* បើនិយាយឱ្យវាហួសហេតុបន្តិច សព្វថ្ងៃចោរប្លន់កើតមានស្ទើរដូចស្រមោចនៅរាជធានីភ្នំពេញ ដែលពេលខ្លះចាប់បាន ពេលខ្លះចាប់អត់បានទេ ប្លន់បានសម្រេចដោយសុវត្ថិភាព ធ្វើឱ្យជីវិតរស់នៅក្នុងរាជធានីគ្មានការកក់ក្តៅ ។
* ភ័យខ្លាចជាងគេ គឺចោរប្លន់យកម៉ូតូកណ្តាលរាត្រីស្ងាត់ ដែលជនរងគ្រោះជាបុគ្គលិកបម្រើការងារពេលយប់ ហើយត្រូវចេញពីកន្លែងធ្វើការឆ្ពោះទៅផ្ទះវិញ ។
* ជាក់ស្តែងយប់ថ្ងៃទី១៩ ធ្នូ ចោរប្លន់យកម៉ូតូ២កន្លែង គឺ១កន្លែងនៅខណ្ឌសែនសុខ មួយទៀតនៅខណ្ឌចំការមន សុទ្ធតែប្លន់វ៉ៃយកម៉ូតូ ដែលជនរងគ្រោះម្នាក់ៗស្ទើរស្លាប់ស្ទើររស់ ។
* កើតមានបែបនេះបញ្ជាក់ថា អាជ្ញាធរមិនមានគោលដៅច្បាស់លាស់ ខាងរក្សាសុវត្ថិភាពពេលយប់ស្ងាត់ ក្នុងអាណាចក្ររបស់ខ្លួន ។ ហាក់ដូចគ្មានកម្លាំងសមត្ថកិច្ចប្រចាំការដើម្បីសន្តិសុខសុវត្ថិភាពឱ្យអ្នកក្រុងបានកក់ក្តៅសោះ ។
* ឱ្យតែយប់ស្ងាត់មកដល់ នៅរាជធានីភ្នំពេញ បើមិនស្រវឹងបង្កគ្រោះថ្នាក់ចរាចរណ៍ ក៏កើតមានចោរប្លន់ប្រើកាំភ្លើងក៏មាន ប្រើដាវ ឬកាំបិត ឬដំបងក៏មាន ពិតជាគួរឱ្យភ័យខ្លាចក្នុងការធ្វើដំណើរមែន ។ អ្នកធ្វើការពេលយប់ពិតជាប្រឈមនឹងគ្រោះថ្នាក់ដល់ជីវិតយ៉ាងពិតប្រាកដ បើមិនឆាប់ក៏យូរដែរ ។
* អាជ្ញាធររាជធានី គួរមានវិធានការក្តៅថែមទៀត ដើម្បីសេចក្តីសុខសាន្តរបស់អ្នករាជធានីភ្នំពេញពេលយប់ ។ ប្រសិនបើធ្វើក្តៅកម្ចាត់បានទាន់ពេលវេលា ក៏អាចកាត់បន្ថយបានច្រើនដែរ នូវក្រុមសង្គមងងឹតទាំងឡាយនោះ ៕
ចែករំលែកព័តមាននេះ