ខេត្តបាត់ដំបង ៖ អគ្គិភ័យគេអះអាងថា បង្កឡើងដោយទុស្សេខ្សែចរន្តអគ្គិសនីបានឆេះអស់ផ្ទះមួយខ្នងខូចខាតត្រាក់ទ័រមួយគ្រឿង រួមទាំងទ្រព្យជាច្រើនទៀត កាលពីរសៀលថ្ងៃទី០២ សីហា នៅចំណុចភូមិអូគគីរ ឃុំត្រាង ស្រុកកំរៀង តែមិនបង្កគ្រោះថ្នាក់ដល់មនុស្សទេ។
សេចក្ដីរាយការណ៍របស់សមត្ថកិច្ចបានឱ្យដឹងថា អគ្គិភ័យនោះបានឆេះផ្ទះអស់មួយខ្នង ទំហំ៤ម x៥ម ធ្វើពីឈើប្រក់ស័ង្កសី ហើយបន្តរាលដាលឆេះរោងដាក់ត្រាក់ទ័រមួយខ្នងទៀតទំហំ ៨ម x៦ម ដែលធ្វើឱ្យខូចខាតទាំងត្រាក់ទ័រមួយគ្រឿងផងដែរ។ របាយការណ៍បានឱ្យដឹងទៀតថា ម្ចាស់ផ្ទះឈ្មោះ ណាំ កប ភេទប្រុស អាយុ ៣៩ឆ្នាំ រស់នៅកន្លែងកើតហេតុខាងលើ។
តាមការស្រង់សំដីពីម្ចាស់ផ្ទះ សមត្ថកិច្ចបាននិយាយថា ដំបូងគាត់ឮសំឡេងផ្ទុះ (ទុស្សេខ្សែភ្លើង)។ គាត់បានឃើញបែកផ្កាភ្លើងនិងផ្សែងនៅកន្លែងផ្ទុះនោះ ហើយភ្លាមៗក៏បានក្លាយជាអណ្តាតភ្លើងឆាបឆេះរាលដាលយ៉ាងសន្ធោសន្ធៅ បង្កការភ្ញាក់ផ្អើលតែម្តង។ ប្រភពនៅកន្លែងកើតហេតុបានឲ្យដឹងដែរថា នៅពេលអគ្គិភ័យកំពុងឆាបឆេះ អ្នកភូមិបានប្រឹងប្រែងជួយពន្លត់ តែភ្លើងបានលេបយកផ្ទះមួយខ្នងអស់ទៅហើយ រីឯរោងដាក់ត្រាក់ទ័រទប់ស្កាត់បានខ្លះ ហើយត្រាក់ទ័រខូចខាតផ្នែកខាងមុខ។ ប៉ុន្តែទ្រព្យសម្បត្តិ និង សម្ភារប្រើប្រាស់នៅក្នុងផ្ទះជាច្រើនបានបាត់បង់ តែមិនមានមនុស្សរងគ្រោះដោយសារហេតុការណ៍នេះទេ៕
ចែករំលែកព័តមាននេះ