រដ្ឋបាលរាជធានីភ្នំពេញ សម្រេចដាក់ចេញវិធានការរដ្ឋបាលសម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ រយៈពេល២សប្តាហ៍ គិតចាប់ពីថ្ងៃទី
រាជធានីភ្នំពេញ ៖ រដ្ឋបាលរាជធានីភ្នំពេញ សម្រេចដាក់ចេញវិធានការរដ្ឋបាលសម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ រយៈពេល២សប្តាហ៍ គិតចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា ឆ្នាំ២០២១នេះ។
ជាក់ស្តែងនៅយប់ថ្ងៃទី៣១ ខែកក្កដា ឆ្នាំ២០២១នេះ ជាយប់ទី២ហើយ ដែលរាជរដ្ឋាភិបាលកម្ពុជា សម្រេចបន្តដាក់បម្រាមគោចរ រយៈពេល២សប្តាហ៍ ដើម្បីទប់ស្កាត់ការរីករាលដាលនៃជំងឺកូវីដ-១៩ ប៉ុន្តែនៅតែបន្តមានបងប្អូនប្រជាពលរដ្ឋមួយចំនួនតូច នៅតែធ្វើដំណើចេញចូលរាជធានី តាមបណ្តាផ្លូវនានា ក្នុងអំឡុងម៉ោងដែលរាជរដ្ឋាភិបាល ដាក់អនុវត្តបម្រាមគោចរ មិនឱ្យធ្វើដំណើរបើគ្មានការចាំបាច់ និងប្រកបអាជិវកម្មលក់ដូរផ្សេងៗ ចាប់ពីម៉ោង ២១ និង ០០នាទីយប់ រហូតដល់ម៉ោង ៣ និង ០០នាទីទៀបភ្លឺ។
ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ លោកក៏បានចុះត្រួតពិនិត្យគោលដៅអនុវត្តបម្រាមគោរចរ ត្រង់ចំណុចរង្វង់មូលកងព្រហ្មផងដែរ រួមទាំងគោលដៅផ្សេងៗទៀតក្នុងភូមិសាស្ត្ររាជធានីភ្នំពេញ ដើម្បីអនុវត្តវិធានការនេះ ឱ្យបានល្អក្នុងការទប់ស្តាត់នៃជំងឺកូវីដ១៩នេះ។
ក្នុងនោះផងដែរ កម្លាំងសមត្ថកិច្ចអនុវត្តគោលដៅត្រង់ចំណុចរង្វង់មូលកងព្រហ្ម ក្នុងសង្កាត់ជ្រោយចង្វារ បានធ្វើការឃាត់ម៉ូតូចំនួន៦គ្រឿង ម៉ូតូកង់បីចំនួន៣គ្រឿង ព្រមទាំងរថយន្ត៥គ្រឿងផងដែរ ដែលពួកគាត់ធ្វើដំណើល្មើសនឹងបម្រាមគោចរ។
ហើយចំពោះរថយន្តទាំង៥គ្រឿងដែលសមត្ថកិច្ចឃាត់នោះ មាន២គ្រឿងបានបង់ពិន័យនៅនឹងកន្លែង រួចគាត់ក៏ចេញទៅ ចំណែក៣គ្រឿង ព្រមទាំងម៉ូតូ៦គ្រឿង និងម៉ូតូកង់បី ត្រូវឃាត់យកទៅរក្សាទុកនៅសាលាខណ្ឌជ្រោយចង្វារ ដើម្បីអោយពួកគាត់នៅស្អែកយកលុយមកបង់ផាកពិន័យទៅតាមច្បាប់ផងដែរ។
លោកវរសេនីយ៍ឯក សៀម សុត្ថាវុធ អធិការនគរបាលខណ្ឌជ្រោយចង្វារ មានប្រសាសថា រាល់បុគ្គលណាដែលល្មើសនៅនឹងបម្រាមគោចរ ចាប់ពីពីម៉ោង ៩ រហូតដល់ម៉ោង៣ទៀបភ្លឺដែលគ្មានភាពចាំបាច់ ឬគ្មានលិខិតបញ្ជាក់ច្បាស់លាស់ ដែលទទួលស្គាល់ពីអាជ្ញាធរទេនោះ ត្រូវធ្វើការផាកពិន័យដោយគ្មានភាពលើកលែង ដោយម៉ូតូពិន័យជាទឹកប្រាក់ចំនួន២០ម៉ឺនរៀល ម៉ូតូកង់បីឥណ្ឌាពពិន័យជាទឹកប្រាក់ចំនួន២០ម៉ឺនរៀល ចំណែករថយន្តពិន័យជាទឹកប្រាក់នៅកន្លែងចំនួន១លានរៀល៕
ចែករំលែកព័តមាននេះ