តាកែវ៖ នៅព្រឹកថៃទី១ ខែសីហា ឆ្នាំ២០២១នេះ លោក កង អាណាន់ អភិបាលក្រុងដូនកែវ សហការជាមួយមន្ទីរធនធានទឹក ការិយាល័យភូមិបាលក្រុង និងមន្ត្រីពាក់ព័ន្ធទាំងអស់ រួមជាមួយនឹងម្ចាស់ដីផ្ទាល់ លោក ហាស់ សូបិន្ត បានពិនិត្យលើការចាក់ដី នៅក្នុងបរិវេណដីនៅជិតប្រឡាយទឹក។ ជាលទ្ធផល អាជ្ញាធរពិនិត្យឃើញថា ការចាក់ដីលើភូមិសាស្ត្រ ក្នុងទីតាំងខាងលើ គឺពុំមានការរំលោភបំពានលើដីប្រឡាយរំដោះទឹកនោះទេ។
អភិបាលស្រុក និងមន្ត្រីពាក់ព័ន្ធចុះពិនិត្យការដ្ឋាននេះ ធ្វើឡើង ក្រោយពីមានការចេញផ្សាយរបស់កោះសន្តិភាព កាលពីល្ងាចថ្ងៃទី៣១ ខែកក្កដា ឆ្នាំ២០២១ អំពីរឿងមានអតីតអភិបាលរងខេត្តកំពត ដែលធ្លាក់ពីតំណែង បានចាក់ដីលុបយកដីបឹង ហើយមិនតែប៉ុណ្ណោះ បានចាក់ដីលុបយកប្រឡាយមេ ដែលរំដោះចេញពីក្រុង យកមកធ្វើកម្មសិទ្ធិ ដែលមានទីតាំង នៅភូមិស្នោ សង្កាត់រកាក្នុង ក្រុងដូនកែវ ខេត្តតាកែវ។
ជាមួយនឹងការចុះពិនិត្យនោះដែរ មន្ត្រីជំនាញធនធានទឹកក្រុង បានអោយដឹងថា ប្រឡាយរំដោះទឹកចេញពីក្រុងនេះ ពីមុនមកមានទំហំតូច គឺមាត់ប្រឡាយមានប្រវែង ៣ម៉ែត្រតែប៉ុណ្ណោះ ហើយក្រោយការចុះត្រួតពិនិត្យ ក្នុងថ្ងៃនេះ គឺការចាក់ដី ក្នុងទីតាំងរបស់ម្ចាស់ដីលើទីតាំងនេះ មិនបានរំលោភលើដីប្រឡាយនោះទេ។
ក្នុងនោះដែរ ស្របតាមការពិនិត្យ និងធ្វើការវាស់វែងដោយមន្ត្រីជំនាញ ភូមិបាលក្រុង និងមន្ត្រីជំនាញនៃមន្ទីរធនធានទឹករួចរាល់ ឃើញថា មិនមានការរំលោភដោយការចាក់ដីយកប្រឡាយនេះទេ។
លោក កង អាណាន់ អភិបាលក្រុងដូនកែវ បានឯកភាព រួមគ្នាជាមួយនឹងមន្ត្រីជំនាញទាំងអស់ និងម្ចាស់ដី ដើម្បីស្តារប្រឡាយចាស់ឡើងវិញ ដោយពង្រីកប្រឡាយទឹកចាស់ អោយមានទំហំធំជាងមុន សម្រួលដល់ការរំដោះទឹកស្អុយចេញពីទីក្រុងដូនកែវ ដើម្បីបញ្ចៀសការជន់លិច។ ប្រឡាយទឹកនេះ នឹងត្រូវពង្រីក ទំហំ ១៤ម៉ែត្របន្ថែម លើប្រឡាយចាស់ ដោយវាស់គិតចេញពីអ័ក្សប្រឡាយចាស់ ដែលមានទំហំតែ ៣ម៉ែត្រប៉ុណ្ណោះ។
លោក កង អាណាន់ អភិបាលក្រុងដូនកែវ បានបន្តទៀតថា ទន្ទឹមនឹងផ្តល់ដី ដើម្បីពង្រីកប្រឡាយទឹក កុំអោយជន់លិចក្រុងរួចមក លោក ហាស់ សុបិន្ត ក៏បានចាក់បេតុង លើផ្លូវប្រវែងជាង ១០០ម៉ែត្រ សម្រាប់ជូនប្រជាពលរដ្ឋ ធ្វើដំណើរទៅមកផងដែរ។
លោកអភិបាលក្រុង បន្តថា ដូច្នេះនៅពេលនេះ ក្រុមការងារចម្រុះ បានពង្រីកប្រឡាយទឹករំដោះទឹកចេញពីក្រុង កុំអោយលិចក្រុង ពេលភ្លៀងធ្លាក់មកម្តងៗ បានធំទូលាយ ដោយចាប់ពីប្រឡាយចាស់ តភ្ជាប់ទៅប្រឡាយលេខ១៥ ប្រវែងជាង ៦០០ម៉ែត្រ ហើយប្រឡាយមេនេះ ក៏បានតភ្ជាប់ទៅដល់កំពុងទូកក្រោម មានប្រវែងជិត ១០០០ម៉ែត្រថែមទៀតផងដែរ។
ជាមួយគ្នានេះដែរ លោក ហាស់ សុបិន្ត ម្ចាស់ដី បានបញ្ជាក់ថា រូបលោក មិនបានរំលោភបំពានលើដីប្រឡាយរបស់រដ្ឋឡើយ។ លោកក៏សូមឯកភាពផ្តល់ដីរបស់ខ្លូន ចេញពីមាត់ប្រឡាយបន្ថែម តាមការឯកភាពរបស់អាជ្ញធរក្រុងដូនកែវ ក្នុងការស្តារប្រឡាយចាស់ឡើងវិញ ដើម្បីពង្រីកប្រឡាយទឹកឲ្យកាន់តែធំ ក្នុងការបញ្ចៀសការជន់លិចក្រុងដូនកែវ នារដូវមានភ្លៀងធ្លាក់ រដូវវស្សានេះ។
មន្ត្រីធនធានទឹក ក្រុងដូនកែវ បានប្រាប់កោះសន្តិភាពថា ចំពោះផ្ទៃដីរបស់លោក ហាស់ សុបិន្ត ជាង ២ហិចតា ដែលកំពុងចាក់ដីលុបនៅពេលនេះ ជាដីរបស់គាត់ ដែលបានទិញយូរមកហើយ និងជាដីអាស្រ័យផល សម្រាប់ធ្វើស្រែ ដោយមិនមានប្លង់រឹង ហើយចំពោះរឿងចាក់ដីលុបនេះ ក៏មិនមានច្បាប់ដែរ គឺគ្រាន់តែត្រូវគ្នា ជាមួយថ្នាក់លើ ជាការស្រេច។
មន្ត្រីធនធានទឹកដដែល បានបញ្ជាក់ថា ចំពោះដីអាស្រ័យផល បើចង់ចាក់ដី កែមកដីលំនៅដ្ឋានវិញនោះ ទាល់តែមានច្បាប់ត្រឹមត្រូវ ទើបអាចដំណើរការចាក់ដីលុប ធ្វើសំណង់រឹងបាន៕ សេង សុធា
ចែករំលែកព័តមាននេះ