រាជធានីភ្នំពេញ ៖ កម្ពុជានឹងទទួលបានមកវិញនូវសម្បត្តិវប្បធម៌ខ្មែររូបចម្លាក់ «ព្រះស្កន្ទគង់លើក្ងោក» ពីភាគីសហរដ្ឋអាមេរិកដែល រូបចម្លាក់នេះត្រូវបានអាមេរិករឹបអូសបានពីពលរដ្ឋខ្លួននៅសង្កាត់ភាគខាងត្បូងនៃទីក្រុងញូវយ៉ក ។ យោងតាមសេចក្ដីជូនព័ត៌មាន របស់ក្រសួងវប្បធម៌ និងវិចិត្រសិល្បៈ…
រាជធានីភ្នំពេញ ៖ កម្ពុជានឹងទទួលបានមកវិញនូវសម្បត្តិវប្បធម៌ខ្មែររូបចម្លាក់ «ព្រះស្កន្ទគង់លើក្ងោក» ពីភាគីសហរដ្ឋអាមេរិកដែល រូបចម្លាក់នេះត្រូវបានអាមេរិករឹបអូសបានពីពលរដ្ឋខ្លួននៅសង្កាត់ភាគខាងត្បូងនៃទីក្រុងញូវយ៉ក ។ យោងតាមសេចក្ដីជូនព័ត៌មាន របស់ក្រសួងវប្បធម៌ និងវិចិត្រសិល្បៈ ។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចត្រសិល្បៈលើកឡើងក្នុងសេចក្តីជូនដំណឹងរបស់ក្រសួងវប្បធម៌បានឲ្យដឹងនៅថ្ងៃទី១៦ កក្កដានេះថា វត្ថុបុរាណដ៏ពិចិត្រនេះត្រូវបានយកចេញពីប្រាសាទក្រចាប់ដែលជាប្រាសាទមួយក្នុងរមណីយដ្ឋានប្រាសាទកោះកេរ អតីតរាជធានីនៃអាណាចក្រខ្មែរនៅសតវត្សរ៍ទី១០ គ.ស ។
លោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈបានថ្លែងថា «រូបចម្លាក់ព្រះស្កន្ធគង់លើក្ងោកនេះ» គឺជាគំរូនៃភាពច្នៃប្រឌិតដ៏គួរ ឲ្យស្ញប់ស្ញែងរបស់បុព្វបុរសខ្មែរ ។ ព្រះស្កន្ទ ទេពនៃសង្គ្រាមរបស់សាសនាហិណ្ឌូ គឺកម្រមានឃើញនៅក្នុងសិល្បៈខ្មែរ ប៉ុន្តែត្រូវបានបង្ហាញរូបរាងយ៉ាងលេចធ្លោនៅប្រាសាទក្រចាប់ ។
ការវិលត្រឡប់មកវិញនៃរូបចម្លាក់នេះ បញ្ជាក់ពីការប្តេជ្ញាចិត្តរបស់កម្ពុជាក្នុងការស្វែងរក និងនាំយកមកវិញនូវព្រលឹងរបស់បុព្វបុរសយើងដែលបានចាកចេញពីមាតុភូមិកំណើតអស់រយៈពេលច្រើនឆ្នាំកន្លងមកក្នុងអំឡុងសម័យសង្គ្រាម ។
លោកជំទាវបានបន្តថា «យើងខ្ញុំមានក្តីរំភើបឥតឧបមានៅពេលដែលយើងអាចទទួលបានមកនូវវិញសម្បត្តិវប្បធម៌ដ៏មានតម្លៃជាច្រើនដែលត្រូវបាននាំចេញដោយខុសច្បាប់ពីប្រទេសកម្ពុជាជាអាទិ៍ រូបចម្លាក់ព្រះឥសូរ និងព្រះស្កន្ទ ដែលនឹងបញ្ជូនត្រឡប់មកកម្ពុជាវិញនាពេលឆាប់ៗខាងមុខនេះ ហើយជឿជាក់ថា បានយកចេញពីកន្លែងតែមួយជាមួយនឹងរូបចម្លាក់ព្រះស្កន្នគង់លើក្ងោកនៅក្នុងតួប៉មកណ្តាលនៃប្រាសាទក្រចាប់ ។
ការត្រឡប់មកវិញ នៃរូបចម្លាក់ទាំងនេះ និងរបកគំហើញថ្មីៗជាបន្តបន្ទាប់បានផ្តល់ឲ្យប្រជាជនកម្ពុជា និងពិភពលោកនូវការយល់ដឹងកាន់តែប្រសើរថែមទៀតអំពីវប្បធម៌ និងប្រវត្តិសាស្ត្រខ្មែរបុរាណ» ៕
ចែករំលែកព័តមាននេះ