រាជធានភ្នំពេញ ៖ សាលាដំបូងរាជធានីភ្នំពេញ នារសៀលថ្ងៃទី២៩ ខែកក្កដា ឆ្នាំ២០២១ បានប្រកាសសាលក្រម ផ្តន្ទាទោស លើសំណុំរឿងព្រហ្មទណ្ឌមួយ ដែលជាបទល្មើសឧក្រិដ្ឋ…
រាជធានភ្នំពេញ ៖ សាលាដំបូងរាជធានីភ្នំពេញ នារសៀលថ្ងៃទី២៩ ខែកក្កដា ឆ្នាំ២០២១ បានប្រកាសសាលក្រម ផ្តន្ទាទោស លើ
សំណុំរឿងព្រហ្មទណ្ឌមួយ ដែលជាបទល្មើសឧក្រិដ្ឋ គឺបុរសអារ.កសម្លា.ប់ស្ត្រីស្នេហ៍ ជាអ្នកលក់ផលិតផល(ឡេ)អនឡាញ ដាក់ពន្ធនាគារ កំណត់១០ឆ្នាំ និងសំណងរដ្ឋប្បវេណី លើទឹកប្រាក់២០០លានរៀល ក្រោមការចោទប្រកាន់ ពីបទឃា.តកម្ម តាមមាត្រា១៩៩ នៃក្រមព្រហ្មទណ្ឌ ។
ជនជាប់ចោទមានឈ្មោះ ឯក ឌៀមវន្ថា ភេទប្រុស អាយុ៤៧ឆ្នាំ មុខរបរ រកស៊ីទិញលក់អចលនាទ្រព្យ មានទីលំនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ សាលក្រមបានប្រកាសធ្វើឡើងជាសាធារណៈ ដោយទុកពេលឲ្យភាគីណាមួយមិនសុខចិត្ត ចំពោះការកាត់ក្តីនេះ ប្តឹងឧទ្ធរណ៍តាមកំណត់ច្បាប់ ។
សូមរម្លឹកថា កាលវេលាម៉ោង៥ និង៣០នាទីល្ងាច ថ្ងៃទី៣ ខែកញ្ញា ឆ្នាំ២០២០ មានករណីអំពើឃា.តកម្មមួយបានកើតឡើងនៅក្នុងបុរី លឹម ឈាងហាក់ ភូមិម័រ សង្កាត់ដង្កោ ខណ្ឌដង្កោ រាជធានីភ្នំពេញ បង្កដោយជនជាប់ចោទឈ្មោះ ឯក ឌៀមវន្ថា បានអារ.ក និងចាក់សម្លា.ប់ជនរងគ្រោះ ឈ្មោះ វង្ស ម៉ាលីដា ភេទស្រី អាយុ២៧ឆ្នាំ មុខរបរ ជាអ្នកលក់ផលិតផលតាម Online បណ្តាលឲ្យស្លា.ប់ នៅក្នុងបុរី ។
បន្ទាប់មក ជនជាដៃដល់បានអារ.កសម្លាប់ខ្លួនឯងតាមក្រោយ ប៉ុន្ដែមិនបានសម្រេច គ្រាន់តែរងរបួសធ្ងន់ ត្រូវបញ្ជូនទៅសង្គ្រោះភ្លាមៗ នៅមន្ទីពេទ្យឯកជន ។ ក្រោយមកជនសង្ស័យ បានជាសះស្បើយនូវមុខរបួស ទើបត្រូវបានតុលាការ ចេញដីកាសម្រេចឲ្យឃុំខ្លួនដាក់ពន្ធនាគារជាបណ្តោះអាសន្ន ចាប់ពីពេលនោះ រហូតមកដល់ថ្ងៃទី៦ ខែកក្កដា ឆ្នាំ២០២១ សំណុំរឿងឃា.តកម្មមួយនេះ ត្រូវបានតុលាការលើកយកមកបើកកសវនាការ ជំនុំជម្រះទោស ប៉ុន្តែសវនាករនោះ ត្រូវបានចៅក្រមជំនុំជម្រះលើកពេលប្រកាសសាលក្រមនៅរសៀលថ្ងៃទី២៩ ខែកក្កដានេះ ។
អង្គហេតុសំណុំរឿងឃាតកម្មនោះ ជនជាប់ចោទឈ្មោះ ឯក ឌៀមវន្ថា បានឆ្លើយសារភាព នៅចំពោះមុខតុលាការថា មុនកើតហេតុខ្លួន និងជនរងគ្រោះ បានផឹកស៊ី ជាមួយមិត្តភក្តិ និងសាច់ញាតិ មានគ្នាប្រមាណបួនប្រាំនាក់ ខណៈពេលនោះ ក៏ស្រវឹងរៀងៗខ្លួន ហើយក៏បានទាស់ពាក្យសម្តីដាក់គ្នា ទៅវិញទៅមក ដោយសារខ្លួន ស្រឡាញ់ជនរងគ្រោះខ្លាំងពេក ក៏កើតចិត្តប្រចណ្ឌ ធ្វើឲ្យស្រីស្នេហ៍ខឹង ក៏យកកាំបិតមកចាក់ខ្លួនមុន ទើបខ្លួន ក៏បានចាក់ទៅជនរងគ្រោះវិញដែរ តែមិនមានចេតនាសម្លា.ប់ជនរងគ្រោះទេ ។ ពេលនោះ ដោយឃើញស្ថានភាពនាងរបួសធ្ងន់ និងមានឈាមហូរច្រើន នៅលើឥដ្ឋ ខ្លួនក៏បានយកកាំបិត មកអារ.កសម្លាប់ខ្លួនឯង តាមក្រោយ តែពេលនោះ បានគេជួយសង្គ្រោះទាន់ទើបមិនស្លា.ប់ លុះពេលរបួសបានធូរស្រាល ក៏ត្រូវសមត្ថកិច្ចនាំខ្លួនទៅតុលាការ ដាក់គុកចាប់ពីពេលនោះមក ៕
ចែករំលែកព័តមាននេះ