- ភ្នំពេញ
ភ្នំពេញ៖ ក្នុងរយៈពេលប៉ុន្មានថ្ងៃចុងក្រោយនេះ នៅពេលប្រទេសជិតខាងកម្ពុជាយើង ថៃ ឡាវ និងវៀតណាម ឆ្លងរាលដាលជំងឺកូវីដ១៩ ច្រើន គឺនៅកម្ពុជាយើង ក៏មិនស្ងប់ស្ងាត់ឡើយ។…
ភ្នំពេញ៖ ក្នុងរយៈពេលប៉ុន្មានថ្ងៃចុងក្រោយនេះ នៅពេលប្រទេសជិតខាងកម្ពុជាយើង ថៃ ឡាវ និងវៀតណាម ឆ្លងរាលដាលជំងឺកូវីដ១៩ ច្រើន គឺនៅកម្ពុជាយើង ក៏មិនស្ងប់ស្ងាត់ឡើយ។…
ភ្នំពេញ៖ ក្នុងរយៈពេលប៉ុន្មានថ្ងៃចុងក្រោយនេះ នៅពេលប្រទេសជិតខាងកម្ពុជាយើង ថៃ ឡាវ និងវៀតណាម ឆ្លងរាលដាលជំងឺកូវីដ១៩ ច្រើន គឺនៅកម្ពុជាយើង ក៏មិនស្ងប់ស្ងាត់ឡើយ។ ក្នុងនោះ ករណីកូវីដ នាំចូលពីក្រៅប្រទេស មកកម្ពុជាយើង ក៏ត្រូវបានរកឃើញច្រើន ដែលថ្ងៃខ្លះ មានរហូតដល់ទៅជាង ៥០% នៃចំនួនអ្នកឆ្លងកូវីដ១៩ ប្រចាំថ្ងៃ ក៏មាន។
ក្រសួងសុខាភិបាល បានប្រកាសកាលពីថ្ងៃទី២៥ ខែកក្កដា ឆ្នាំ២០២១ អំពីការរកឃើញករណីវិជ្ជមានកូវីដ-១៩ ចំនួន ៨១៩នាក់។ ក្នុងនោះ ករណីនាំចូលពីក្រៅប្រទេស មានច្រើនគួរឱ្យព្រួយបារម្ភខ្លាំង ព្រោះមានដល់ទៅជាង ៥១% នៃករណីឆ្លងថ្មី កាលពីថ្ងៃទី២៤ ខែកក្កដា ឆ្នាំ២០២១ នៅទូទាំងប្រទេស។
ក្រសួងសុខាភិបាល បានឱ្យដឹងថា ត្រឹមរយៈពេល ២៤ម៉ោង កាលពីថ្ងៃទី២៤ ខែកក្កដា ឆ្នាំ២០២១ នៅទូទាំងប្រទេស រកឃើញករណីវិជ្ជមានកូវីដ-១៩ថ្មី ចំនួន ៨១៩នាក់។ ក្នុងនោះ ការឆ្លងក្នុងសហគមន៍នៃព្រឹត្តិការណ៍ ២០កុម្ភៈ មាន ៣៩៦នាក់ ខណៈចំនួន ៤២៣នាក់ផ្សេងទៀត ជាករណីនាំចូលពីក្រៅប្រទេស។ ករណីនាំចូលពីក្រៅប្រទេស សំដៅលើអ្នកធ្វើដំណើរចូលកម្ពុជា តាមយន្តហោះ អ្នកដំណើរតាមផ្លូវគោក និងផ្លូវទឹក។ ប៉ុន្តែដោយច្រើននោះ ករណីនាំចូលពីក្រៅប្រទេស សំដៅលើពលករខ្មែរ ឆ្លងដែនមកពីប្រទេសថៃ។
ការរកឃើញករណីនាំចូលកូវីដពីក្រៅប្រទេសច្រើនឡើងៗនេះ ជាការព្រួយបារម្ភផង តែម្យ៉ាងទៀត ក៏ជារឿងល្អដែរ។ នោះគឺយើងបានទប់ស្កាត់ទាន់ពេលវេលា នៅតាមព្រំដែន និងនៅពេលអ្នកដំណើរចុះពីលើយន្តហោះផង។ ពោលគឺបើសិនជារកមិនឃើញអ្នកឆ្លងទាំងនោះទេ មិនដឹងថា កូវីដរាលដាលឆ្លងនៅស្រុកភូមិយើង ដល់កម្រិតណាឡើយ។ ដូច្នេះគេត្រូវតែបន្តវិធានការរឹតបន្តឹងតាមព្រំដែន ពិសេសទប់ស្កាត់ការឆ្លងដែនខុសច្បាប់។
ប្រទេសកម្ពុជាយើង បានរកឃើញករណីជំងឺកូវីដ-១៩ ដំបូងបំផុត នៅថ្ងៃទី២៧ ខែមករា ឆ្នាំ២០២០ លើបុរសជនជាតិចិនម្នាក់ ហើយរហូតដល់ថ្ងៃទី២៤ ខែកក្កដា ឆ្នាំ២០២១ កម្ពុជាមានអ្នកវិជ្ជមានកូវីដ-១៩ សរុបកើនឡើងដល់ ៧៩៩២៣នាក់។ ក្នុងនោះ ករណីនាំចូលពីក្រៅប្រទេសសរុប ៨៦៧៧នាក់។ អ្នកជាសះស្បើយសរុប ៦៥២៦៤ នាក់ និងករណីស្លាប់ដោយកូវីដ-១៩ កើនឡើងដល់ ១២៨៣នាក់។
