ខេត្តតាកែវ ៖ ជំងឺកូវីដ១៩កំពុងឆ្លងរីករាលដាលនៅក្នុងខេត្តតាកែវពីមួយទៅមួយថ្ងៃមិនស្រាកស្រាន្តឡើយ ហើយពេលនេះក៏បានឆ្លងដល់ព្រះសង្ឃជាច្រើនអង្គផងដែរ ខណៈដែលនៅរាជធានីភ្នំពេញ វត្តមួយចំនួនត្រូវសម្រេចបិទខ្ទប់ហើយ បន្ទាប់រកឃើញវិជ្ជមានទៅលើព្រះសង្ឃ ជាច្រើនអង្គមកនោះ។
ជាក់ស្តែង លោកនុត ស៊ីណាត ប្រធានមន្ទីរសុខាភិបាលខេត្តបានអោយកោះសន្តិភាពដឹងនៅព្រឹកថ្ងៃនេះថា ក្រុមគ្រូពេទ្យបានបន្តធ្វើតេស្តរហ័សនៅលើព្រះសង្ឃក្នុង«វត្តសីហះរតនះរាម» មានព្រះសង្ឃចំនួន១០០អង្គ ដោយរកឃើញវិជ្ជមានជំងឺកូវីដ១៩មានចំនួន២០អង្គហើយ។ យើងបន្តធ្វើតេស្តបន្តទៀតហើយចំពោះព្រះសង្ឃដែលមានវិជ្ជមានជំងឺកូវីដ១៩ គឺដាក់អោយព្យាបាលនៅក្នុងសាលាពុទ្ធតិកក្នុងវត្តតែម្តង ហើយចំពោះព្រះសង្ឃដែលមានជាប់ពាក់ព័ន្ធក៏ដាក់អោយធ្វើចត្តាឡីស័កនៅក្នុងវត្តផងដែរ តែដាក់ដោយឡែកពីព្រះសង្ឃដែលមានវិជ្ជមានជំងឺកូវីដ១៩ ។
នៅព្រឹកថ្ងៃទី២០ កក្កដា នេះ លោកខាន់ សុខា អភិបាលរងខេត្ត, លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្ត,លោកកង អាណាន់ អភិបាល ក្រុងដូនកែវ និងមន្ត្រីជំនាញពាក់ព័ន្ធ បានអញ្ជើញពិនិត្យរៀបចំទីតាំងកន្លែងសម្រាប់ធ្វើ ចត្តាឡីស័ក្ដ និងកន្លែងសម្រាកព្យាបាលព្រះសង្ឃ ដែលរកឃើញវិជ្ជមានកូវីដ១៩ក្នុងវត្ត«សីហរតនារាម» ស្ថិតក្នុងភូមិឡូរី សង្កាត់រកាក្នុង ក្រុងដូនកែវ ខេត្តតាកែវ ។
លោកខាន់ សុខា អភិបាលរងខេត្តក៏បានធ្វើការណែនាំដល់ អាជ្ញាធរពាក់ព័ន្ធ និងមន្ត្រីជំនាញសុខាភិបាល ត្រូវរួមសហការគ្នារៀបចំ កន្លែងសម្រាប់ធ្វើចត្តាឡីស័ក ព្រះសង្ឃដែលប៉ះពាលផ្ទាល់ ឬប្រយោលទាំងអស់ និង កន្លែងសម្រាប់ព្យាបាល ព្រះសង្ឃដែលមានវិជ្ជមានកូវីដ១៩ ឱ្យបានត្រឹមត្រូវ ស្របតាម បច្ចេកទេសសុខាភិបាល ។ លោកអភិបាលរងខេត្តបានបន្តថា ចំពោះព្រះសង្ឃដែលគង់ ក្នុងវត្តសីហរតនារាម ទាំងអស់ ត្រូវសហការជាមួយអាជ្ញាធរមូលដ្ឋាន និងមន្រ្តីជំនាញ ផ្ដល់សំណាកដើម្បីធ្វើតេស្ដ៍រកវីរុសកូវីដ១៩ ។ ជាពិសេស គណៈកម្មការធិការវត្ត ត្រូវផ្សព្វផ្សាយ វិធានការសុខា ភិបាល និងអនុវត្តវិធានការ ការពារ ៣កុំ ៣ការពារ អនុសាសន៍ដ៏ខ្ពង់ខ្ពស់របស់ សម្តេចតេជា ហ៊ុន សែន នាយករដ្ឋមន្រ្តី និងធ្វើការណែនាំដល់ព្រះសង្ឃគ្រប់អង្គ ត្រូវមានទម្លាប់ ធ្វើអនាម័យឲ្យបានជាប់ជាប្រចាំ និងប្រុងប្រយ័ត្នជានិច្ច ដោយត្រូវពាក់ម៉ាស់ និងត្រូវលាងដៃជាមួយសាប៊ូ ឬអាកុលឱ្យបានញឹកញាប់ ដើម្បីការពារការឆ្លងជំងឺដ៏កាចសាហាវមួយនេះ។
គួរបញ្ចាក់ដែរថា ជំងឺកូវីដ១៩នេះបានផ្ទុះឡើងកាលពីយប់ថ្ងៃទី១៩ ខែកក្កដា ឆ្នាំ២០២១ បន្ទាប់ពីក្រុមគ្រូពេទ្យ នៃការិយាល័យស្រុកប្រតិបត្តិដូនកែវ បានចុះយកសំណាកលើព្រះសង្ឃចំនួន១០អង្គ ដោយធ្វើតេស្ដរហ័ស (Rapid Test) ជាលទ្ធផលមានព្រះសង្ឃ ចំនួន ១០អង្គ នឹងព្រឹកឡើង ក៏បានធ្វើតេសរកឃើញជំងឺកូវី១៩ ចំនួន១០អង្គទៀត សរុបមានចំនួន២០អង្គហើយដែលត្រូវបាន រកឃើញវិជ្ជមានកូវីដ១៩ នោះដែលបច្ចុប្បន្នកំពុងដាក់សម្រាកព្យាបាលនៅសាលាគរុកោសល្យ១០អង្គចំណែក១០អង្គទៀតដាក់អោយព្យាបាលនៅក្នុងវត្ត៕
ចែករំលែកព័តមាននេះ