រាជធានីភ្នំពេញ ៖ ដើម្បីពង្រឹងគុណភាពនៃការបម្រើសេវាកម្មដល់អតិថិជនឱ្យកាន់តែល្អប្រសើរជាងមុន ក៏ដូចជាត្រៀមខ្លួនប្រកួតប្រជែងនៅលើទីផ្សារ ស្របពេលវិស័យសំណង់នៅកម្ពុជាមានការងើបឡើងខ្លាំងនោះ បានជំរុញឲ្យក្រុមហ៊ុនស្ថាបនា និងសាងសង់ចំនួន១១ (ជាតិ-អន្តរជាតិ) ចុះ MOU អនុស្សរណៈយោគយល់គ្នាជាមួយក្រុមហ៊ុន SANY ទិញគ្រឿងចក្របន្ថែមដើម្បីជាការឆ្លើយតបដល់អតិថិជន ។
ថ្លែងប្រាប់អ្នកសារព័ត៌មានកោះសន្តិភាពបន្ទាប់ពីចុះអនុស្សរណៈយោគយល់គ្នាជាមួយក្រុមហ៊ុន SANY កាលពីល្ងាចថ្ងៃទី១២ ធ្នូ នៅសណ្ឋាគារភ្នំពេញ លោក ជា រតនៈ ប្រធានគ្រប់គ្រងទូទៅក្រុមហ៊ុនលាយបេតុងហ្គោលដេន បានមានប្រសាសន៍ថា ៖ « SANY គឺជាក្រុមហ៊ុនផ្គត់ផ្គង់គ្រឿងចក្រមួយចំពោះគុណភាពផលិតផល និងមានតម្លៃអាចទទួលយកបាន បើធៀបនឹងផលិតផលរបស់ក្រុមហ៊ុនផ្សេងទៀតនៅកម្ពុជា ។ SANY ធ្វើឲ្យក្រុមហ៊ុនហ្គោលដេនមានជំនឿទុកចិត្តតាំងពីចាប់ផ្តើមដំណើរការជាលើកដំបូងរបស់ខ្លួន ។ នៅក្នុងជំហានដំបូងយើងបានទិញគ្រឿងចក្រពី SANY ដូចជា ឡានបាញ់បេតុង ឡានក្រឡុង រួមទាំងគ្រឿងបន្លាស់គ្រប់គ្រាន់ ។ មិនតែប៉ុណ្ណោះ SANY ក៏មានការិយាល័យផ្តល់សេវាកម្មនៅក្នុងប្រទេសកម្ពុជាផងដែរ ដើម្បីងាយស្រួលក្នុងការទំនាក់ទំនង ពេលគ្រឿងចក្រមានបញ្ហាក្នុងអំឡុងពេលផ្តល់សេវាជូនអតិថិជនមានភាពលឿនរហ័ស ខុសប្លែកពីការទិញគ្រឿងចក្រពីបរទេសគ្មានអ្នកបច្ចេកទេស ឬជាងនៅក្នុងស្រុក » ។
ស្របពេលវិស័យសំណង់ និងតម្រូវការមានការកើនឡើងខ្លាំង បើតាមលោក ជា រតនៈ មានប្រសាសន៍ថា ៖ « ជាការពិត ដោយសារតម្រូវការពីអតិថិជនកាន់តែច្រើន និងការសម្លឹងឃើញនូវស្ថិរភាពនយោបាយល្អ រួមទាំងកំណើនសេដ្ឋកិច្ចរបស់កម្ពុជានៅតែរក្សាបានកំណើនរឹងមាំពីមួយឆ្នាំទៅមួយឆ្នាំ ទើបជំរុញឲ្យក្រុមហ៊ុនយើងសម្រេចចិត្តចុះ MOU ទិញគ្រឿងចក្រ (ឡានក្រឡុកស៊ីម៉ង់ត៍ និងឡានបាញ់បេតុង) ពីក្រុមហ៊ុន SANY ចំនួន៥គ្រឿងបន្ថែមទៀត ហើយគិតជាទឹកប្រាក់ជាង១លានដុល្លារ ។
