យោងតាមរបាយការណ៍ក្រសួងធម្មការ និងសាសនាបានប្រកាសថា គិតមកដល់ពេលនេះនៅទូទាំងប្រទេសមានព្រះសង្ឃប្រមាណជាជាងពីររយអង្គហើយ ដែលបានឆ្លងជំងឺកូវីដ១៩ ក្នុងនោះរាជធានីភ្នំពេញបានឈានមុខគេដោយមានព្រះសង្ឃឆ្លងច្រើនជាងគេ ចំណែកប្រជាពុទ្ធបរិស័ទក៏ហាក់ដូចជារាថយនឹងការចូលទៅធ្វើបុណ្យបំពេញទាននៅក្នុងវត្តអារាម ព្រោះខ្លាចកូវីដវាតាមយាយី ។
ព្រោះតែជំងឺកូវីដបានចូលទៅលុកលុយនៅក្នុងទីវត្តអារាមដោយមិនខ្លាចបាបបុណ្យនោះ នៅក្នុងរដូវចូលព្រះវស្សារយៈពេល៣ខែនាពេលនេះ ជាពេលល្អ វេលាដ៏សមគួរដែលព្រះសង្ឃត្រូវស្ថិតនៅតែក្នុងវត្តហាក់ដូចជា ព្រះសង្ឃកំពុងធ្វើចត្តាឡីស័កដូច្នោះដែរ ។ ក៏ប៉ុន្តែអ្វីដែលជាបញ្ហាតាមវត្តជាច្រើនក្នុងពេលជំងឺកូវីដឆ្លងរាតត្បាតនេះ គឺចង្ហាន់សម្រាប់ព្រះសង្ឃ ខណៈដែលប្រជាពុទ្ធបរិស័ទ ដែលមានសទ្ធាធ្វើបុណ្យទានក៏ហាក់ដូចជាថយចុះ មិនហ៊ានចូលទៅបុណ្យទាននៅក្នុងទីអារាមទេ ដោយសារតែបញ្ហាកូវីដកំពុងតែរាតត្បាតពេញបន្ទុកទៅហើយ ។
ដូច្នេះមានតែអាជ្ញាធរមូលដ្ឋានទេដែលជាភ្នែកជាច្រមុះក្នុងការទំនុកបម្រុងចង្ហាន់ប្រគេនព្រះសង្ឃតាមតែអាចធ្វើទៅបាន និងស្របតាមសេចក្តីណែនាំរបស់ប្រមុខរាជរដ្ឋាភិបាលក្នុងពេលកន្លងមកផង ។ ចំណែកប្រជាពុទ្ធបរិស័ទនានាក៏នៅតែអាចធ្វើបុណ្យទានបានដោយព្រះសង្ឃ បើកទទួលចង្ហាន់នៅនឹងច្រកទ្វារជារៀងរាល់ថ្ងៃ ទោះបីជាវត្តជាប់ធ្វើចត្តាឡីស័កទប់ស្កាត់មេរោគចង្រៃនោះក៏ដោយ ។
តាមការពិនិត្យជាកស្តែង ការឆ្លងជំងឺកូវីដចូលលុកលុយក្នុងវត្តអារាមនាពេលកន្លងមកដោយហេតុផល៤យ៉ាង ១-ឆ្លងតាមព្រះសង្ឃ និមន្តចេញបិណ្ឌបាតក្រៅវត្ត ២-ឆ្លងតាមអ្នកនៅក្នុងវត្តដែលបានទៅកន្លែងនានា ហើយនៅទីនោះមានឆ្លងកូវីដ ៣-ពុទ្ធបរិស័ទដែលមានផ្ទុកកូវីដយកចង្ហន់ទៅប្រគេនព្រះសង្ឃក្នុងវត្ត ហើយក៏ចម្លងជំងឺនេះដល់ព្រះសង្ឃ និង៤-ចម្លងតាមរយៈតាអាចារ្យតែម្តង ។
ទាំង៤ចណុចនេះហើយ ដែលជាហេតុផលនៃការឆ្លងកូវីដចូលដល់ក្នុងវត្តអារាម ពិសេសគឺវត្តនៅក្នុងរាជធានីភ្នំពេញ ហើយចាប់តាំងពីផ្ទុះការឆ្លងរាលដាលកូវីដខ្លាំង មានវត្តខ្លះបានបិទទ្វារខ្លួនឯង ដោយសារតែបារម្ភខ្លាចឆ្លងជំងឺ ។
ដូចនេះដើម្បីចៀសវាងនូវការឆ្លងកូវីដនៅតាមទីវត្តអារាមតទៅទៀត អាជ្ញាធរមានសមត្ថកិច្ចគប្បីសហការជាមួយវត្ត ដើម្បីទប់ស្កាត់នូវចំណុចទាំង៤ខាងលើ គឺព្រះសង្ឃមិនគួរនិមន្តចេញក្រៅវត្តទេ បើមិនចាំបាច់ ចំណែកប្រជាពុទ្ធបរិស័ទដែលយកចង្ហាន់ទៅប្រគេនលោក ក៏ត្រូវរក្សាគម្លាតសុវត្ថិភាព ពោលគឺអាចប្រគេននៅត្រឹមខ្លោងទ្វារទៅបានហើយ ដោយឃ្លាតពីព្រះសង្ឃ តាអាចារ្យ យាយជី តាជី និងត្រូវពាក់ម៉ាស ប្រើអាល់កុលលាងដៃជាមុន ដើម្បីបង្ការនិងទប់ស្កាត់ការឆ្លងរាលដាលនៃកូវីដ១៩ ៕ សាន សារិន
ចែករំលែកព័តមាននេះ