រាជធានីភ្នំពេញ ៖ បុរសជាសន្តិសុខក្រុមហ៊ុន MPA ម្នាក់ ក្រោយចេញពីធ្វើការបានខ្ចីកង់មិត្តភក្ដិរួមការងារជិះត្រឡប់ទៅផ្ទះវិញ ហើយខណៈពេលកំពុងជិះសុខៗ ស្រាប់តែដួលប្រកាច់បណ្ដាលឲ្យស្លា.ប់បាត់បង់ជីវិតភ្លាមៗនៅនឹងកន្លែង ។ បន្ទាប់មកក្រុមគ្រូពេទ្យបានចុះទៅយកសំណាកក្រែងពាក់ព័ន្ធ នឹងជម្ងឺCOVID-19 ប៉ុន្តែលទ្ធផលតេស្ត គឺអវិជ្ជមានវីរុសកូវីដ-១៩ ដូច្នេះការស្លា.ប់ខាងលើ គឺសង្ស័យបណ្ដាលមកពីខ្យល់គរ ។
ហេតុការណ៍នោះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី២៤ ខែកក្កដា ឆ្នាំ២០២១ នៅតាមផ្លូវបេតុងស្ថិតនៅក្នុងភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។ ជនរងគ្រោះខាងលើឈ្មោះ វង្ស ផែង មានទីនៅម្ដុំកន្លែងកើតហេតុខាងលើ ។
តាមប្រភពព័ត៌មានបានឲ្យដឹងថា បុរសរងគ្រោះខាងលើជាសន្តិសុខយាម នៅបុរីអ័រគីដេ ស្ថិតនៅក្នុងខណ្ឌមានជ័យ រាជធានីភ្នំពេញ ហើយពេលចេញទៅធ្វើការ និងត្រឡប់មកវិញគាត់តែងតែជិះម៉ូតូរាល់ថ្ងៃពុំដែលជិះកង់ឡើយ ។
ដោយឡែក នៅមុនពេលកើតហេតុវេលាល្ងាចថ្ងៃទី២៣ ខែកក្កដា ឆ្នាំ២០២១ គាត់បានជិះម៉ូតូ១គ្រឿងទៅយាមវេនយប់ លុះដល់វេលាព្រឹកថ្ងៃកើតហេតុ ក្រោយពេលចប់ម៉ោងយាមក៏បានទុកម៉ូតូនៅកន្លែងយាមរួចខ្ចីកង់មិត្តភក្ដិរួមការងារជិះត្រឡប់មកផ្ទះវិញ ។
ប្រភពដដែលបានបន្តទៀតថា ពេលជិះទៅដល់ត្រង់ចំណុចកើតហេតុ ខណៈកំពុងជិះកង់សុខៗ ស្រាប់តែដួលប្រកាច់ត្រដរខ្យល់ ហើយបានស្លា.ប់បាត់បង់ជីវិតភ្លាមនៅនឹងកន្លែងតែម្ដង ។ ពេលនោះបង្កឲ្យមានការភ្ញាក់ផ្អើលទាំងព្រឹក ប៉ុន្តែអត់មាននរណាហ៊ានចូលទៅជិត ឬប៉ះពាល់ជនរងគ្រោះនោះឡើយព្រោះអត់បានដឹងថា ជនរងគ្រោះស្លា.ប់ដោយសារតែមូលហេតុអ្វីពិតប្រាកដនោះ ។
បន្ទាប់មកនគរបាលប៉ុស្តិ៍ចោមចៅទី២ បានចុះទៅកាន់ទីនោះរួចផ្ដល់ព័ត៌មានជូនក្រុមគ្រូពេទ្យជំនាញឲ្យចុះទៅពិនិត្យសំណាក់ក្រែងមានពាក់ព័ន្ធទៅ និងជម្ងឺCOVID-19 ។ ប៉ុន្តែជាលទ្ធផលអវិជ្ជមាន ហើយការស្លា.ប់របស់បុរសខាងលើ គឺសង្ស័យបណ្ដាលមកពីខ្យល់គរពេលនេះ នគរបាលបានធ្វើការស្រាវជ្រាវរកក្រុមគ្រួសារទៅទទួលយកសពធ្វើបុណ្យតាមប្រពៃណី ៕
ចែករំលែកព័តមាននេះ