ប្រទេសចិន ៖ អាជ្ញាធរចិនរាយការណ៍កាលពីថ្ងៃទី២៩ ខែកក្កដា ថា វីរុសកូវីដ-១៩បំប្លែងខ្លួនប្រភេទDELTA ពេលនេះកំពុងតែឆ្លងរាលដាល ក្នុងខេត្តជាច្រើនរបស់ចិន ក្នុងនោះក៏មានក្រុងប៉េកាំងផងដែរ។
ចិនដែលកូវីដ-១៩ ត្រូវបានរកឃើញមុនគេ កាលពីដំណាច់ឆ្នាំ២០១៩នោះ អាចខ្ទប់បានការឆ្លងស្ទើរទាំងស្រុង ចាប់តាំងពីរដូវផ្លារីកឆ្នាំ២០២០មក។ ក៏ប៉ុន្តែការឆ្លងថ្មីចុងក្រោយត្រូវបានរកឃើញនៅក្រុងណានគីន កាលពីថ្ងៃទី២០កក្កដា ហើយពេលនេះកំពុងតែឆ្លងរាលដាលយ៉ាងលឿនក្នុងប្រទេស។ ការឆ្លងរកឃើញដំបូងលើនិយោជិតព្រលានយន្តហោះក្រុងណានគីន៩នាក់នោះ ពេលនេះឆ្លងរាលដាលដល់មនុស្ស១៧១នាក់ ក្នុងខេត្តជាំងស៊ូជាប់ក្រុងសៀងហៃ និងខេត្តយ៉ាងតិច៤ទៀត។ ទោះបីយ៉ាងណាភាគច្រើននៃអ្នកឆ្លងថ្មីសុទ្ធតែបានចាក់វ៉ាក់សាំងការពាររួច តែអាជ្ញាធរខេត្តជាំងស៊ូ មានការបារម្ភ្ចំពោះប្រសិទ្ធភាពនៃបណ្ដាវ៉ាក់សាំងចិន ប្រឆាំងវីរុសប្រភេទDELTA។
ប្រទេសចិនជាប្រទេសមានប្រជាជនច្រើនជាងគេបំផុតនៃពិភពលោក បានចាក់វ៉ាក់សាំងដល់ប្រជាជនបានជាង១,៦ពាន់លានដូសរួចហើយជាមួយវ៉ាក់សាំងចិនសុទ្ធ តែមិនបញ្ជាក់ថា តើមនុស្សប៉ុន្មាននាក់ ដែលចាក់បាន២ដូសរួចរាល់នោះឡើយ? ទិសដៅគឺចាក់វ៉ាក់សាំងឲ្យបានគ្រប់ដូស ដល់ប្រជាជនឲ្យបាន៦៥% ក្នុងចំណោមប្រជាជនចិន១,៤ពាន់លាននាក់ មុនដំណាច់ឆ្នាំនេះ។
ចិនប្រឈមមុខនឹងការឆ្លងមកពីប្រទេសមីយ៉ាន់ម៉ា ជាប់ជិតខាង ដែលគំរាមកំហែងដល់នយោបាយអនុគ្រោះសូន្យចំពោះវីរុស។ក្នុងខេត្តជាំងស៊ូ អាជ្ញាធរបានបិទខ្ទប់មនុស្សច្រើនរយពាន់នាក់។ បណ្ដាហាងកាហ្វេ កន្លែងហាត់កីឡា បណ្ដារោងភាពយន្ត ខារ៉ាអូខេរហូតដល់បណ្ណាល័យនៅក្រុងណានគីន ត្រូវបិទទ្វារ។ ទីក្រុងនោះបានធ្វើតេស្ត២លើករួចហើយ ក្នុងចំណោមប្រជាជនជាង៩,២លាននាក់ និងធ្វើយុទ្ធនាការធ្វើតេស្តលើកទី៣ ចាប់ពីថ្ងៃទី២៨កក្កដាទៅ។
ខេត្តស៊ីឈួន ជាខេត្តមានប្រជាជនច្រើនជាងគេរបស់ចិន រាយការណ៍ពីអ្នកឆ្លង៣នាក់នាថ្ងៃទី២៩កក្កដា ចំណែកក្រុងប៉េកាំងមានអ្នកឆ្លង២នាក់ ជាលើកដំបូងចាប់តាំងពី៦ខែមកហើយក្នុងរដ្ឋធានី៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