ហុងស៊ុយបស្ចិមប្រទេសបានបរិយាយថា លេខទូរស័ព្ទប៉ែកខាងចុងបំផុត ឬហៅថាកន្ទុយលេខទូរស័ព្ទក៏អាចប្រាប់ពីចរិតលក្ខណៈរបស់អ្នកបានយ៉ាងពិសេស ដែលមនុស្សភាគច្រើនមានជំនឿថា វាពិតជាមានលក្ខណៈដូច្នោះមែន ។ ខាងក្រោមនេះជាការទស្សន៍ទាយបែបប្រៀបធៀបរវាងកន្ទុយលេខទូរស័ព្ទទៅនឹងបុគ្គលិកលក្ខណៈពិតរបស់លោកអ្នក សូមពិនិត្យដូចតទៅ៖
លេខទូរស័ព្ទខាងចុងជាលេខ ០ បង្ហាញថា អ្នកជាមនុស្សស្រឡាញ់មិត្តភក្តិ ឆ្លាតវាងវៃ និងជាអ្នករៀបចំផែនការយ៉ាងពូកែទៀតផង, ជាអ្នកមានទឹកចិត្តល្អ និងចេះបត់បែនគ្រប់កាលៈទេសៈចូលទៅក្នុងសង្គម ទើបក្លាយជាអ្នកជោគជ័យខាងរកលុយ ។
កន្ទុយលេខ១ ចាត់ចូលជាមនុស្សឆ្លាត ឆាប់ចេះ ឆាប់យល់ ធ្វើអ្វីដោយការប្រុងប្រយ័ត្ន ជាមនុស្សមានគោលការណ៍ជានិច្ច និយាយស្តីមានហេតុផល ចង់ចេះចង់ដឹងគ្រប់កិច្ចការ និងជាអ្នកមានភាពជឿជាក់លើការគិតរបស់ខ្លួន ហើយជាអ្នកមិនសូវជឿនរណាងាយៗនោះឡើយ ។
លេខទូរស័ព្ទខាងចុងលេខ២ ជាមនុស្សមានគំនិតច្នៃប្រឌិត និងការពិចារណាដ៏ល្អ ជារឿយៗអ្នកមានអារម្មណ៍អាចដឹងពីអាថ៌កំបាំងផ្សេងៗ ចូលចិត្តភាពស្ងប់ស្ងាត់ និងជាអ្នកមិនសូវចូលចិត្តនៅផ្ទះទេ ។ ឯរឿងស្នេហាតែងមានអារម្មណ៍ចង់បានគូស្នេហ៍ជាសញ្ជាតិផ្សេង ។
ទូរស័ព្ទកន្ទុយលេខ៣ ជាបុគ្គលមិនចូលចិត្តធ្វើអ្វី គិតអ្វីជាចំហទេ ត្រូវការភាពឯកជន ជាអ្នកមិនចូលចិត្តរញ៉េរញ៉ៃជាមួយអ្នកណាឡើយ ហើយក៏មិនចង់ឱ្យគេមកពាក់ព័ន្ធនឹងការងារខ្លួនដែរ និងជាមនុស្សមានផ្នត់គំនិតឆ្ពោះទៅមុខជាដរាប ពូកែធ្វើការ ហ៊ានគិត ហ៊ានសម្រេចចិត្តមិនខ្លាចឧបសគ្គអ្វីទាំងអស់ ។
កន្ទុយទូរស័ព្ទលេខ៤ ជាមនុស្សមានបរិសុទ្ធ ជាអ្នកមានមនោសញ្ចេតនាច្រើន ជាមនុស្សចិត្តទន់ឆាប់អាណិតអាសូរគេ មានពាក្យសម្តីដែលបង្កប់ដោយន័យជ្រៅ មានមន្តស្នេហ៍ ជាអ្នកមានចិត្តមេត្តា ករុណា និងចិត្តសប្បុរសចំពោះអ្នកដទៃ តែជាមនុស្សចិត្តដាច់បន្តិច ។ បើជាមនុស្សប្រុស គឺជាបុរសដែលមានចរិយាទន់ភ្លន់ សុភាពរាបសា តែបើជានារី ភាគច្រើនចូលចិត្តគិតតែម្នាក់ឯង មានមនោសញ្ចេតនាខ្ពស់ ភ្នែកស្រទន់បង្កប់ដោយមន្តស្នេហ៍ ។
