ជនសង្ស័យម្នាក់ ក្នុងចំណោមបក្ខពួកពីរនាក់ ត្រូវបានសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ សហការជាមួយសមត្ថកិច្ចខណ្ឌចំការមន ឡោមព័ទ្ធចាប់ឃាត់ខ្លួន បន្ទាប់ពីធ្វើសកម្មភាព
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ ក្នុងចំណោមបក្ខពួកពីរនាក់ ត្រូវបានសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ សហការជាមួយសមត្ថកិច្ចខណ្ឌចំការមន ឡោមព័ទ្ធចាប់ឃាត់ខ្លួន បន្ទាប់ពីធ្វើសកម្មភាពឆក់ទូរស័ព្ទដៃស៊េរីទំនើបមួយគ្រឿងពីនារីម្នាក់បានសម្រេច រួចបាននាំគ្នាជិះរត់គេចទៅសង្ងំលាក់ខ្លួននៅក្នុងបន្ទប់ជួលមួយកន្លែង បង្កឲ្យមានការភ្ញាក់ផ្អើលឡើងកាលពីវេលាម៉ោង៨និង២០នាទីយប់ ថ្ងៃទី២៨ ខែកក្កដា ឆ្នាំ២០២១ ត្រង់ចំណុចបន្ទប់ជួលគ្មានលេខ ផ្លូវលំ សង្កាត់ស្ទឹងមានជ័យទី១ ខណ្ឌមានជ័យ។
តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា ជនសង្ស័យដែលចាប់ឃាត់ខ្លួនខាងលើមានឈ្មោះ មឿង សុធា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅបន្ទប់ជួលកើតហេតុ (ជាអ្នកបិទគូទ)។ ចំណែកឯបក្ខពួកម្នាក់ទៀតដែលរត់គេចខ្លួនមានឈ្មោះ ឧត្ដម ភេទប្រុស មុខរបរមិនពិតប្រាកដ ស្នាក់នៅជាមួយគ្នា (ជាអ្នកធ្វើសកម្មភាព) ។ ក្រោយពេលឃាត់ខ្លួនសមត្ថកិច្ចដកហូតបានម៉ូតូជិះធ្វើសកម្មភាពបានចំនួន២គ្រឿង ដោយមួយគ្រឿងម៉ាកហុងដាស្កុបភីក្លឹប ពណ៌ស ពាក់ស្លាកលេខ ភ្នំពេញ1IR-4555 និងមួយគ្រឿងទៀតម៉ាកហុងដាស្កុបភី ស៊េរីឆ្នាំ២០២១ ពណ៌ខ្មៅបិទតែមលាយស ពាក់ស្លាកលេខ ភ្នំពេញ1IC-8674។
ប្រភពដដែលបន្តថា នៅមុនពេលកើតហេតុ ជនសង្ស័យ រួមជាមួយបក្ខពួកម្នាក់ទៀតបានជិះម៉ូតូទាំងពីរគ្រឿង និងបានធ្វើសកម្មភាពឆក់ទូរស័ព្ទដៃមួយគ្រឿងម៉ាកអាយហ្វូន11 ពីដៃនារីជាជនរងគ្រោះម្នាក់សូមមិនបញ្ចេញឈ្មោះ ខណៈពេលដែលនាងកំពុងតែអង្គុយនៅលើម៉ូតូកង់បីមួយគ្រឿង នៅត្រង់ចំណុចក្បែរស្ថានីយ៍ប្រេងឥន្ធនៈភីធីធី តាមបណ្ដោយផ្លូវ៤៣០ ក្នុងសង្កាត់ទួលទំពូងទី២ ខណ្ឌចំការមន។ បន្ទាប់ពីធ្វើសកម្មភាពឆក់ទូរស័ព្ទដៃបានសម្រេចរួច ជនសង្ស័យ និងបក្ខពួកបាននាំគ្នាជិះម៉ូតូរត់គេចខ្លួនបាត់ស្រមោលតែម្ដង។
ប្រភពដដែលបន្តទៀតថា ភ្លាមៗនោះ នារីរងគ្រោះក៏ទំនាក់ទំនងប្រាប់បងប្រុសរបស់នាង ពេលនោះបងប្រុសរបស់នារីរងគ្រោះក៏បានយកទូរស័ព្ទដៃរបស់ខ្លួនមកបើកមើលកម្មវិធី (Zanly) ដែលជាកម្មវិធីទំនាក់ទំនងប្រាប់ពីផែនទី ដោយសារតែបងប្រុសរបស់នារីរងគ្រោះបានធ្វើការភ្ជាប់ទំនាក់ទំនងជាមួយនឹងទូរស័ព្ទដៃ ដែលត្រូវជនសង្ស័យឆក់យកទៅ។ រហូតបានឃើញពីទីតាំងលាក់ខ្លួនរបស់ជនសង្ស័យ រួច បងប្រុសជនរងគ្រោះក៏ប្រញាប់រាយការណ៍ជូនសមត្ថកិច្ចមូលដ្ឋានឲ្យចុះមកជួយធ្វើការអន្តរាគមន៍តែម្តង។
បន្ទាប់មកកម្លាំងសមត្ថកិច្ចខណ្ឌចំការមន ក៏បានធ្វើការសហការជាមួយនឹងកម្លាំងសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ ចុះឡោមព័ទ្ធត្រង់ចំណុចកើតហេតុ និងបានធ្វើការឃាត់ខ្លួនជនសង្ស័យខាងលើ ចំណែកឯបក្ខពួកម្នាក់ទៀតបានយកទូរស័ព្ទដៃរបស់នារីរងគ្រោះរត់គេចខ្លួនបាត់ស្រមោលភ្លាមៗតែម្ដង។
បច្ចុប្បន្នជនសង្ស័យ រួមទាំងវត្ថុតាំង ត្រូវបានសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ ប្រគល់ទៅឲ្យសមត្ថកិច្ចខណ្ឌចំការមន នាំយកទៅធ្វើការសាកសួរនៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូនទៅតុលាការរង់ចាំចាត់ការទៅតាមនីតិវិធី ៕
ចែករំលែកព័តមាននេះ