ភ្នំពេញ៖ ភោជនីយដ្ឋាន និងខារ៉ាអូខេ KTV ចំនួន ៣ទីតាំង បានល្មើសបម្រាមរបស់រាជរដ្ឋាភិបាល ក្នុងការប្រយុទ្ធប្រឆាំង និងទប់ស្កាត់ការឆ្លងរីករាលដាលជំងឺ COVID-19…
ភ្នំពេញ៖ ភោជនីយដ្ឋាន និងខារ៉ាអូខេ KTV ចំនួន ៣ទីតាំង បានល្មើសបម្រាមរបស់រាជរដ្ឋាភិបាល ក្នុងការប្រយុទ្ធប្រឆាំង និងទប់ស្កាត់ការឆ្លងរីករាលដាលជំងឺ COVID-19 ដោយបានបើកដំណើរការទទួលភ្ញៀវ ចូលផឹកស៊ីសប្បាយ ច្រៀងខារ៉ាអូខេ ដោយលួចលាក់។ ប៉ុន្តែត្រូវបានអាជ្ញាធរខណ្ឌពោធិ៍សែនជ័យ ស៊ើបដឹង ក៏បានចុះទៅបង្ក្រាប និងក្នុងបំណងឃាត់ខ្លួនម្ចាស់ទីតាំង នាំទៅចាត់ការតាមច្បាប់។ ប៉ុន្តែម្ចាស់ទីតាំងខាងលើនោះ ទំនងមានអ្នកលួចខ្សឹបប្រាប់ឲ្យដឹងជាមុន ទើបនាំគ្នា រត់គេចខ្លួនបាត់អស់ មុនពេលដែលកម្លាំងអាជ្ញាធរ ចុះទៅដល់។
ខណៈនោះ អាជ្ញាធរបានប្រើកណ្ដាប់ដៃដែក រុះរើ ទម្លាក់ស្លាកយីហោហាងទាំងនោះ ចោល ព្រមទាំងរឹបអូស យកសម្ភារៈ ដែលបម្រើឲ្យហាងនោះ ទៅរក្សាទុក។ ក្រៅពីនេះ កម្លាំងសមត្ថកិច្ច ក៏បានរុះរើស្លាកផ្សេងៗ ដែលបិទនៅតាមជញ្ជាំង និងបិទបាំងធ្វើជាបន្ទប់ផងដែរ។ មិនតែប៉ុណ្ណោះ ក្រោយពីការរុះរើ និងរឹបអូសឧបករណ៍ខាងលើ អាជ្ញាធរបានបិទទ្វារហាងទាំងនោះតែម្ដង កុំឲ្យពូកែលួចលាក់បើកដំណើរការតទៅទៀត។
ប្រតិបត្តិការនេះ បានធ្វើឡើង នាវេលាម៉ោង ២ និង៣០នាទី រសៀលថ្ងៃទី៣ ខែសីហា ឆ្នាំ២០២១ នៅភោជនីយដ្ឋាន និងខារ៉ាអូខេ យីហោ «ពិភពតារ៉ារះ» «រស្មី ពន្លឺពេជ្រ» និង «បុប្ផារាជធានី» ដែលមានទីតាំងស្ថិតនៅតាមបណ្ដោយផ្លូវលេខ២០០៤ ក្នុងភូមិត្រពាំងល្វា២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
អាជ្ញាធរខណ្ឌពោធិ៍សែនជ័យ បានប្រាប់ឲ្យដឹងថា ហាងទាំង ៣ទីតាំង បានលួចបើកដំណើរការយ៉ាងគឃ្លើន ល្មើសបម្រាមរបស់រាជរដ្ឋាភិបាល ក្នុងការប្រយុទ្ធប្រឆាំង និងទប់ស្កាត់ជំងឺកូវីដ១៩។ ទង្វើរបស់ពួកនេះ ពុំអាចលាក់បាំងបានឡើយ ទីបំផុត ត្រូវបានកម្លាំងអាជ្ញាធរស៊ើបដឹង ហើយបានរៀបចំកម្លាំង ដើម្បីចុះទៅបង្ក្រាប និងឃាត់ខ្លួនម្ចាស់មិនឲ្យដឹងខ្លួននោះទេ។ ប៉ុន្តែពុំដឹងថា យ៉ាងម៉េច ទើបម្ចាស់ហាងទាំងនោះ ដឹងខ្លួនមុន ហើយបាននាំគ្នា គេចខ្លួនបាត់អស់ មុនពេលដែលកម្លាំង ចុះទៅដល់ទៀត។ បន្ទាប់មក កម្លាំងបានសម្រេច ដកហូតយកឧបករណ៍ និងសម្ភារៈ ដែលបម្រើឲ្យហាងនោះ ព្រមទាំងរុះរើស្លាកយីហោ និងផ្ទាំងស្លាកផ្សេងចោលទាំងអស់តែម្ដង៕ យន់ ស៊ីថា
ចែករំលែកព័តមាននេះ