដីកម្ពុជារួចរាល់ហើយដោយចំនាយទុន៥លានដុល្លារអាមេរិក ប៉ុន្តែរោងចក្រនេះមិនអាចដំណើរការបានឡើយ ព្រោះបើផលិតផលបានហើយក៏មិនអាចនាំចេញទៅប្រទេសចិនបានដែរ ព្រោះតែរបាំងភូតគាមអនាម័យ ដូច្នេះចិនក៏នៅតែដំណើរការរោងចក្ររបស់ខ្លួនក្នុងប្រទេសថៃ ព្រោះប្រទេសថៃ អាចមានសិទ្ធិនាំចេញផ្លែមៀន និងមៀនកែច្នៃទៅប្រទេសថៃផ្ទាល់បាន » ។
លោកបានស្នើសុំ និងសំណូមពរដល់រាជរដ្ឋាភិបាលកម្ពុជា ក្នុងការពន្លឿនការចរចាភូតគាមអនាម័យចំពោះផ្លែមៀនប៉ៃលិននេះ ជាមួយភាគីចិនឱ្យបានឆាប់បំផុត ដើម្បីបើកច្រកឱ្យរោងចក្រចិនដ៏ធំមួយអាចដំណើរការកែច្នៃផ្លែមៀននាំចេញទៅកាន់ប្រទេសចិន ដោយផ្ទាល់ដោយមិនចាំបាច់ឆ្លងកាត់ប្រទេសទី៣ ទៀតឡើយ ។ នៅពេលមានរោងចក្រកសិករកម្ពុជានឹងមិនពិបាកក្នុងការដឹកទៅកាន់រោងចក្រចិននៅលើទឹកដីថៃ ដែលនាំបញ្ហាពិបាកដូចជាបច្ចុប្បន្ន ។
បើតាមផលិតករមៀនប៉ៃលិន រូបនេះបញ្ជាក់ថា គិតជា តម្លៃប៉ាន់ស្មានខូចខាតឆ្នាំនេះសម្រាប់កសិករទាំងអស់ប្រមាណ៣០លានដុល្លារអាមេរិក ទៅ៥០លានដុល្លារអាមេរិកគិតទៅតាមតម្លៃទីផ្សារមៀនពី៣០០០រៀល ទៅ៤០០០រៀល ក្នុងមួយគីឡូក្រាម ។
លោកបន្ថែមថា សម្រាប់ទីផ្សារមៀនក្នុងស្រុក គឺមានតិចបំផុតដែលផ្លែឈើនេះ មានតម្រូវការតែសម្រាប់ថ្ងៃសីលតែប៉ុណ្ណោះ ហើយក្នុងមួយសីលៗមានតម្រូវការផ្លែមៀនប៉ៃលិនតែជាង១០តោនប៉ុណ្ណោះ ដូច្នេះក្រៅពីនោះ គឺត្រូវនាំចេញ ដើម្បីកែច្នៃ តែបើសិនជាគេបិទព្រំដែនមិនអនុញ្ញាតឱ្យនាំចេញទៀតគ្មានអ្វីក្រៅពីចាក់ចោលឡើយ ។
ក្រសួងកសិកម្មរុក្ខាប្រមាញ់ និងនេសាទបានបញ្ជាក់ថា ពេលនេះមន្ត្រីជាន់ខ្ពស់ក៏កំពុងចរចាពីភូតគាមអនាម័យជាមួយភាគីចិនរួចហើយ ដើម្បីជំរុញការឱ្យការនាំចេញផ្លែឈើមួយនេះទៅកាន់ប្រទេសចិនបានឆាប់ ខណៈផ្លែឈើមួយចំនួនដូចជាផ្លែចេកអំបូងលឿង និងផ្លែស្វាយស្រស់បានទៅកាន់ទីផ្សារចិនរួចហើយ ៕
ចែករំលែកព័តមាននេះ