គ្រឿងចក្រទាំងនេះមានសមត្ថភាពខ្ពស់ក្នុងការផ្គត់ផ្គង់ តួយ៉ាង ឡានបូម បេតុងអាចបាញ់បេតុងសម្រាប់អគារកម្ពស់ចាប់ពី៤០ជាន់ដល់៥០ជាន់ ។ នៅក្នុងឆ្នាំ២០១៥នេះ វិស័យសំណង់មានការកើនឡើងខ្លាំងធ្វើឲ្យក្រុមហ៊ុនទទួលបានគម្រោងសាងសង់ធំៗជាច្រើន តួយ៉ាង គម្រោងអគារកម្ពស់៤៥ជាន់នៅកោះពេជ្រ, គម្រោងអគារ៣១ជាន់នៅទួលគោក, គម្រោងអគារ៤០ជាន់នៅតំបន់បឹងត្របែក, គម្រោងអគារជាង៣០ជាន់នៅខាងក្រោយព្រះបរមរាជវាំង, គម្រោង៣៧ជាន់នៅតំបន់ផ្សារឌុយម៉ិច, គម្រោងអគារជាង៣០ជាន់តំបន់បុរីកីឡា, គម្រោងអគារជាង២០ជាន់នៅមុខមន្ទីរពេទ្យកាល់ម៉ែត និងគម្រោងអគារ៤២ជាន់ថ្មីមួយទៀតតំបន់ទួលគោក ហើយក្រុមហ៊ុនយើងនឹងចុះកិច្ចសន្យានៅពេលខាងមុខ » ។ល។
លោកបន្តទៀតថា ៖ « នៅក្នុងការធ្វើអាជីវកម្ម វាតែងតែមានការប្រកួតប្រជែងគ្នា ប៉ុន្តែការប្រកួតប្រជែងក្នុងវិស័យលាយបេតុងនេះនៅមិនទាន់ធ្វើអីឲ្យប៉ះពាល់ខ្លាំងក្លាទេ ព្រោះតម្រូវការ និងការផ្គត់ផ្គង់នាពេលសព្វថ្ងៃនេះ វាមានលក្ខណៈសមាមាត្រគ្នា ។ ក្រុមហ៊ុនយើងចាប់ផ្តើមអាជីវកម្មក្នុងវិស័យនេះទើបបានជិតពីរឆ្នាំប៉ុណ្ណោះ តែសន្ទុះនៃការរីកចម្រើនរបស់ក្រុមហ៊ុន គឺមានការងើបឡើងខ្លាំង ដោយផ្អែកលើក្រុមហ៊ុនមានគ្រឿងចក្រប្រើប្រាស់ថ្មីៗ និងសេវាកម្មល្អ, ក្រុមហ៊ុនមានសម្ភារប្រើប្រាស់សម្បូរបែប, យើងមានធនធានមនុស្សល្អ ជាពិសេស ដៃគូនៅក្នុងអាជីវកម្មរបស់យើងមានកិច្ចសហការគ្នាបានល្អ ក្រៅពីមានភាពស្មោះត្រង់ ធ្វើយ៉ាងណា ឲ្យក្រុមហ៊ុនយើងបោះជំហានទៅមុខជាលំដាប់ » ។
ទន្ទឹមនឹងការរីកចម្រើនរបស់ក្រុមហ៊ុន បើតាមលោក ជា រតនៈ បញ្ជាក់ថា ៖ « បច្ចុប្បន្ននេះ ក្រុមហ៊ុនមានសាខាចំនួន៣កន្លែង ហើយនៅដើមឆ្នាំ២០១៦ខាងមុខ ក្រុមហ៊ុននឹងដាក់ឲ្យដំណើរការសាខាបន្ថែមចំនួន៣កន្លែងទៀតនៅក្រុងភ្នំពេញ ដើម្បីឆ្លើយតបនឹងតម្រូវការរបស់អតិថិជន ។ នៅក្នុងអំឡុងឆ្នាំ២០១៥នេះ ការផ្គត់ផ្គត់បេតុងទៅដល់អតិថិជនមានការកើនឡើងមួយទ្វេជាពីរ បើធៀបនឹងឆ្នាំ២០១៤ ហើយនៅក្នុងឆ្នាំ២០១៦ ក្រុមហ៊ុនបានកំណត់គោលដៅរបស់ខ្លួនធ្វើយ៉ាងណា ឲ្យកើនលើសពីឆ្នាំចាស់ពី២៥% ដល់៥០% ដោយពឹងផ្អែកការពង្រីកសាខាផ្គត់ផ្គង់ ផ្អែកលើការទិញគ្រឿងចក្របន្ថែមនៅពេលបច្ចុប្បន្ន រួមទាំងកម្ពុជាមានស្ថិរភាពនយោបាយល្អ និងរក្សាបានកំណើនសេដ្ឋកិច្ចរឹងមាំ » ។
