អូឡាំពិកតូក្យូ ៖ ម្ចាស់មេដាយមាសដំបូងប្រចាំព្រឹត្តិការណ៍ និងប្រចាំតំបន់អាស៊ាន
ជប៉ុន ៖ កីឡាការនីចិន Yang Qian បានក្លាយជាអត្តពលិកដំបូងគេឈ្នះមេដាយមាសពីព្រឹត្តិការណ៍កីឡាអូឡាំពិកទីក្រុងតូក្យូឆ្នាំ
ជប៉ុន ៖ កីឡាការនីចិន Yang Qian បានក្លាយជាអត្តពលិកដំបូងគេឈ្នះមេដាយមាសពីព្រឹត្តិការណ៍កីឡាអូឡាំពិកទីក្រុងតូក្យូឆ្នាំ
ជប៉ុន ៖ កីឡាការនីចិន Yang Qian បានក្លាយជាអត្តពលិកដំបូងគេឈ្នះមេដាយមាសពីព្រឹត្តិការណ៍កីឡាអូឡាំពិកទីក្រុងតូក្យូឆ្នាំ ២០២០ កាលពីថ្ងៃទី២៤ ខែកក្កដា កន្លងទៅ។ ពោលគឺក្រោយមួយថ្ងៃ បន្ទាប់ពីព្រឹត្តិការណ៍លំដាប់ពិភពលោកមួយនេះ ធ្វើពិធីបើកជាផ្លូវការ កាលពីថ្ងៃទី២៣ ខែកក្កដា កន្លងទៅ។
កីឡាការនី Yang Qian អាយុ២១ឆ្នាំរូបនេះ ទទួលបានមេដាយមាសលើប្រភេទកីឡាបាញ់កាំភ្លើងខ្យល់ផ្នែកនារីវិញ្ញាសាចម្ងាយ ១០ម៉ែត្រ។ ខណៈដែលកីឡាការនីរុស្ស៊ី Anastasiia Galashina អាយុ២៤ឆ្នាំ ទទួលបានមេដាយប្រាក់ និងកីឡាការនីស្វីស Nina Christen អាយុ២៧ឆ្នាំ ទទួលបានមេដាយសំរិទ្ធ ដែលផ្តល់ដោយលោក Thomas Bach ដែលជាប្រធានគណៈកម្មាធិការអូឡាំពិកអន្តរជាតិហៅកាត់ថា IOC។
ដោយឡែកងាកមកកាន់កីឡាការនីថៃ Panipak Wongpattanakit បានក្លាយជាអត្តពលិកប្រចាំប្រទេសក្នុងតំបន់អាស៊ានដំបូងគេ ឈ្នះមេដាយមាសពីព្រឹត្តិការណ៍កីឡាអូឡាំពិកទីក្រុងតូក្យូឆ្នាំ ២០២០ កាលពីថ្ងៃទី២៤ ខែកក្កដា កន្លងទៅ។
កីឡាការនី Panipak Wongpattanakit អាយុ២៣ឆ្នាំរូបនេះ ទទួលបានមេដាយមាសលើប្រភេទកីឡាតេក្វាន់ដូផ្នែកនារីវិញ្ញាសាទម្ងន់ ៤៩គីឡូក្រាម។ បន្ទាប់ពីយកឈ្នះលើកីឡាការនីអេស្ប៉ាញ Adriana Cerezo អាយុ១៧ឆ្នាំ ដែលទទួលបានមេដាយប្រាក់នៅវគ្គផ្តាច់ព្រ័ត្រ។ ខណៈដែលកីឡាការនីអ៊ីស្រាអែល Avishag Semberg អាយុ១៩ឆ្នាំ និងកីឡាការនីសាធារណរដ្ឋស៊ែប Tijana Bogdanovic អាយុ២៣ឆ្នាំ ជាអ្នកទទួលបានមេដាយសំរិទ្ធ។
គិតមកទល់ពេលនេះ ចិនកំពុងឈរនៅកំពូលតារាងបណ្តោះអាសន្ន ក្នុងនាមជាប្រទេសឈ្នះមេដាយច្រើនជាងគេសម្រាប់ព្រឹត្តិការណ៍នេះ ពោលគឺចំនួន៤មេដាយក្នុងនោះរួមមាន មាស៣ និងសំរិទ្ធ១៕ (ដកស្រង់ចេញពីទំព័រផ្លូវការ Olympics)
ចែករំលែកព័តមាននេះ