បន្ទាយមានជ័យ ៖ ពលករខ្មែរមកពីថៃ ផ្ទុកជំងឺកូវីដ-១៩ម្នាក់ ឈ្មោះ ធឿន ប៊ុនពេជ្រ ភេទប្រុស អាយុ៣០ឆ្នាំ ដែលបានរត់គេចពីមណ្ឌលចត្តាឡីស័ក…
បន្ទាយមានជ័យ ៖ ពលករខ្មែរមកពីថៃ ផ្ទុកជំងឺកូវីដ-១៩ម្នាក់ ឈ្មោះ ធឿន ប៊ុនពេជ្រ ភេទប្រុស អាយុ៣០ឆ្នាំ ដែលបានរត់គេចពីមណ្ឌលចត្តាឡីស័ក កាលពីថ្ងៃទី១៦ កក្កដា ២០២១ ត្រូវបានអាជ្ញាធរមានសមត្ថកិច្ច រកឃើញវិញហើយ នៅរសៀលថ្ងៃទី១៩ កក្កដា ២០២១នេះ ហើយបានក៏បញ្ជូនទៅមណ្ឌលសម្រាកព្យាបាលវិញផងដែរ ។
ប្រភពពីមន្ត្រីសមត្ថកិច្ច បានអោយដឹងថា ពលកររូបនេះ បានលួចរត់គេចពីមណ្ឌលចត្តាឡីស័ក ក្នុងវិទ្យាល័យកូប ក្នុងស្រុកម៉ាឡៃ ខេត្តបន្ទាយមានជ័យ ទៅសំងំ ជាមួយប្រពន្ធ ដែលកំពុងមានផ្ទៃពោះផងនោះ នៅឯស្រុកអន្លង់វែង ខេត្តឧត្តរមានជ័យ ។
មន្ត្រីសមត្ថកិច្ច បានបន្តថា ការរកឃើញនេះ ដោយសារការស្រាវជ្រាវរបស់កម្លាំងអធិការដ្ឋាននគរបាល ក្រុងសិរីសោភ័ណ រកឃើញផ្ទះរបស់គេដែលមានអាសយដ្ឋានស្ថិតនៅជើងភ្នំកន្ទួត ភូមិភ្នំកន្ទួត សង្កាត់កំពង់ស្វាយ ក្រុងសិរីសោភ័ណ។ ក្រោយពី មានការចុះទៅធ្វើការពន្យល់ណែនាំ ក្រុមគ្រួសារ អ្នកជំងឺ ធឿន ប៊ុនពេជ្រ ឲ្យចូលរួមសហការជាមួយសមត្ថកិច្ច ដើម្បីទាក់ទងទៅអ្នកជំងឺឲ្យចូលខ្លួន មកទទួលការព្យាបាល និងហានិភ័យឆ្លងដល់ប្រជាពលរដ្ឋផ្សេងៗទៀតរួចមក អ្នកជំងឺ រួមទាំងប្រពន្ធ ដែលកំពុងមានផ្ទៃពោះផងនោះ បានសម្រេចចិត្ត ជិះម៉ូតូ ពីទីកន្លែងលាក់ខ្លួន ដើម្បីមកទទួលការព្យាបាលនៅមណ្ឌលវិទ្យាល័យខ្លាកូន ភូមខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ នៅថ្ងៃទី១៩ ខែកក្កដា ឆ្នាំ២០២១។
បុរសឈ្មោះ ធឿន ប៊ុនពេជ្រ អាយុ៣០ឆ្នាំ ជាពលករបម្រើការងារនៅខេត្តឈុនបូរី ប្រទេសថៃ ហើយបានចូលមកប្រទេសកម្ពុជា កាលពីថ្ងៃទី០៩ ខែមិថុនា ឆ្នាំ២០២១ រកឃើញវិជ្ជមានកូវីដ-១៩ (មិនទាន់ត្រូវបានបញ្ជាក់ថា ជាមេរោគប្រភេទថ្មី #Delta នៅឡើយ)។ មុនពេលចេញលទ្ធផល បុគ្គលរូបនេះ បានរត់គេចពីមណ្ឌលចត្តាឡីស័ក ក្នុងវិទ្យាល័យកូប ក្នុងស្រុកម៉ាឡៃ ខេត្តបន្ទាយមានជ័យ កាលពីថ្ងៃទី១៦ ខែកក្កដា ឆ្នាំ២០២១ ។
យ៉ាងណា អនុគណៈកម្មការស្រាវជ្រាវជំងឺកូវីដ១៩ សូមអំពាវនាវដល់ប្រជាពលរដ្ឋ ដែលបានជួប ឬមានទំនាក់ទំនងជាមួយឈ្មោះ ធឿន ប៊ុនពេជ្រ សូមតាមដាន សុខភាព របស់ខ្លួន ឬ ប្រសិនបើមានអាការៈ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមប្រញាប់ទៅធ្វើតេស្ដ ។
សូមជម្រាបថា រាជរដ្ឋាភិបាល បាននិងកំពុងយកចិត្តទុកជាខ្លាំង ក្នុងការទប់ស្កាត់កុំឲ្យមានការចម្លងជំងឺកូវីដ-១៩ចូលទៅក្នុងសហគមន៍ ពិសេសវីរុសបំប្លែងថ្មី (ដែលតា) ដែលជាមេរោគឆ្លងលឿន និងបង្កទុក្ខទោសដល់សុខភាពខ្លាំង បើធៀបនឹងកូវីដ-១៩ធម្មតា ។ កម្ពុជា បានរកឃើញករណីវិជ្ជមានកូវីដ-១៩ ជាករណីនាំចូលពីក្រៅប្រទេសជាច្រើនករណីក្នុងមួយថ្ងៃៗ ដែលភាគច្រើនជាពលករខ្មែរមកពីប្រទេសថៃ វិលចូលស្រុកកំណើតក្រោយពីប្រទេសថៃ បានបិទប្រទេស និងខេត្តមួយចំនួន ក្រោយផ្ទុះការឆ្លងកូវីដ-១៩ ខ្លាំងក្លានោះ ៕
ចែករំលែកព័តមាននេះ