រាជធានីភ្នំពេញ ៖ ក្រោយផ្ទុះនូវបាតុភាពមិនប្រក្រតីមួយចំនួនជុំវិញការរើសអើងមិនទទួលយកអ្នកជំងឺព្យាបាលនៅតាមមន្ទីរពេទ្យមួយចំនួនក្នុងបរិបទកូវីដ-១៩ កន្លងមកនេះ រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង បានព្រមានថា បើសិនជាមន្ទីរពេទ្យឯកជនណាមិនទទួលព្យាបាលអ្នកជំងឺនឹងត្រូវបិទ…
រាជធានីភ្នំពេញ ៖ ក្រោយផ្ទុះនូវបាតុភាពមិនប្រក្រតីមួយចំនួនជុំវិញការរើសអើងមិនទទួលយកអ្នកជំងឺព្យាបាលនៅតាមមន្ទីរពេទ្យមួយចំនួនក្នុងបរិបទកូវីដ-១៩ កន្លងមកនេះ រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង បានព្រមានថា បើសិនជាមន្ទីរពេទ្យឯកជនណាមិនទទួលព្យាបាលអ្នកជំងឺនឹងត្រូវបិទ ដោយមិនអនុញ្ញាតឲ្យព្យាបាលបន្តទៀតឡើយ ។
ទន្ទឹមនឹងនេះ រដ្ឋមន្ត្រីក្រសួងសុខាភិបាលបានស្នើឲ្យមន្ទីពេទ្យរដ្ឋនិងឯកជនទាំងអស់ទទួលយកអ្នកជំងឺមកព្យាបាលតាមសេវាសាធារណៈជាធម្មតា ។ នេះបើយោងតាមលិខិតមួយច្បាប់របស់ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលស្ដីពីការរៀបចំចាត់ចែង និងអនុវត្តការទទួលយកអ្នកជំងឺព្យាបាលនៅតាមសេវាសាធារណៈ (មន្ទីរពេទ្យថ្នាក់ជាតិ មជ្ឈមណ្ឌលជាតិ មន្ទីរពេទ្យង្អែករាជធានីខេត្ត ស្រុក ខណ្ឌ មណ្ឌលសុខភាព និងសេវាសុខាភិបាលឯកជន (មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភព) នៅថ្ងៃទី៤ ខែសីហា ឆ្នាំ២០២១ ។
នៅក្នុងលិខិតនេះបានលើកស្នើឲ្យប្រធានមជ្ឈមណ្ឌលជាតិប្រធានមន្ទីរសុខាភិបាលរាជធានី ខេត្ត និងលោក លោកស្រី ដែលជា ម្ចាស់សេវាសុខាភិបាលឯកជន (មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភព)ទទួលយកអ្នកជំងឺមកព្យាបាលតាមសេវាសាធារណៈធម្មតា ។
ឯកឧត្តម ម៉ម ប៊ុនហេង បានបញ្ជាក់ក្នុងលិខិតថា « រយៈកាលកន្លងមកនេះមានបាតុភាពបានកើតឡើងជារឿយៗ ដែលអ្នកជំងឺមានសភាពធ្ងន់ធ្ងរបានទៅរកកន្លែងព្យាបាលនៅតាមសេវាសាធារណៈ(មន្ទីរពេទ្យរដ្ឋ) និងសេវាសុខាភិបាលឯកជន (គ្លីនិកឯកជន) បែរជាមិនទទួលយកពួកគាត់មកធ្វើការព្យាបាលដែលធ្វើឱ្យជះឥទ្ធិពលមិនល្អមកលើក្រសួងសុខាភិបាល និងសេចក្ដីថ្លៃថ្នូររបស់គ្រូពេទ្យ» ។
ឯកឧត្តមរដ្ឋមន្ត្រីបានណែនាំយ៉ាងដូច្នេះថា ចំពោះមន្ទីរពេទ្យជាតិ និងមជ្ឈមណ្ឌលជាតិ ត្រូវតែប្រកាន់យកគោលការណ៍ទទួលសង្គ្រោះព្យាបាលអ្នកជំងឺជាដាច់ខាត ដោយអាចប្រើប្រាស់តេស្ករហ័សរកអង់ទីហ្សែនកូវីដ-១៩ ក្នុងការញែកអ្នកជំងឺកូវីដ-១៩ ។
ក្នុងករណីដែលធ្វើតេស្តទៅឃើញអវិជ្ជមានកូវីដ-១៩ ត្រូវបញ្ជូនអ្នកជំងឺទៅព្យាបាលតាមផ្នែក និងតាមបច្ចេកទេសព្យាបាលធម្មតា និង ក្នុងករណីធ្វើតេស្តទៅឃើញវិជ្ជមានកូវីដ-១៩ ត្រូវបញ្ជូនអ្នកជំងឺទៅបន្ទប់ដាច់ដោយឡែកសម្រាប់ព្យាបាលអ្នកជំងឺកូវីដ-១៩ ។
