ព្រះសីហនុ៖ នគរបាល បញ្ជូនជនសង្ស័យ ៧នាក់ ទៅសាលាដំបូងខេត្ត ផ្តន្ទាទោស ពីបទចោរកម្ម លួចប្រអប់ត្រង់ហ្វូភ្លើង ខ្សែស្ពាន់ភ្លើងអគ្គិសនី និងទទួលទិញផលចោរកម្ម នៅក្រុងព្រះសីហនុ។
ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុ កម្លាំងអធិការដ្ឋាននគរបាលក្រុងព្រះសីហនុ បង្ក្រាបបានករណីចោរកម្ម (លួចកាត់ខ្សែភ្លើង និងត្រង់ហ្វូភ្លើង) ឃាត់ខ្លួនជនសង្ស័យចំនួន ៧នាក់។ ក្នុងនោះ ៦នាក់ ពាក់ព័ន្ធនឹងសកម្មភាពលួចដោយផ្ទាល់ និងម្នាក់ទៀត ពាក់ព័ន្ធនឹងទទួលទិញផលចោរកម្ម។
របាយការណ៍នគរបាលក្រុងព្រះសីហនុ ឲ្យដឹងថា កាលពីពាក់កណ្តាលអាធ្រាត្រ ថ្ងៃទី២៦ ខែកក្កដា ឆ្នាំ២០២១ នៅចំណុចមុខបុរីគុជអាស៊ី ស្ថិតក្នុងក្រុមទី១៤ ភូមិ១ សង្កាត់៣ ក្រុងព្រះសីហនុ កម្លាំងជំនាញអធិការដ្ឋាននគរបាលក្រុងព្រះសីហនុ សហការជាមួយកម្លាំងប៉ុស្តិ៍នគរបាលរដ្ឋបាល សង្កាត់លេខ៣ បានឃាត់ខ្លួនជនសង្ស័យ ចំនួន ០៧នាក់ ពីបទចោរកម្មលួចប្រអប់ត្រង់ហ្វូភ្លើង ខ្សែស្ពាន់ភ្លើងអគ្គិសនី និងទទួលទិញផលចោរកម្ម ដែលមានឈ្មោះ ដូចខាងក្រោម៖
១. ឈ្មោះ ពេជ្រ រាជ្យ ភេទប្រុស អាយុ ២៧ឆ្នាំ មុខរបរកម្មករសំណង់ មានទីលំនៅភូមិអូរត្រេះ ឃុំស្ទឹងហាវ ស្រុកស្ទឹងហាវ ខេត្តព្រះសីហនុ។ ជននេះ ជាមេខ្លោង។
២. ឈ្មោះ ពេជ្រ ចាន់ ភេទប្រុស អាយុ ២៤ឆ្នាំ មុខរបរជាងភ្លើង មានទីលំនៅភូមិអូរត្រេះ ឃុំអូរត្រេះ ស្រុកស្ទឹងហាវ ខេត្តព្រះសីហនុ។ ជននេះ ក៏ជាមេខ្លោងដែរ។
៣. ឈ្មោះ ង៉ែត ណារិទ្ធ ភេទប្រុស អាយុ ៣៤ឆ្នាំ មុខរបរមិនពិតប្រាកដ មានទីលំនៅភូមិ៣ សង្កាត់២ ក្រុងព្រះសីហនុ ជាអ្នកចូលរួមលួច ឬសហចារី។
៤. ឈ្មោះ ឈិន ចំរើន ភេទប្រុស អាយុ ២៤ឆ្នាំ មុខរបរកម្មករសំណង់ មានទីលំនៅមិនពិតប្រាកដ (សហចារី)។
៥. ឈ្មោះ ផល លាភ ភេទប្រុស អាយុ ២៤ឆ្នាំ មុខរបរកម្មករសំណង់ មានទីលំនៅមិនពិតប្រាកដ (សហចារី)។
៦. ឈ្មោះ មៀច ភ័ក្ត្រ ភេទប្រុស អាយុ ៤១ឆ្នាំ មុខរបររើសអេតចាយ មានទីលំនៅមិនពិតប្រាកដ (សហចារី)។
៧. ឈ្មោះ ឡុង ហេងយូ ភេទប្រុស អាយុ ៤០ឆ្នាំ មុខរបរទិញនិងលក់អេតចាយ មានទីលំនៅក្រុមទី៣១ ភូមិ៣ សង្កាត់៣ ក្រុងព្រះសីហនុ (អ្នកទទួលផលចោរកម្ម)។
វត្ថុតាងដកហូតបាន រួមមាន៖ ត្រង់ហ្វូភ្លើង ០១គ្រឿង (ផលនៃអំពើលួច) ខ្សែស្ពាន់រុំត្រង់ហ្វូចំនួន ១១បាវ ទម្ងន់ ៣៧៨គីឡូក្រាម (ផលនៃអំពើលួច) ម៉ូតូ ០១គ្រឿង (មធ្យោបាយដឹកជញ្ជូន) ឧបករណ៍សម្ភារៈសម្រាប់កាត់ខ្សែភ្លើង មួយចំនួនធំ។
ជនសង្ស័យ និងវត្ថុតាងខាងលើ ត្រូវបានកម្លាំងជំនាញ កសាងសំណុំរឿង បញ្ជូនទៅកាន់សាលាដំបូងខេត្ត ដើម្បីផ្តន្ទាទោសតាមច្បាប់៕
ចែករំលែកព័តមាននេះ