ប្រទេសអ៊ីរ៉ង់ ៖ ប្រភពព័ត៌មាន៣ខាងសន្តិសុខសមុទ្ររាយការណ៍កាលពីថ្ងៃទី៣ ខែសីហា ឆ្នាំ២០២១ថា ក្រុមប្រដាប់អាវុធមួយទាក់ទិននឹងអ៊ីរ៉ង់ សង្ស័យចាប់នាវាដឹកប្រេង១គ្រឿង ក្នុងឈូងសមុទ្រពែរ្ស៍នាដែនទឹកអេមីរ៉ាត់អារ៉ាប់រួម។ ឧប្បត្តិហេតុនោះកើតមានក្រោយពីទីភ្នាក់ងារមួយរបស់អង់គ្លេស រាយការណ៍ពីលទ្ធភាពនៃការចាប់ពង្វាងមួយ ក្នុងតំបន់សមុទ្រនោះ។
នៅក្រុងតេហេរ៉ង់កងកម្លាំងឆ្មាំបដិវត្តន៍បានបដិសេធ រាល់ការចូលរួមរបស់កងទ័ពអីុរ៉ង់ ឬរបស់បណ្ដាកងជីវពលជាសម្ព័ន្ធមិត្ត ក្នុងឧប្បត្តិហេតុណាមួយ នាដែនទឹកអេមីរ៉ាត់អារ៉ាប់រួម ដោយបរិហារការលើកអំពីរឿងនោះថាជាលេសមួយ សម្រាប់ធ្វើសកម្មភាពប្រទូស្តរ៉ាយនានាប្រឆាំងអ៊ីរ៉ង់។
តាមប្រភពសន្តិសុខសមុទ្រ២ថា នាវាដឹកប្រេងឈ្មោះ ASPHALT PRINCESS ដោតទង់ជាតិប៉ាណាម៉ា ជាគោលដៅនៃការវាយប្រហារ ដែលកើតមានក្នុងសមុទ្រអារ៉ាប៊ី ពេលបើកបរឆ្ពោះមកកាន់ច្រកសមុទ្រ ORMUZជាច្រកឆ្លងកាត់នៃបណ្ដានាវាដឹកប្រេងតំណាងឲ្យ១ភាគ៥ នៃការនាំប្រេងចេញរបស់ពិភពលោក។
ក្រសួងការបរទេសអាមេរិក បានសម្ដែងការព្រួយបារម្ភនិងគូសបញ្ជាក់ថា ខ្លួននឹងសិក្សាលើព័ត៌មានទាំងនោះនិងបន្តថា វាជាការប្រញាប់ប្រញាល់ពេកដើម្បីធ្វើការសន្និដ្ឋានមួយ។ ចំណែកអ្នកនាំពាក្យម្នាក់ របស់ក្រសួងការបរទេសអាមេរិកនិយាយថា ការសើុបអង្កេតបន្ទាន់មួយត្រូវបានបើកធ្វើដោយក្រសូងនេះ។
ភាពតានតឹងបានឡើងខ្ពស់ក្នុងតំបន់ ចាប់តាំងពីសប្ដាហ៍មុនមក ក្រោយការវាយប្រហារនាវាដឹកប្រេងមួយក្នុងសមុទ្រអូម៉ង់ ដែលអ៊ីស្រាអែល សហរដ្ឋអាមេរិកនិងអង់គ្លេសចោទដាក់អ៊ីរ៉ង់ តែអ៊ីរ៉ង់បានបដិសេធ។ មិនទាន់មានការធ្វើអត្ថាធិប្បាយណាមួយក្នុងពេលភ្លាមៗ របស់អាជ្ញាធរអេមីរ៉ាត់់អារ៉ាប់រួមឡើយ ទាំងរបស់កងឯកភាពម៉ារីនអាមេរិកមានមូលដ្ឋាននៅប្រទេសបារ៉ែន។
មុននេះទីភ្នាក់ងារដឹកជញ្ជូនតាមសមុទ្រមួយរបស់អង់គ្លេសរាយការណ៍ ពីលទ្ធភាពខ្ពស់នៃការចាប់ពង្ខាង នាវាដឹកប្រេង១គ្រឿង ក្នុងតំបន់សមុទ្រនេះ តែមិនផ្ដល់ការបញ្ជាក់ឬកន្លែងដែលនាវានេះត្រូវចាប់ឬពីពួកអ្នកវាយប្រហារឡើយ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