រាជធានីភ្នំពេញ ៖ ដើមក្ងោកមួយដើមបាក់រលំដល់គល់សង្កត់លើរថយន្តចំនួន ២គ្រឿង បណ្តាលឱ្យរងការខូចខាតតែបន្តិចបន្តួចតែប៉ុណ្ណោះ ដោយសារតែខ្យល់កន្ត្រាក់បក់មកមួយប្រាវ ខណៈដែលម្ចាស់ចតទុកចោលហើយនាំគ្នាទៅរកហូបបាយនោះ។ ហេតុការណ៍នេះកើតឡើងកាលពីវេលាម៉ោង១រសៀល ថ្ងៃទី១៩ ខែកក្កដា ឆ្នាំ២០២១ នៅចំណុចនៅក្បែររបងសាលាបឋមសិក្សាទួលស្វាយព្រៃ តាមផ្លូវលេខ២០៣ ក្នុងសង្កាត់ទួលស្វាយព្រៃទី២ ខណ្ឌបឹងកេងកង។
តាមប្រភពព័ត៌មានបានប្រាប់ឱ្យដឹងថា មុនពេលកើតហេតុមានរថយន្តចំនួន ២គ្រឿង ដោយមួយគ្រឿងគឺម៉ាកសាំយ៉ុង ពណ៌លឿង ស្លាកលេខ កណ្ដាល ២C-៩៥៦៩ និងមួយគ្រឿងទៀតម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣D-៧៤៣៣ ចតទុកចោលលើចិញ្ចើមផ្លូវក្រោមឈើ ហើយម្ចាស់នាំគ្នាទៅរកហូបបាយបាត់អស់។ ពេលដែលម្ចាស់ចតរថយន្តទាំង ២គ្រឿទុកចោល ហើយគ្នាទៅហូបបាយបាត់អស់នោះ ក៏ស្រាប់តែមានខ្យល់កន្ត្រាក់មួយប្រាវបោកបក់មកយ៉ាងខ្លាំង បណ្តាលឲ្យបាក់ដើមក្ងោកមួយដើមខាងលើសង្កត់លើរថយន្តតែម្តង។
តាមប្រភពដដែលបានប្រាប់បន្តទៀតថា ពេលដែលខ្យល់បក់មួយប្រាវបណ្តាលឲ្យបាក់ដើមក្ងោក១ដើមនោះ បានបណ្តាលឲ្យរថយន្តម៉ាកសាំយ៉ុង ក្រពឹតដំបូល ចំណែកឯរថយន្តម៉ាកហ៊ីយ៉ាន់ដាយ បាក់កញ្ចក់មើលចំហៀងម្ខាងធ្លាក់ទៅលើដីរងការខូចខាតបន្តិចបន្តួចប៉ុណ្ណោះ និងបង្កគ្មានការគ្រោះថ្នាក់ដល់មនុស្សណាម្នាក់ឡើយ។ ក្រោយពេលកើតហេតុ សមត្ថកិច្ចមូលដ្ឋានខណ្ឌបឹងកេងកង បាននាំគ្នាយករណា និងកាំបិតមកអារកាត់យកដើមក្ងោកមួយដើមដែលបាក់ដល់គល់ចេញ ដើម្បីឲ្យម្ចាស់រថយន្តទាំង២គ្រឿង ដែលរងការខូចខាតយកទៅធ្វើការជួសជុលវិញផងដែរ៕ ដោយ ៖ ភី ផល
ចែករំលែកព័តមាននេះ