មន្ទីរពេទ្យជាតិ មជ្ឈមណ្ឌលជាតិ ត្រូវមានលេខទូរស័ព្ទសម្រាប់ឱ្យអ្នកជំងឺមកពីខាងក្រៅធ្វើការទំនាក់ទំនង(មានក្នុងឧបសម្ព័ន្ធ) ។ ចំពោះមន្ទីរពេទ្យបង្អែករាជធានី ខេត្ត ស្រុក ខណ្ឌ និងមណ្ឌល សុខភាពក៏ត្រូវតែប្រកាន់យកគោលការណ៍ទទួលសង្គ្រោះ ព្យាបាលអ្នកជំងឺជាដាច់ខាត ដោយអាចប្រើប្រាស់តេស្ករហ័សរកអង់ទីហ្សែនកូវីដ-១៩ ក្នុងការញែកអ្នកជំងឺកូវីដ-១៩ ។
រដ្ឋមន្ត្រីបានលើកឡើងទៀត ក្នុងករណីធ្វើតេស្តទៅឃើញអវិជ្ជមានកូវីដ-១៩ ត្រូវបញ្ជូនអ្នកជំងឺទៅព្យាបាលតាមផ្នែក និងតាម បច្ចេកទេសព្យាបាលធម្មតា និងក្នុងករណីធ្វើតេស្តទៅឃើញវិជ្ជមានកូវីដ-១៩ ត្រូវបញ្ជូនអ្នកជំងឺទៅបន្ទប់ដាច់ដោយឡែកសម្រាប់ព្យាបាលអ្នកជំងឺកូវី៥-១៩ ប្រសិនបើមន្ទីរពេទ្យបង្អែកណាគ្មានកន្លែងព្យាបាលជំងឺកូវី៥-១៩ ទេត្រូវបញ្ជូនទៅមន្ទីរពេទ្យបង្អែករាជធានី ខេត្ត ។
រាល់ការបញ្ជូនត្រូវធ្វើការទំនាក់ទៅលេខទូរស័ព្ទរបស់មន្ទីរពេទ្យបង្អែករាជ ធានី ខេត្ត ដែលមានជូនភ្ជាប់ក្នុងឧបសម្ព័ន្ធ ដោយប្រាប់ពីមូលហេតុនៃការបញ្ជូន និងស្ថានភាពរបស់អ្នកជំងឺដែលត្រូវ បញ្ជូនឱ្យបានដឹងជាមុន ។
ជាមួយគ្នានោះដែរ ឯកឧត្តមរដ្ឋមន្ត្រីក៏បានលើកឡើងថា ចំពោះមូលដ្ឋានសេវាសុខាភិបាលឯកជន (មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភព) ត្រូវតែប្រកាន់យកគោលការណ៍ទទួលសង្គ្រោះព្យាបាលអ្នកជំងឺជាដាច់ខាត ដោយអាចប្រើប្រាស់គេស្គរហ័សអង់ ទីហ្សែនរកកូវីដ- ១៩ ក្នុងការញែកអ្នកជំងឺកូវីដ-១៩ បើសង្ស័យថា អ្នកជំងឺមានជំងឺកវីដ-១៩ ។
ក្នុងករណីធ្វើតេស្តទៅឃើញអវិជ្ជមានកូវីដ-១៩ ត្រូវទទួលយកអ្នកជំងឺព្យាបាលធម្មតា ទៅតាមបច្ចេកទេសព្យាបាល និងក្នុងករណីធ្វើតេស្ត ទៅឃើញវិជ្ជមានកូវីដ-១៩ ត្រូវដាក់អ្នកជំងឺក្នុងបន្ទប់ព្យាបាលដាច់ដោយឡែកសម្រាប់ព្យាបាលអ្នកជំងឺកូវីដ-១៩ (ប្រសិនបើមានការអនុញ្ញាតឱ្យព្យាបាលអ្នកជំងឺកូវីដ-១៩.ពីក្រសួ ងសុខាភិបាល) និងបញ្ជូនទៅមណ្ឌលព្យាបាល អ្នកជំងឺកូវីដ-១៩ ឬមន្ទីរពេទ្យរដ្ឋដែលមា នព្យាបាលអ្នកជំងឺកូវីដ-១៩ (ប្រសិនបើពុំមានការអ នុញ្ញាតឱ្យព្យាបាលជំងឺ កូវីដ-១៩ ពីក្រសួងសុខាភិបាល)។
ឯកឧត្តមរដ្ឋមន្ត្រីបានព្រមានយ៉ាងដូច្នេះថា ៖«ក្នុងករណីដែលម្ចាស់មូលដ្ឋានសេវាសុខាភិបាលឯកជនណា ដែលមិនអនុវត្តតាមការណែនាំនេះ ក្រសួងសុខាភិបាលនឹងមានវិធានការបិទមូលដ្ឋានសេវាសុខាភិបាលឯកជននោះមិនអនុញ្ញាតឱ្យទទួលព្យាបាលអ្នកជំងឺតទៅទៀតឡើយ» ។
រាល់ករណីអ្នកជំងឺវិជ្ជមានកូវីដ-១៩ ដែលត្រូវបញ្ជូនទៅមណ្ឌលព្យាបាលកូវីដ-១៩ ត្រូវធ្វើការទំនាក់ទៅលេខទូរស័ព្ទ របស់មណ្ឌលព្យាបាលកូវីដ-១៩. ដែលមានជូនភ្ជាប់ក្នុងឧបសម្ព័ន្ធដោយប្រាប់ពីមូលហេតុនៃការបញ្ជូន និងស្ថានភាពរបស់អ្នកជំងឺដែលត្រូវបញ្ជូនឱ្យបានដឹងជាមុន ។
អនុគណៈកម្មការបច្ចេកទេស និងព្យាបាលកូវីដ-១៩ និងនាយកដ្ឋានមន្ទីរពេទ្យ ត្រូវត្រួតពិនិត្យ តាមដាន ការងារនេះជាប្រចាំ និងធ្វើរបាយការណ៍ជូនថ្នាក់ដឹកនាំក្នុងករណីមានបាតុភាពមិនប្រក្រតីកើតឡើង៕
ចែករំលែកព័តមាននេះ