ខេត្តប៉ៃលិន ៖ បន្ទាប់ពីដាំបន្លែត្រសក់ផ្អ (ទ្រើង) ខាងក្រោយផ្ទះរបស់ខ្លួន ដែលបានតាមរបៀបបច្ចេកទេសថ្មីធ្វើឱ្យដុះលូតលាស់យ៉ាងល្អអស់រយ:ពេលជាង១ខែ ដោយបញ្ចេញផ្កាផ្លែគួរឱ្យកត់សម្គាល់ ក៏ដល់ពេលត្រូវបេះលក់ល្មម ហើយចាប់ផ្តើមប្រមូលផលជាបណ្តើរៗហើយ ដើម្បីបានថវិកាសម្រាប់សងជំពាក់បំណុលគេ និងផ្គត់ផ្គង់ជីវភាពប្រចាំថ្ងៃ ។
ជាក់ស្តែង កាលពីវេលាម៉ោង៤ និង៣០នាទីរសៀលថ្ងៃទី០៤ ខែសីហា ឆ្នាំ២០២១ កសិករមួយគ្រួសារ មានឈ្មោះ សុខ ភាព អាយុ៥០ឆ្នាំ ប្តីឈ្មោះ ហិន នូ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន បានដាំបន្លែត្រសក់ផ្អ (ទ្រើង) ចំនួន១៦រង (ជួរ) ក៏បានបេះលក់អស់រយ:២ថ្ងៃ កន្លងមក ដោយក្នុង១ថ្ងៃ អាចបេះថ្លឹងលក់ឱ្យឈ្មួញចាប់ពី៧០ ទៅ៨០គីឡូក្រាម ។
បើតាមការរៀបរាប់ពីកសិករម្នាក់ ឈ្មោះ សុខ ភាព បានរៀបរាប់ឱ្យដឹងថា ៖ គាត់បានដាំបន្លែត្រសក់ផ្អ (ទ្រើង) នេះ អស់រយ:ពេល១ខែ៥ថ្ងៃមកហើយ ដោយដាំតាមបច្ចេកទេសថ្មីមួយ ក្រោយពីខាងមន្ត្រីកសិកម្មចុះមកបង្ហាត់បង្រៀន ឱ្យដាំតាមលក្ខណ:ស្រោបថង់នៅតាមរង (ជួរ) នីមួយៗ ដើម្បីកុំឱ្យស្មៅដុះជាន់ពីលើដើមត្រសក់ លំបាកក្នុងការថែទាំ ។ ប្រភពបន្តទៀតថា គាត់ក៏បានបង្កប់ទុយោទឹកនៅក្នុងថង់តាមជួរនីមួយៗ ដើម្បីបូមទឹកបន្តក់ស្រោចជារៀងរាល់ថ្ងៃ ធ្វើឱ្យបន្លែនេះដុះលូតលាស់ល្អជាងកាលពីមុន ។
ក្រោយពីសាកល្បងតាមបច្ចេកទេសថ្មីនេះ គាត់សង្កេតឃើញថា ពិតជាទទួលបានជោគជ័យប្រាកដមែន ដោយដើមត្រសក់ដុះលូតលាស់ល្អ មិនលំបាកថែទាំ បោចស្មៅ ឬដាក់ជីនៅលើគល់ត្រសក់នោះឡើយ ហើយពេលត្រសក់ផ្លែ ក៏អត់មានសត្វល្អិត ចូលមកទិចផ្លែត្រសក់នាំឱ្យស្អុយ រលួយ ខូចខាត ដូចកាលពីមុនដែរ ព្រោះថង់មានចំណាំងផ្លាតធ្វើឱ្យសត្វល្អិត មានការខ្លាចមិនហ៊ានហើរចូលមកក្បែរនោះឡើយ ។
គាត់បន្ថែមទៀតថា ដោយសារតែបញ្ហាជំងឺកូវីដ ១៩ កំពុងរីករាលដាលនៅក្នុងខេត្តប៉ៃលិន ក៏ដូចជាប្រទេសកម្ពុជា ធ្វើឱ្យតម្លៃទីផ្សារបន្លែត្រសក់ផ្អ (ទ្រើង) មានការធ្លាក់ចុះ ពាក់កណ្តាល ក៏មិន សូវមានអ្នកទិញដែរ ដោយនៅក្នុងផ្សារសាមគ្គីហៅប៉ាហ៊ី ឈ្មួញទិញ១គីឡូក្រាមត្រឹមតែ១០០០រៀលប៉ុណ្ណោះ ខណ:កាលពី១ខែមុន ឈ្មួញទិញ ១គីឡូក្រាម តម្លៃ៣០០០រៀលឯណោះ ។
ម្យ៉ាងវិញទៀត បន្ទាប់ពីមានការបិទខ្ទប់ខេត្ត ម៉ូយដែលធ្លាប់ចូលមកទិញយកទៅលក់ដូរក្នុង១ថ្ងៃចំនួន៦០ទៅ៧០គីឡូក្រាម បានកាត់បន្ថយមកទិញត្រឹមតែ១០ ទៅ២០គីឡូក្រាមប៉ុណ្ណោះ ។ គាត់បញ្ជាក់ទៀតថា ដើម្បីសុវត្ថិភាពសុខភាពប្រជាបលរដ្ឋក្នុងខេត្ត ការដាំបន្លែរបស់គាត់ គឺប្រើជីធម្មជាតិ លាមកសត្វ មិនប្រើជីគីមី ឬថ្នាំពុលសម្លាប់សត្វល្អិតនោះឡើយ ដើម្បីជៀសវាងការកើតទៅជាជំងឺផ្សេងៗផងដែរ ៕
ចែករំលែកព័តមាននេះ