ខេត្តកំពត៖ រដ្ឋបាលខេត្តកំពត បានចេញសេចក្ដីប្រកាសជាផ្លូវការ កាលពីថ្ងៃទី២៩ ខែកក្កដា ឆ្នាំ២០២១ សម្រេចបិទខ្ទប់ផ្សារកំពង់ត្រាចជាបណ្ដោះអាសន្ន ចាប់ពីថ្ងៃទី៣០ ខែកក្កដា ឆ្នាំ២០២០១ រហូតដល់ថ្ងៃទី៥ ខែសីហា ឆ្នាំ២០២១។ ការសម្រេចបិទខ្ទប់ផ្សារកំពង់ត្រាចនេះ បន្ទាប់ពីក្រុមអាជីវករ ក្នុងផ្សារ រកឃើញវិជ្ជមានកូវីដ។
ទោះបីអាជ្ញាធរស្រុកកំពង់ត្រាច បានដាក់ប៉ាស់បិទផ្លូវយ៉ាងណាក៏ដោយ ក៏ក្រុមអាជីវករ ដែលមានផ្ទះនៅជុំវិញផ្សារ បានបើកទ្វារលក់វិញនៅព្រឹកថ្ងៃទី១ ខែសីហា។ តែអាជ្ញាធរ បានណែនាំម្ដងទៀត កុំអោយបើកទ្វារលក់បែបនេះ។
លោក ជួន សុភា អភិបាលរងស្រុកកំពង់ត្រាច រួមដំណើរដោយលោក ហាញ់ គារ អធិការរងនគរបាលស្រុកកំពង់ត្រាចបានប្រាប់អាជីវករថា ការបិទខ្ទប់នេះ គឺមិនអោយមានមនុស្សដើរចេញចូល នៅក្នុងផ្សារកំពង់ត្រាច តាមគោលការណ៍អនុវត្តជាក់ស្ដែង។
លោក ជួន សុភា អភិបាលរងស្រុក បានស្នើសូមអោយក្រុមអាជីវករ មានការយោគយល់ ដល់អាជ្ញាធរខេត្តស្រុក ដែលហាមឃាត់ មិនអោយលក់ដូរ ហើយបងប្អូន នៅតែបើកទ្វារបន្តលក់ដូរ ធ្វើអោយអាជ្ញាធរ មានការពិបាកត្រួតពិនិត្យ។
ក្រុមអាជីវករ នៅផ្សារកំពង់ត្រាច មានចំនួន ១៧នាក់ វិជ្ជមានកូវីដ កំពង់សម្រាកព្យាបាលនៅមណ្ឌលវិឡាល័យព្រះបិតាជាតិ។
យ៉ាងណាក៏ដោយ បន្ទាប់ពីការបិទខ្ទប់ផ្សារកំពង់ត្រាច ស្រាប់តែនៅបព្រឹកថ្ងៃទី១ ខែសីហានេះ ក្រុមអាជីវករជាច្រើននាក់ បានចេញទៅលក់ ក្នុងបេនឡានចាស់ ដែលស្ថតិនៅខាងកើតអធិការដ្ឋាននគរបាលស្រុកកំពង់ត្រាច។ ការបិទផ្សារកំពង់ត្រាច ព្រោះតែទប់ស្កាត់នូវការឆ្លងជំងឺកូវីដ១៩។ តែបែរជានាំគ្នា មកលក់ពពាក់ពពូន នៅបេនឡានដូច្នេះ តើការបិទខ្ទប់ផ្សារនោះ មានន័យអី្វ?
យ៉ាងណាក៏ដោយ អាជីវករលក់ដូរផ្សារកំពង់ត្រាចម្នាក់ ឈ្មោះ ចែយិ អាយុ ៥៦ឆ្នាំ និយាយថា គាត់មានការព្រួយបារម្ភ ខ្លាចឆ្លងជំងឺកូវីដរាលដាលបន្ត។ តែបើមិនលក់ មិនដឹងបានលុយឯណា សងប្រាក់បំណុលធនាគារទេ។
លោក ជួន សុភា អភិបាលរងស្រុកកំពង់ត្រាច បាននិយាយថា ពាក់ព័ន្ធនឹងជីវភាពប្រចាំថ្ងៃរបស់ពលរដ្ឋ យើងបានការយោគយល់ ហើយអោយពួកគាត់អង្គុយលក់ដូរឃ្លាតឆ្ងាយពីគ្នារវាងអ្នកទិញ និងអ្នកលក់ និងអោយពួកគាត់ពាក់ម៉ាស់ទាំងអស់ ទាំងអ្នកទិញ និងទាំងអ្នកលក់ ដោយគោរពតាមគោលការណ៍របស់ក្រសួងសុខាភិបាល និងប្រមុខរាជរដ្ឋាភិបាល បីកុំ និងបីការពារ៕ កែវ ឆា
ចែករំលែកព័តមាននេះ