រាជធានីភ្នំពេញ ៖ «ពន្ធនាគារគឺជាកន្លែងឃុំឃាំងកែប្រែអប់រំអ្នកទោសឲ្យក្លាយជាមនុស្សល្អវិញ ពុំមែនជាកន្លែងធ្វើទារុណកម្មខុសនីតិវិធីឡើយ » ។ លោកនុត សាអាន រដ្ឋលេខាធិការក្រសួងមហាផ្ទៃមានប្រសាសន៍បែបនេះក្នុងពិធីប្រកាស និងតែងតាំងប្រធានពន្ធនាគាររាជធានីភ្នំពេញ នៅសាលារាជធានីភ្នំពេញ កាលពីព្រឹកថ្ងៃទី២៤ ធ្នូ ដោយមានការចូលរួមពីមន្ត្រីរាជការក្រោមឱវាទក្រសួងមហាផ្ទៃ និងសាលារាជធានី ជាច្រើនរូប ។
ក្នុងពិធីនោះបានប្រកាស និងតែងតាំង លោកឧត្តមអគ្គានុរក្សថ្នាក់លេខ២ ភិន យ៉ាន ពីប្រធានពន្ធនាគារខេត្តឧត្តរមានជ័យ ទៅជាប្រធានមណ្ឌលអប់រំកែប្រែទី៣ ជំនួសលោក គៀង សុវណ្ណ ឧត្តមអគ្គានុរក្សថ្នាក់លេខ៣ លោកហ៊ូ ពុធវិសាល ពីប្រធានពន្ធនាគាររាជធានីភ្នំពេញ (ប៉េហ្ស៊ី) ទៅជាអនុប្រធាននាយកដ្ឋានអប់រំកែប្រែ លោកឧត្តមអគ្គានុរក្សថ្នាក់លេខ២ ពេជ្រ យ៉ុន ពីអនុប្រធាននាយកដ្ឋានមធ្យោបាយ ទៅជាប្រធានពន្ធនាគាររាជធានីភ្នំពេញ ជំនួសលោកហ៊ូ ពុធវិសាល ។
លោកនុត សាអាន មានប្រសាសន៍ថា មន្ត្រីពន្ធនាគារត្រូវអនុវត្តការអប់រំស្តារនីតិសម្បទាជនជាប់ឃុំឲ្យបានល្អប្រសើរ ហើយជៀសវាងឲ្យបាននូវអំពើខុសឆ្គង បើពុំដូច្នោះទេនឹងប្រឈមការដាក់ទណ្ឌកម្មវិន័យ រួមជាមួយការផ្តន្ទាទោសទៅតាមច្បាប់ដែលបានកំណត់ ។ បច្ចុប្បន្នអ្នកជាប់ឃុំក្នុងពន្ធនាគារ កំពុងមានស្ថានរស់នៅល្អជា បណ្តើរៗហើយ ដូចជាការហូបចុក ស្នាក់នៅ និងការផ្តល់ជំនាញវិជ្ជាជីវៈដើម្បីឲ្យពួកគេធ្វើសមាហរណកម្មទៅលំនៅដ្ឋានវិញក្លាយជាមនុស្សល្អក្នុងសង្គមជាមួយនឹងជំនាញដែលអាចស្វែងរកប្រាក់ចំណូលប្រចាំជីវិតបាន ។ ផែនការចំពោះមុខក្រសួងមហាផ្ទៃ និងសាលារាជធានីភ្នំពេញ ស្វែងរកទីតាំងថ្មីបង្កើតជាពន្ធនាគារសម្រាប់រាជធានីភ្នំពេញ ខណៈដែលពន្ធនាគារបច្ចុប្បន្ន ស្ថិតក្នុងស្នងការដ្ឋាននគរបាលរាជធានីភ្នំពេញ ជាកន្លែងតូចចង្អៀត ខុសស្តង់ដាពិបាកផ្ទុកអ្នកជាប់ឃុំ ។ ពន្ធនាគារដែលសាងសង់កាលពីឆ្នាំ១៩៧៩ នៅក្នុងខែត្តស្ទឹងត្រែង រតនគីរី មណ្ឌលគីរី តាកែវ និងខេត្តព្រះសីហនុដែលត្រូវកែប្រែឡើងវិញឲ្យស្របតាមស្តង់ផងដែរ ។
លោកឃួង ស្រេង អភិបាលរងរាជធានីភ្នំពេញថ្លែងថា ក្នុងក្របខណ្ឌរាជធានីភ្នំពេញពន្ធនាគារមិនត្រូវបានអនុវត្តទោសប្រាស ចាកពីច្បាប់កំណត់ឡើយ គឺបានអប់រំកែប្រែនិងការស្តារនីតិសម្បទាឡើងវិញ តាមរយៈការដកហូតសិទ្ធិមួយផ្នែកនៃការឃុំឃាំង ព្រមទាំងគ្មានការប្រើទណ្ឌកម្មឡើយ។ អ្នកជាប់ឃុំត្រូវបានធានាសន្តិសុខ សុវត្ថិភាព សុខភាព និង គោលការណ៍មនុស្សធម៌ស្របតាមតួនាទី និងច្បាប់ស្តីពីការគ្រប់គ្រងពន្ធនាគារ ។
លោកពេជ យុន ប្រធានពន្ធនាគាររាជធានីភ្នំពេញដែលត្រូវតែងតាំងថ្មីបានអះអាងថា ទោះបីការគ្រប់គ្រងពន្ធនាគារមានលក្ខណៈស្មុគស្មាញ និងមានការលំបាកយ៉ាងណាក៏ដោយ ប៉ុន្តែនឹងខិតខំបំពេញភារកិច្ចឲ្យសម្រេចបានជោគជ័យស្របតាមច្បាប់ និងហ៊ានប្រឈមមុខចំពោះមុខច្បាប់ក្នុងករណីផ្ទុយនឹងនីតិវិធី ។
បច្ចុប្បន្ននៅពន្ធនាគាររាជធានីភ្នំពេញ (ប៉េហ្ស៊ី) មានអ្នកជាប់ឃុំសរុប៣១១នាក់ ក្នុងនោះស្រី៤៤នាក់ ៕
ចែករំលែកព័តមាននេះ