រាជធានីភ្នំពេញ ៖ វិបត្តិកូវីដ ១៩ បានធ្វើឱ្យវិស័យនានាដែលគាំទ្រដល់សេដ្ឋកិច្ចកម្ពុជា រងផលប៉ះពាល់ជាបន្តបន្ទាប់ជាពិសេសចាប់តាំងពីមានព្រឹត្តិការណ៍ឆ្លងក្នុងសហគមន៍ ២០ កុម្ភៈ ២០២១ មក ក្នុងនោះវិស័យចិញ្ចឹមជ្រូកកម្ពុជា ក៏រងផលប៉ះពាល់ដែរ ប៉ុន្តែនៅក្នុងវិបត្តិនោះ វិស័យចិញ្ចឹមជ្រូកកម្ពុជាអាចផ្គត់ផ្គង់លើទីផ្សារក្នុងស្រុកបានរហូតដល់ ៨៥ ភាគរយទៅវិញ ដែលជាសន្ទុះមួយល្អប្រសើរ និងអាចឈានទៅរកការផ្គត់ផ្គង់បានទាំងស្រុងនៅពេលឆាប់ ។
យោងតាមរបាយការណ៍របស់សមាគមអ្នកចិញ្ចឹមសត្វកម្ពុជា បានលើកឡើងថានៅក្នុងរយៈពេលប៉ុន្មានឆ្នាំ ចុងក្រោយនេះ វិស័យចិញ្ចឹមជ្រូកនៅប្រទេ សកម្ពុជាមានការរីកចម្រើនគួរឲ្យកត់សម្គាល់ ហើយបច្ចុប្បន្ននេះ កម្ពុជាអាចផ្គត់ផ្គង់ទីផ្សារក្នុងស្រុកបានរហូតដល់ជា ៨៥ ភាគរយ ។ សមាគមអ្នកចិញ្ចឹមសត្វកម្ពុជាបានលើកឡើងថា ការរីកចម្រើននេះបណ្តាលមកពីកក្តាមួយចំនួនដូចជា ក្រសួងកសិកម្មរុ ក្ខាប្រមាញ់ និងនេសាទបានគ្រប់គ្រង់កូតានាំជ្រូកចូលបានល្អ ដែលមិនប៉ះពាល់ដល់អ្នកចិញ្ចឹមក្នុងស្រុក ជាពិសេសបានជ្រើសរើសក្រុមហ៊ុននាំចូលដែលអនុវត្តតាមបទដ្ឋាន ។ ការអនុវត្តបានត្រឹមត្រូវតាមបច្ចេកទេសរបស់អ្នកចិញ្ចឹម ដូចជាជ្រើសរើសពូជ អនុវត្តតាមបច្ចកទេស និងការរបង្កើនប្រព័ន្ធជីវសុវត្ថិភាពដើម្បីការពារជំងឺឆ្លងនានាជាពិសេសជំងឺប៉េស្តជ្រូកអាហ្រ្វិក ។ ការយកចិត្តទុកដាក់ខ្ពស់ពីប្រមុខរាជរដ្ឋាភិបាលបានបង្កើតឱកាសទីផ្សារសម្រាប់ជ្រូកចិញ្ចឹមក្នុងស្រុក ទាំងអ្នកចិញ្ចឹមខ្នាតធំ និង តូចទទួលបានប្រាក់ចំណេញ ។
សមាគមអ្នកចិញ្ចឹមសត្វកម្ពុជាលើកឡើងទៀតថា ជាមួយគ្នានេះវិស័យចិញ្ចឹមជ្រូកនៅជួបប្រទះបញ្ហាមួយចំនួនផងដែរ ជាពិសេសកំឡុងផ្ទុះជំងឺកូវីដ-១៩ នេះ ថ្លៃដើមផលិតកម្មនៃការចិញ្ចឹមជ្រូកខ្ពស់គឺដើម្បីផលិតសាច់ជ្រូករស់បាន ១ គ.ក ត្រូវចំណាយអស់ប្រហែល ២.៩៥ ដុល្លារ ការចំណាយថ្លៃដើមខ្ពស់នេះដោយសារតម្លៃវត្ថុធាតុដើមឡើងថ្លៃ ប្រមាណ ៣០ ភាគរយដោយបណ្តាលមកពីទិន្និផលវត្ថុធាតុដើមធ្លាក់ចុះនៅអាមរិកខាងត្បូង និងតម្លៃដឹកជញ្ជូនបានកើនឡើង កំឡុងពេលផ្ទុះជំងឺកូវីដ ១៩ ។
