បន្ទាយមានជ័យ៖ កម្លាំងនគរបាលវរៈការពារព្រំដែនគោក ២អង្គភាព សរុបជិត ៣០០នាក់ ត្រូវបានធ្វើតេស្ត រកឃើញវិជ្ជមានកូវីដ១៩ ចំនួន ៩នាក់។ ក្រុមនគរបាលការពារព្រំដែនទាំងនេះ…
បន្ទាយមានជ័យ៖ កម្លាំងនគរបាលវរៈការពារព្រំដែនគោក ២អង្គភាព សរុបជិត ៣០០នាក់ ត្រូវបានធ្វើតេស្ត រកឃើញវិជ្ជមានកូវីដ១៩ ចំនួន ៩នាក់។ ក្រុមនគរបាលការពារព្រំដែនទាំងនេះ ត្រូវបានយកសំណាក ធ្វើតេស្តរកកូវីដ នៅថ្ងៃទី២២ ខែកក្កដា ឆ្នាំ២០២១ នៅតាមជាយដែន ក្នុងភូមិសាស្ត្រខេត្តបន្ទាយមានជ័យ។
លោកឧត្តមសេនីយ៍ត្រី វង្ស វិត ស្នងការរងនគរបាលខេត្តបន្ទាយមានជ័យ បានអោយដឹងថា ជាការណែនាំ និងយកចិត្តទុកដាក់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ចំពោះសុខភាពកងកម្លាំង ដែលកំពុងឈរជើង តាមបន្ទាត់ព្រំដែន ក្រុមគ្រូពេទ្យនៃស្នងការដ្ឋាននគរបាលខេត្តបន្ទាយមានជ័យ បានយកសំណាកកងកម្លាំងនគរបាលវរៈការពារព្រំដែនគោក ចំនួន ២អង្គភាព មាន ២៨០នាក់។ លទ្ធផលវិជ្ជមានកូវីដ១៩ ចំនួន ៩នាក់។
លោកបានបញ្ជាក់ថា ក្នុងចំណោម ២អង្គភាពនោះ គឺកម្លាំងនគរបាលវរៈការពារព្រំដែនគោក លេខ៨៩១ មានចំនួន ១៦៤នាក់ យកសំណាក ធ្វើតេស្ត លទ្ធផលវិជ្ជមានកូវីដ.១៩ ចំនួន ៨នាក់ និងកម្លាំងនគរបាលវរៈការពារព្រំដែនគោកលេខ៩១១ មានចំនួន ១១៦នាក់ យកសំណាក ធ្វើតេស្ត លទ្ធផលវិជ្ជមានកូវីដ១៩ មានចំនួន ម្នាក់។
លោកឧត្តមសេនីយ៍ត្រី វង្ស វិត បានបញ្ជាក់ថា កម្លាំងនគរបាលវរៈការពារព្រំដែនគោក ដែលកំពុងអនុវត្តភារកិច្ចការពារបូរណៈភាពទឹកដី និងបទល្មើសឆ្លងដែន ទប់ស្កាត់ពលករចំណាកស្រុក ដោយល្មើសច្បាប់ ដែលធ្វើតេស្ត លទ្ធផលវិជ្ជមានកូវីដទាំង ៩នាក់នេះ ត្រូវបានក្រុមគ្រូពេទ្យ យកទៅព្យាបាល ហើយកម្លាំងនគរបាលវរៈការពារព្រំដែនគោកដទៃទៀត ត្រូវអនុវត្តតាមការណែនាំរបស់ក្រសួងសុខាភិបាល ៣ការពារ និង ៣កុំ ដើម្បីខ្លួនយើង និងគ្រួសារយើង សង្គមជាតិយើង៕ ប៊ុន ធឿន
ចែករំលែកព័តមាននេះ