ចំណែកលោក Ly Hua នាយកគ្រប់គ្រងក្រុមហ៊ុន SANY មានប្រសាសន៍ថា ៖ « ក្រុមហ៊ុន SANY បានចូលមកកម្ពុជាតាំងពីឆ្នាំ២០១២ ក្នុងគោលបំណងនាំយកសេវាកម្មរបស់ SANY ឲ្យពលរដ្ឋកម្ពុជាបានសាកល្បងប្រើប្រាស់ជាមួយនឹងផលិតផល SANY ទំនើប ដែលនាំមកពីប្រទេសចិនចូលមកកម្ពុជា។ ផលិតផលទាំងនោះបែងចែកជាផ្នែកដូចជា ៖ គ្រឿងចក្រលាយបេតុង, គ្រឿងចក្រធ្វើផ្លូវ និងគ្រឿងចក្រសម្រាប់កំពង់ផែ ។ នៅក្នុងដំណើរការអាជីវកម្មដំបូងរហូតមកដល់សព្វថ្ងៃនេះ ក្រុមហ៊ុនបានប្រាក់ពីការជួល និងលក់គ្រឿងចក្ររបស់ខ្លួនមានប្រមាណ១០០លានដុល្លារ ហើយបើគិតជាភាគរយនៃការលក់ចេញក្នុងមួយឆ្នាំៗមានកំណើនប្រមាណ២៥% បើធៀបនឹងឆ្នាំកន្លងមក » ។
លោកបញ្ជាក់ថា ៖ « ក្នុងទិសដៅរបស់ក្រុមហ៊ុន SANY សម្រាប់ឆ្នាំ២០១៦ខាងមុខក្រុមហ៊ុនបានកំណត់ផែនការថា ត្រូវរកប្រាក់ពីការជួល និងលក់គ្រឿងចក្រឲ្យបានចំនួន១៦០លានដុល្លារ ដោយផ្អែកលើក្រុមហ៊ុនមានតំណាងក្រុមហ៊ុនលក់ទាំងនៅក្រុងភ្នំពេញ និងនៅតាមបណ្តាខេត្ត ។ លើសពីនេះទៀត ក្រុមហ៊ុនថែមទាំងទទួលបានគម្រោងស្ថាបនាផ្លូវហាយវេមួយចំនួន រួមទាំងគម្រោងសាងសង់ផ្ទះ ជាដើម » ។
« នៅក្នុងឆ្នាំ២០១៤ បើគិតទៅលើវិស័យវិនិយោគបរទេសនៅកម្ពុជា តួលេខនៃលំហូរវិនិយោគរបស់ចិនបានឈរនៅចំណាត់ថ្នាក់លេខ១ នៅកម្ពុជា ដែលមានទំហំវិនិយោគប្រមាណ៨៨៤,៥លានដុល្លារ និងក្នុងរយៈពេល១១ (មករា-វិច្ឆិកា) ឆ្នាំ២០១៥ មានប្រមាណ៧៨៣,១២លានដុល្លារ ។ តួលេខនៃលំហូរវិនិយោគនេះបានបង្ហាញនូវការបោះជំហានឆ្ពោះទៅមុខនៃកិច្ចសហប្រតិបត្តិការកាន់តែទូលំទូលាយ ស៊ីជម្រៅកាន់តែខ្លាំង និងមានទំហំធំធេងថែមទៀត ជាពិសេស កិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ (កម្ពុជា-ចិន) » ។ នេះបើយោងតាមប្រសាសន៍របស់លោកឧបនាយករដ្ឋមន្ត្រី គាត ឈន់ រដ្ឋមន្ត្រីប្រចាំការ ថ្លែងក្នុងពិធីសម្ពោធសៀវភៅរូបថតមិត្តល្អ មិត្តពិតប្រាកដកាលពីថ្ងៃទី១១ ធ្នូ នៅសណ្ឋាគាសូហ្វីតែលភ្នំពេញភូគីត្រា ៕
ចែករំលែកព័តមាននេះ