យោងតាមប្រភពព័ត៌មានចិន Global Times បានឱ្យដឹងថា លោក Yang Xiaoming អគ្គនាយករបស់ក្រុមហ៊ុន Sinopharm China National Biotec Group ដែលជាក្រុមហ៊ុនបុត្រសម្ព័ន្ធរបស់ Sinopharm បានប្រាប់សារព័ត៌មាន Global Times កាលពីថ្ងៃព្រហស្បតិ៍ថា ក្រុមហ៊ុនកំពុងធ្វើការធ្វើតេស្តលើវីរុសកូវីតបម្លែងថ្មី ប្រភេទ Delta ជាមួយសេរ៉ូមឈាមរបស់អ្នកទទួលវ៉ាក់សាំង Sinopharm។

លោក Yang បាននិយាយថា បច្ចុប្បន្នវ៉ាក់សាំងរបស់ Sinopharm នៅតែមានប្រសិទ្ធភាពក្នុងការការពារអ្នកដែលបានចាក់រួចពីវីរុសកូវីដដែលកំពុងវាយលុកលើពិភពលោកយើងនេះ ជាពិសេសគឺប្រភេទដែលមានច្រើនជាងគេ។ លោក Yang បានពន្យល់ថា គ្មានវ៉ាក់សាំង COVID-19 នៅលើពិភពលោកណា ដែលអាចធានាការការពារ ១០០% ប្រឆាំងនឹងការឆ្លងទេ។ ប្រសិទ្ធភាពនៃវ៉ាក់សាំង គឺគេគិតទៅលើលក្ខណៈវិនិច្ឆ័យផ្សេងៗគ្នា ដែលក្នុងនោះមានការការពារមិនឱ្យស្លាប់ និង ការពារមិនឱ្យឈឺធ្ងន់។

នៅពេលនិយាយពីវ៉ាក់សាំងរបស់ Sinopharm លោក Yang បានកត់សម្គាល់ថា លទ្ធផលនៃដំណាក់កាលទាំងបីនៃការសាកល្បងព្យាបាលនិងការប្រើប្រាស់របស់វាទៅលើប្រជាជនមួយចំនួនធំ បានបង្ហាញថាវាមានប្រសិទ្ធភាពនិងមានសុវត្ថិភាព។

ជាចុងក្រោយ លោក Yang បានបង្ហើបថា ទិន្នន័យដែលបានមកពីការសិក្សាដោយ Sinovac  នៅប្រទេសឈីលីបានបង្ហាញថា វ៉ាក់សាំង Sinovac ដែលជាវ៉ាក់សាំងចិនដូច Sinopharmដែរនោះ អាចផ្តល់ការការពារប្រកបដោយប្រសិទ្ធភាពប្រឆាំងនឹងកូវីដបម្លែងប្រភេទ Gamma ។ លោកបានកត់សម្គាល់ថា ការសិក្សារបស់ក្រុមហ៊ុនលោកលើប្រសិទ្ធភាពវ៉ាក់សាំងលើប្រភេទ ​Delta ក៏នឹងមានលទ្ធផលស្រដៀងគ្នាដែរ៕