រាជធានីភ្នំពេញ ៖ ដោយសារតែឃើញផ្លែមៀនប៉ៃលិននៅស្រុកភ្នំព្រឹក កំពុងមានបញ្ហាទីផ្សារលក់មិនចេញព្រោះតែបញ្ហាកូវីដ១៩ អ្នកជំនួញក្នុងស្រុកម្នាក់បានប្រកាសជួយទិញផ្លែមៀនពីកសិករដើម្បីចែកចាយជូនដៃគូជំនួញក្នុងស្រុកជាច្រើនទៀតដែលមានតម្រូវការ ។ លោក ឌិន សុមេធារឹទ្ធ ប្រធានសមាគមសណ្ឋាគារកម្ពុជានិងជាអ្នកវិនិយោគមួយរូបនៅក្នុងប្រទេសផងដែរនោះ…
រាជធានីភ្នំពេញ ៖ ដោយសារតែឃើញផ្លែមៀនប៉ៃលិននៅស្រុកភ្នំព្រឹក កំពុងមានបញ្ហាទីផ្សារលក់មិនចេញព្រោះតែបញ្ហាកូវីដ១៩ អ្នកជំនួញក្នុងស្រុកម្នាក់បានប្រកាសជួយទិញផ្លែមៀនពីកសិករដើម្បីចែកចាយជូនដៃគូជំនួញក្នុងស្រុកជាច្រើនទៀតដែលមានតម្រូវការ ។
លោក ឌិន សុមេធារឹទ្ធ ប្រធានសមាគមសណ្ឋាគារកម្ពុជានិងជាអ្នកវិនិយោគមួយរូបនៅក្នុងប្រទេសផងដែរនោះ បានប្រកាសទិញមៀនពីកសិករចំនួន១០តោន ដើម្បីជាការលើកទឹកចិត្តដល់កសិករកម្ពុជាក្នុងការផលិតផ្លែឈើ ក្នុងខណៈពួកគាត់កំពុងជួបប្រទះនឹងបញ្ហា ។
លោកថា៖«ការប្រកាសទិញនេះ យើងមិនមែនទិញដើម្បីលក់បន្តយកចំណេញនោះទេ តែខ្ញុំទិញដើម្បីយកទៅឱ្យមិត្តភក្ដិម្នាក់១តោនៗ ដើម្បីចែកជូនដល់មិត្តភក្ដិបងប្អូនញាតិមិត្តរបស់ពួកគេ ។ មួយទៀតដោយខ្ញុំមានបុគ្គលិកជាច្រើននិងមិត្តភក្តិនៅក្នុងភូមិផ្កាត្រកួនបានស្នើសុំទិញម្នាក់១០០គីឡូ២០០គីឡូដើម្បីទុកចែកគ្នាបរិភោគក៏សម្រេចថាជួយទិញកសិករតែម្ដងទៅ » ។
លោកបន្តថា តាមពិតគម្រោងទិញតែ១០តោនទេ ប៉ុន្តែមកដល់ពេលនេះ មានអ្នកបញ្ជាទិញតាមលោកចេះតែកើនឡើង រហូតមកដល់ពេលនេះសរុបចំនួនទៅវាមានជាង២០តោនទៅហើយ ដូច្នេះហើយលោកក៏បានប្រាប់ទៅតំណាងកសិករនៅស្រុកភ្នំព្រឹកជួយប្រមូលទិញពីកសិករដើម្បីជួយកសិករក្នុងគ្រាមានវិបត្តិបែបនេះ ។
លោកបន្ថែមថា លោកក៏កំពុងតែទាក់ទងទៅនឹងគណៈកម្មការកូវីដដើម្បីទិញផ្លែឈើមកចែកចាយដល់ម្ចាស់សណ្ឋាគារដែលក្រសួងកំណត់យកធ្វើជាចត្តាឡីស័កហើយលក់ផ្លែឈើនេះជូនអ្នកកំពុងធ្វើចត្តាឡីស័កទាំងជនជាតិខ្មែរនិងបរទេស ហើយវាក៏ជាការប្រូម៉ូតផ្លែឈើខ្មែរយើងផងដែរ ។ក្រៅពីនោះក៏មានម្ចាស់ហាងលក់ផ្លែឈើជាច្រើនទៀត ដែលចង់ជួយផលិតផលខ្មែរ យកផ្លែមៀននេះមកលក់ក្នុងហាងគាត់ទៀត ដូច្នេះតម្រូវផ្លែឈើនេះ នឹងមានច្រើនជាងនេះទៅទៀត ។
លោកថា៖« ដើម្បីជួយដល់កសិករខ្ញុំបានទិញក្នុងតម្លៃមួយខ្ពស់ជាងទីផ្សារទៅទៀត ដូច្នេះកសិករនឹងទទួលបានចំណេញច្រើនពីការជួយរបស់យើងដើម្បីឱ្យពួកគាត់បន្តការងារបន្ថែមទៀត» ។
យោងតាមសេចក្តីរាយការណ៍ពីក្រសួងកសិកម្មរុក្ខាប្រមាញ់និងនេសាទឱ្យដឹងថា បច្ចុប្បន្នផ្លែមៀនប៉ៃលិនចាប់ផ្ដើមប្រមូលផលហើយ ប៉ុន្តែដោយសារតែកូវីដ១៩ រីករាដាលជាពិសេសនៅតាមបន្ទាត់ព្រំដែនកម្ពុជាថៃ ធ្វើឱ្យការនាំចេញមានភាពពិបាកហើយដោយសារតែរបាំងភូតគាមអនាម័យ ធ្វើឱ្យផ្លែឈើរបស់កម្ពុជាមួយនេះ មិនអាចនាំចេញទៅកាន់ប្រទេសចិនដោយផ្ទាល់ទើបធ្វើឱ្យផ្លែឈើនេះជួបបញ្ហាទីផ្សារ ។
ក្រសួងកសិកម្មរុក្ខាប្រមាញ់និងនេសាទ ក៏បានបញ្ជាក់ថាបានដាក់សំណើរដើម្បីចរចាបើកទីផ្សារសម្រាប់ផ្លែ មួយនេះ ទៅកាន់ប្រទេសចិននិងថៃរួចហើយ ដូច្នេះនៅពេលចរចាបានសម្រេចរំពឹងថា ផ្លែឈើនេះ នឹងមានទីផ្សារធំជាងមុនផងដែរ ។
ចែករំលែកព័តមាននេះ