រាជធានីភ្នំពេញ៖ ក្រសួងបរិស្ថាន ក្នុងនាមសេនាធិការនៃរាជរដ្ឋាភិបាល និងមន្ត្រីរបស់ខ្លួន មានការទទួលខុសត្រូវក្នុងភាព ជាម្ចាស់ ក្នុងការបំពេញតួនាទី និងភារកិច្ចរបស់ខ្លួនលើការការពារ និងអភិរក្សធនធានធម្មជាតិ ដោយឈរនៅលើមូលដ្ឋានច្បាប់ជាធរមាន។
ជាមួយនឹងមន្ត្រីឧទ្យានុរក្សចំនួន ១២៦០ នាក់របស់ខ្លួន ក្រសួងបរិស្ថាន បានសហការជាមួយកម្លាំងមានសមត្ថកិច្ចពាក់ព័ន្ធ ចុះល្បាត និងទប់ស្កាត់បទល្មើសធនធានធម្មជាតិ នៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ទាំង ៧៥កន្លែង ដែលមានផ្ទៃដីសរុប ៧,៣លានហិកតា។
តាមក្រសួងបរិស្ថាន រយៈពេល ៦ ខែឆ្នាំ២០២១ ពីខែមករា ដល់ខែមិថុនា ឆ្នាំ២០២១ មន្ត្រីឧទ្យានុរក្ស បានចុះល្បាតនៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ សរុបចំនួន ១៤.៤២២ លើក ក្នុងនោះបានបង្ក្រាបបទល្មើសធនធានធម្មជាតិ បានចំនួន ៤.២៣៨ ករណី។ ក្នុងចំណោមបទល្មើសទាំងនោះ បានធ្វើការពិន័យអន្តរការណ៍ ចំនួន ៥១១ ករណី និងបានចងក្រងសំណុំរឿងបញ្ជូនទៅ តុលាការបានចំនួន ៥១៥ករណី ដែលករណីភាគច្រើន ទាក់ទងនឹងការទន្ទ្រានកាន់កាប់ដីព្រៃរដ្ឋ ក្នុងតំបន់អភិរក្សដោយខុសច្បាប់ ការកាប់បំផ្លាញឈើ ការបរបាញ់សត្វ ជាដើម។ ទិន្នន័យនេះ មានចំនួនប្រហាក់ប្រហែលគ្នា ក្នុងរយៈពេលដូចគ្នា នៅឆ្នាំ២០២០។
ក្រសួងបរិស្ថាន បន្ថែមថា ក្នុងប្រតិបត្តិការបង្ក្រាបបទល្មើសនេះ មន្ត្រីឧទ្យានុរក្សបានរឹបអូសរណាយន្ត បានចំនួន ២.៤៦២ គ្រឿង ដកហូតរថយន្តចំនួន ១៨២ គ្រឿង គោយន្តចំនួន ៣០៨ គ្រឿង ម៉ូតូចំនួន ៣៣៦ គ្រឿង ត្រាក់ទ័រចំនួន ២៤ គ្រឿង ឈើចំនួន ១.២៦០ម៉ែត្រគូប។
ជាមួយគ្នានេះ មន្ត្រីឧទ្យានុរក្ស និងសហគមន៍តំបន់ការពារធម្មជាតិ បានរឹបអូសអន្ទាក់ ចំនួន ២៥.៥៩៦ អន្ទាក់ និងកាំភ្លើងកែច្នៃចំនួន ៣៤៨ ដើម។
ក្រសួងបរិស្ថាន គូសបញ្ជាក់ថា បទល្មើសធនធានធម្មជាតិទ្រង់ទ្រាយធំ លែងមាន នៅក្នុងតំបន់ការពារធម្មជាតិទៀតហើយ តែនៅមានបទល្មើសទ្រង់ទ្រាយតូចៗ កើតឡើង ដែលសមត្ថកិច្ចក្រសួងបរិស្ថាន និងសមត្ថកិច្ចពាក់ព័ន្ធ បាន និងកំពុងបន្តអនុវត្តច្បាប់ ដោយការទទួលខុសត្រូវ។
ក្រសួងបរិស្ថាន នឹងបន្តបេសកកម្មរបស់ខ្លួន ប្រកបដោយការទទួលខុសត្រូវខ្ពស់ និងវិជ្ជាជីវៈ ក្នុងការគ្រប់គ្រង និងអភិរក្សតំបន់ការពារធម្មជាតិ នៅក្នុងប្រទេសកម្ពុជា សម្រាប់មនុស្សរាប់ជំនាន់ ទៅមុខទៀត។ នេះគឺជាកិច្ចខិតខំប្រឹងប្រែងរួមគ្នារបស់មន្ត្រីឧទ្យានុរក្សនៃក្រសួងបរិស្ថាន សហគមន៍តំបន់ការពារធម្មជាតិ និងអង្គការដៃគូ ក្នុងកិច្ចការពារ និងអភិរក្សធនធានធម្មជាតិនៅកម្ពុជា។
ទន្ទឹមនឹងការអនុវត្តច្បាប់ ក្រសួងបរិស្ថាន បាន និងកំពុងអនុវត្តនូវគោលនយោបាយបង្កើតសេដ្ឋកិច្ចមូលដ្ឋាន ផ្តល់ជម្រើសមុខរបរថ្មី ជូនប្រជាពលរដ្ឋ រស់នៅក្នុងសហគមន៍តំបន់ការពារធម្មជាតិ ដើម្បីផ្តល់ចំណូលជាប្រចាំ សម្រាប់ការរស់នៅរបស់ពលរដ្ឋ តាមរយៈការផ្សារភ្ជាប់រវាងការអភិរក្ស និងការអភិវឌ្ឍទេសចរណ៍ធម្មជាតិ ការបង្កើនការចិញ្ចឹមសត្វ ការដាំដំណាំរួមផ្សំផ្សេងទៀត។
ដោយសារតែការការពារ និងអភិរក្សមានភាពល្អប្រសើរ ធនធានធម្មជាតិ ព្រៃឈើ ត្រូវបានការពារបានល្អប្រសើរ កម្ពុជាបានទទួលជោគជ័យលើការលក់ឥណទានកាបូន នៅលើទីផ្សារស្ម័គ្រចិត្តអន្តរជាតិ ក្រោមទិសស្លោក «រក្សាឈើឈរ ដើម្បីលក់ឥណទានកាបូន»។ សត្វព្រៃ ត្រូវបានថែរក្សាការពារបានល្អប្រសើរ។ ស្ថានភាពជីវភាពពលរដ្ឋ នៅតាមសហគមន៍តំបន់ការពារធម្មជាតិ ចាប់ផ្តើមមានភាពល្អប្រសើរផ្សារភ្ជាប់នឹងទេសចរណ៍ធម្មជាតិ និងជម្រើសថ្មីក្នុងមុខរបររបស់ខ្លួន៕ សុខ សារ៉ាយ
ចែករំលែកព័តមាននេះ