កន្លងមក ក្រុមពលករខ្មែរឆ្លងដែនមកពីប្រទេសថៃ រកឃើញឆ្លងកូវីដ ពិសេសមេរោគបំប្លែងថ្មី «ដែលតា» ដែលកំពុងតែឆ្លងរាតត្បាត និងគ្រោះថ្នាក់ខ្លាំង នៅប្រទេសថៃ ហើយក៏បង្កការគំរាមកំហែងដល់កម្ពុជាយើង ខណៈដែលនៅក្នុងស្រុក កូវីដក៏នៅតែបន្តឆ្លងរៀងរាល់ថ្ងៃ ចូលជាង ៨០០នាក់ ទៅដល់ជិត ១០០០នាក់ ក្នុង ១ថ្ងៃ។
ដោយសារតែនៅប្រទេសថៃ កំពុងប្រឈមនឹងគ្រោះថ្នាក់ធ្ងន់ធ្ងរនៃការឆ្លងរាលដាលមេរោគកូវីដ១៩ ពិសេសដោយមេរោគបំប្លែងថ្មី «ដែលតា» ដោយមានអ្នកឆ្លងច្រើន ទើបធ្វើឲ្យប្រជាពលរដ្ឋខ្មែរយើង ពិសេសពលករមួយចំនួន ជ្រួលច្របល់ ធ្វើដំណើរវិលត្រឡប់មកស្រុក ស្របពេលថៃ រឹតបន្តឹង និងអ្នកខ្លះទៀត ត្រូវបាត់បង់ការងារ ជាដើម។
ជាមួយនឹងកំណើននៃការឆ្លងរាលដាលកូវីដ នៅប្រទេសជាប់ព្រំដែនកម្ពុជា ពិសេសវៀតណាម និងប្រទេសថៃនេះ អ្នកជំនាញសុខាភិបាល បានព្រមានដល់ប្រជាជនកម្ពុជា អោយបង្កើនការប្រុងប្រយ័ត្នខ្ពស់បំផុត ខណៈខេត្តជាប់ព្រំដែនថៃ បន្តរកឃើញអ្នកឆ្លងមេរោគកូវីដ១៩ថ្មីច្រើន គួរអោយបារម្ភ ពិសេសលើពលករខ្មែរ ដែលឆ្លងដែនមកពីប្រទេសថៃ។
អ្នកជំនាញសុខាភិបាល បានផ្ញើសារព្រមានថា កម្ពុជា ត្រូវប្រុងប្រយ័ត្នខ្ពស់បំផុត ក្នុងការទប់ស្កាត់ការឆ្លងរាលដាលកូវីដ១៩ ដើម្បីបញ្ចៀសមហន្តរាយសុខភាព និងជីវិត។ ក្នុងនោះ ប្រជាពលរដ្ឋយើងម្នាក់ៗ ត្រូវបន្តអនុវត្តនូវវិធានការទប់ស្កាត់ការឆ្លងរាលដាលក្នុងសហគមន៍ ដោយអនុវត្តវិធានការ ៣កុំ និង៣ការពារ ឲ្យខ្ជាប់ខ្ជួន ទោះជាក្នុងកាលៈទេសៈ និងនៅកន្លែងណាក៏ដោយ។
រីឯអាជ្ញាធរសមត្ថកិច្ច មិនថា នៅខេត្តជាប់ព្រំដែនថៃទេ ប៉ែកខាងកើត នៅព្រំដែនវៀតណាម ក៏ដូចគ្នា។ ត្រូវរឹតបន្តឹងតាមព្រំដែន ទប់ស្កាត់ការលួចឆ្លងដែនខុសច្បាប់ ហើយអ្នកឆ្លងដែនទាំងអស់ ត្រូវតែធ្វើចត្តាឡីស័ក និងពិនិត្យសុខភាព ពិសេសត្រូវធ្វើតេស្តរកមេរោគកូវីដ១៩ ជាដាច់ខាត។
អ្នកឆ្លងដែនគ្រប់រូប ក៏ត្រូវឆ្លងដែន ដោយស្របច្បាប់ និងត្រូវគោរពតាមការណែនាំរបស់អាជ្ញាធរសមត្ថកិច្ច ដោយត្រូវឆ្លងកាត់ការធ្វើតេស្ត រកកូវីដ និងការធ្វើចត្តាឡីស័កត្រឹមត្រូវ។ ធ្វើដូច្នេះ ដើម្បីខ្លួនឯងផង និងដើម្បីក្រុមគ្រួសារផង ក៏ដូចជា ដើម្បីសង្គមជាតិយើងផង៕
ចែករំលែកព័តមាននេះ