ប្រទេសជិតខាងបានលក់ជ្រូករស់ក្នុងតម្លៃថោកមកប្រទេសកម្ពុជាដោយសារប្រទេសជិតខាងកំពុងមានការផ្ទុះជំងឺប៉េស្តជ្រូកអាហ្វ្រិក ជាពិសេសថ្មីនេះតម្រូវការសាច់ជ្រូកនៅទីក្រុងធំៗនៃប្រទេសវៀតណាម និង ថៃបានធ្លាក់ចុះដោយសារការបិទខ្ទប់នៃការរាលដាលជំងឺកូវីដ-១៩ ដូចឆ្នេះ ពួកឈ្មួញខិលខូចតែងតែព្យាយាមរកឧកាសនាំជ្រូកចូលមកកម្ពុជា ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានឱ្យដឹងថា កត្តាដែលជំរុញឱ្យវិស័យចិញ្ចឹមជ្រូកកម្ពុជាអាចផ្គត់ផ្គង់លើទីផ្សារបានរហូតដល់៨៥ភាគរយនេះ ដោយសារតែការបិទការនាំចូលពីខាងក្រៅ តម្រូវការក្នុងស្រុកធ្លាក់ចុះព្រោះតែកូវីដ ១៩ ដោយមិនមានកម្មវិធីការបុណ្យផ្សេងៗ ហើយកំណើនពលរដ្ឋងាកទៅរកការចិញ្ចឹមជ្រូកក៏កើនឡើងនៅក្នុងវិបត្តិកូវីដ ១៩ ។ លោកបន្តថា បច្ចុប្បន្ននេះបើសិនជារដ្ឋាភិបាលបិទការនាំចូលទាំងស្រុង ការផ្គត់ផ្គង់ជ្រូកក៏អាចនឹងគ្រប់ទៅតាមតម្រូវការដែរ ដោយយកសាច់ផ្សេងមកជំនួស ដូចជាត្រី មាន់ ទាជាដើម ព្រោះ ក្នុងវិបត្តិកូវីដ ១៩ នេះវិស័យចិញ្ចឹមសត្វនៅកម្ពុជាមានកំណើនខ្ពស់មិនថាតែជ្រូកនោះទេ ។
លោកបន្ថែមថា ពេលនេះជំងឺប៉េសជ្រូកអាហ្វ្រិកនៅប្រទេសជិតខាងកំពុងតែរាលដាលខ្លាំងហើយបើសិនជាវាឆ្លងចូលមកកម្ពុជាទៀតនោះ ទីផ្សារជ្រូកនិងផលប៉ះពាល់លើការចិញ្ចឹមជ្រូករបស់ប្រជាកសិករកម្ពុជាអាចនឹងមានទ្រង់ទ្រាយធំ ហើយនឹងជះឥទ្ធិពលដល់ទីផ្សារជ្រូកទៀតជាមិនខាន ។លោកថា ៖«យើងគាំទ្រដល់រាជរដ្ឋាភិបាលក្នុងការទប់ស្កាត់ការនាំចូលជ្រូកពីខាងក្រៅដោយយើងនាំចូលដើម្បីបំពេញតម្រូវការប៉ុណ្ណោះ នាពេលនេះ គឺមិនមែននាំចូលមកចាក់ចោលដូចកាលពីប៉ុន្មានឆ្នាំមុននោះឡើយ» ។
លោកបញ្ជាក់ថា ទីផ្សារជ្រូករស់នាពេលបច្ចុប្បន្ននេះ នៅមានស្ថេរភាពល្អប្រសើរ ដោយក្នុងមួយគីឡូក្រាមមានតម្លៃជាមធ្យម ១៣៥០០ រៀល ឬអាចទាបជាងនេះពីរឬបីរយរៀលប៉ុណ្ណោះ ដែលជាតម្លៃមួយល្អប្រសើរ អាចទទួលបានទាំងអ្នកចិញ្ចឹមនិងអ្នកលក់បន្ត ហើយអ្នកបរិភោគក៏អាចទទួលយកតម្លៃលើទីផ្សារបានដូចគ្នា ៕
ចែករំលែកព័តមាននេះ