រាជធានីភ្នំពេញ៖ មានក្រុមហ៊ុនយ៉ាងតិចចំនួន ១០ បានដាក់ពាក្យស្នើសុំនាំចូល វ៉ាក់សាំងមកកម្ពុជា សម្រាប់ចាក់ឱ្យពលរដ្ឋដែលមានលទ្ធភាព បន្ថែមពីលើវ៉ាក់សាំងដែលរដ្ឋាភិបាល កំពុងផ្តល់ជូនពលរដ្ឋជាទូទៅដោយមិនគិតថ្លៃនោះ។ លោកឧកញ៉ា លឹម…
រាជធានីភ្នំពេញ៖ មានក្រុមហ៊ុនយ៉ាងតិចចំនួន ១០ បានដាក់ពាក្យស្នើសុំនាំចូល វ៉ាក់សាំងមកកម្ពុជា សម្រាប់ចាក់ឱ្យពលរដ្ឋដែលមានលទ្ធភាព បន្ថែមពីលើវ៉ាក់សាំងដែលរដ្ឋាភិបាល កំពុងផ្តល់ជូនពលរដ្ឋជាទូទៅដោយមិនគិតថ្លៃនោះ។
លោកឧកញ៉ា លឹម ហេង អនុប្រធានសភាពាណិជ្ជកម្ម កម្ពុជាបានឱ្យដឹងថា នៅពេលលោកបានប្រជុំជាមួយក្រសួងសុខាភិបាល កាលថ្មីៗកន្លងទៅនេះ មានក្រុមហ៊ុនចុះបញ្ជីស្នើសុំនាំចូល វ៉ាក់សាំងកូវីដ១៩ មានជិត ១០ ក្រុមហ៊ុនហើយ។ លោកអះអាងថា គ្មានបញ្ហាប្រឈមក្នុង ការនាំចូលឬទិញវ៉ាក់សាំងនេះទេ។
យោងតាមការបញ្ជាក់របស់លោកឧកញ៉ា លឹម ហេង បានបន្តថា៖ «ខាងក្រុមហ៊ុនបានស្នើសុំឱ្យ ខាងរដ្ឋាភិបាលចេញមុខជាអ្នកបញ្ជាទិញ តែការទូទាត់ខាងវិស័យឯកជនជាទូទាត់ប្រាក់ ដើម្បីបានវ៉ាក់សាំងផ្សេងៗ ដែលមានការទទួលស្គាល់ ពីអង្គការសុខភាពពិភពលោក ឬមានការអនុញ្ញាត ពីរាជរដ្ឋាភិបាលកម្ពុជាឱ្យប្រើប្រាស់»។
ប្រភពដដែលអះអាងថាវ៉ាក់សាំង ដែលក្រុមហ៊ុននាំចូលមិនមែន ជាប្រភេទវ៉ាក់សាំង ដែលរដ្ឋាភិបាលបានកំពុងចាក់ជូនពលរដ្ឋនោះឡើយ។ បើតាមអនុប្រធានសភាពាណិជ្ជកម្ម ការនាំចូលវ៉ាក់សាំងរបស់វិស័យឯកជន មិនប៉ះពាល់ដល់ផែនការចាក់វ៉ាក់សាំង ដោយឥតថ្លៃរបស់រដ្ឋាភិបាល ដល់ពលរដ្ឋនោះឡើយ។ ហើយការផ្តល់វ៉ាក់សាំងដោយឥតគិតថ្លៃ របស់រដ្ឋាភិបាលក៏មិនប៉ះពាល់ដល់ការនាំចូល វ៉ាក់សាំងខាងវិស័យឯកជនដែរ។
លោកឧកញ៉ា លឹម ហេង បានបញ្ជាក់ថា៖ «វ៉ាក់សាំងដែលវិស័យឯកជននាំចូល គឺសម្រាប់ពលរដ្ឋដែលមានលទ្ធភាព»។
សូមជម្រាបថារដ្ឋាភិបាល មានផែនការផ្តល់វ៉ាក់សាំង ជូនពលរដ្ឋអាយុចាប់ពី ១៨ ឆ្នាំ ឡើងទៅឱ្យបានចំនួន ១០ លាននាក់ក្នុងចំណោមពលរដ្ឋទាំងអស់ និងផ្តល់ជូនកុមារនិងយុវវ័យអាយុពី ១២ ដល់ ១៧ ឆ្នាំប្រមាណជាង ២ លាននាក់ទៀត។ ផែនការចាក់វ៉ាក់សាំងរបស់រដ្ឋាភិបាល អាចនឹងបញ្ចប់នៅចុងឆ្នាំនេះ។ រដ្ឋាភិបាលបានប្រើប្រាស់វ៉ាក់សាំង ផលិតនៅប្រទេសចិនជាយុទ្ធសាស្ត្រមានដូចជា ស៊ីណូហ្វាម (Sinopharm) និងស៊ីណូវ៉ាក់ (Sinovac)។ ក្រៅពីជំនួយនិងបញ្ជាទិញពីប្រទេសចិន កម្ពុជាបានទទួលជំនួយវ៉ាក់សាំង ពីប្រទេសជាមិត្តមានដូចជា ជប៉ុន អាមេរិក អូស្ត្រាលី និងអង្គការសុខភាពពិភពលោកផងដែរ៕
ចែករំលែកព័តមាននេះ