កន្ទុយលេខ៥ ជាមនុស្សដែលមានចរិតលក្ខណៈស្រឡាញ់សម្រស់ មានដុងសិល្បៈ អ្នកមានកន្ទុយទូរស័ព្ទលេខ៥ភាគច្រើនជាមនុស្សដែលពូកែតុបតែងខ្លួន ចូលចិត្តញ៉ាំ ដើរលេង និងភាពសប្បាយរីករាយ។ ភាគច្រើនគឺមិនចូលចិត្តធ្វើអ្វីដែលពិបាកៗទេជាមនុស្សចូលចិត្តរកលុយ តែគម្រិះមិនសូវហ៊ានចាយវាយទេ ។
ខាងចុងលេខ៦ ជាអ្នកពូកែចរចាមានជំនាញខាងលក់ដូរ ជាមនុស្សស្រឡាញ់សេរីភាព ស្រឡាញ់ការថ្នាក់ថ្នម និងមានទំនាក់ទំនងល្អជាមួយមនុស្សជុំវិញខ្លួន ហើយអ្នកណាៗក៏ស្រឡាញ់ចូលចិត្ត នាំលាភសំណាងមកឱ្យ ។
កន្ទុយទូរស័ព្ទលេខ៧ ជាមនុស្សមានចិត្តទន់ មានមនោសញ្ចេតនាច្រើន ចិត្តល្អ ឆាប់អាណិតអាសូរគេ មានពាក្យសម្តីដែលបង្កប់ដោយមន្តស្នេហ៍ ជាអ្នកមានចិត្តមេត្តា ករុណា និងចិត្តសប្បុរសចំពោះអ្នកដទៃ ហើយរាងគិតច្រើនបន្តិច ។ បើជាមនុស្សប្រុស គឺជាបុរសចិត្តល្អ សុភាពរាបសា មានចរិយាទន់ភ្លន់ តែបើជានារី ភាគច្រើនចូលចិត្តគិតតែម្នាក់ឯង មានមនោសញ្ចេតនាខ្ពស់ និងភ្នែកស្រទន់ ។
កន្ទុយទូរស័ព្ទលេខ៨ ច្រើនជាមនុស្សមានចិត្តមានះនិងចូលចិត្តធ្វើអ្វីជាការងារធំដុំ អ្នកមានភាពអត់ធ្មត់ និងទំនួលខុសត្រូវខ្ពស់ ។ ធ្វើអ្វីក៏តែងតែមានការរៀបចំផែនការ ឬពេលខ្លះគិតច្រើនរហូតដល់ស្មុគស្មាញក៏មាន ។ មិនជាអ្នកចូលចិត្តចាយលុយខ្ជះខ្ជាយ តែយកលុយទៅវិនិយោគឬប្រើលុយរកលុយមកវិញ ប៉ុន្តែក៏ជាមនុស្សដែលមានចរិតឆេវឆាវឆាប់ខឹងណាស់ដែរ ។
លេខទូរស័ព្ទដែលមានកន្ទុយលេខ៩ មិនថាប្រុសឬស្រី គេជាមនុស្សឧស្សាហ៍ព្យាយាម មានភាពអត់ធ្មត់គ្រប់ទម្រង់ការងារ, មិនសូវចេះខ្លាចនរណាទេ, ចូលចិត្តនិយាយឮៗ តែរាងឆេវឆាវ ចិត្តក្តៅបន្តិចពេលឆ្គងចិត្តនឹងមនុស្សណាម្នាក់, ជាមនុស្សនិយាយត្រង់ទៅត្រង់មក និងមិនងាយចុះចាញ់ដោយងាយៗទេ ។ ជាអ្នកធ្វើការសម្រេចចិត្តលឿន មានភាពរហ័សរហួន និងមានទិសដៅច្បាស់លាស់ ។ បើជាមនុស្សប្រុសជាអ្នកមានមហិច្ឆតាខាងអំណាច តែបើជាមនុស្សស្រី ជានារីដែលរឹងមាំ សម្រេចការអ្វីយកហេតុផលជាធំ ៕ សាន សារិន
ចែករំលែកព័តមាននេះ