ផ្សារច្បារអំពៅអាចបិទបណ្តោះអាសន្នជាលើកទី២ ក្រោយផ្ទុះកូវីដ-១៩
- ភ្នំពេញ
រាជធានីភ្នំពេញ ៖ អភិបាលរងរាជធានីភ្នំពេញ លោក កើត ឆែ បានឲ្យកោះសន្តិភាពដឹង នៅមុននេះបន្តិចថា ផ្សារច្បារអំពៅ អាចបិទបណ្តោះអាសន្ន…
រាជធានីភ្នំពេញ ៖ អភិបាលរងរាជធានីភ្នំពេញ លោក កើត ឆែ បានឲ្យកោះសន្តិភាពដឹង នៅមុននេះបន្តិចថា ផ្សារច្បារអំពៅ អាចបិទបណ្តោះអាសន្ន ប៉ុន្តែត្រូវរង់ចាំលទ្ធផលថ្ងៃល្ងាចនេះសិន ។
ការលើកឡើងរបស់លោក កើត ឆែ ធ្វើឡើងក្រោយពីមានករណីផ្ទុះឡើងនូវកូវីដ-១៩ នៅផ្សារច្បារអំពៅ នៅព្រឹកថ្ងៃទី ១៥ ខែកក្កដា នេះ ។
តាមការអោយដឹងពីលោក ញាណ ច័ន្ទសោភា នាយករដ្ឋបាលសាលាខណ្ឌច្បារអំពៅ គិតត្រឹមវេលាម៉ោង ១៦ និង៣០នាទីល្ងាចនេះ លទ្ធផលសំណាកលើអាជីវករផ្សារច្បារអំពៅ ពិនិត្យឃើញវិជ្ជមាន២១នាក់ ។ ហើយដំណើរការ នៃការបន្តតេស្តនៅប្រព្រឹត្តិទៅដដែល នៅក្នុងបរិវេណសាលាបឋមសិក្សាច្បារអំពៅ ដោយមិនទាន់ចប់ឡើយ ខណៈបងប្អូនអាជីវករ និងអ្នកពាក់ព័ន្ធមកជាបន្តបន្ទាប់ ។
សូមបញ្ជាក់ថា ក្រុមអាជីករលក់ដូរក្នុង និងក្រៅផ្សារច្បារអំពៅ១៧នាក់ ត្រវបានរកឃើញមានវិជ្ជមានជម្ងឺកូវីដ១៩ ក្នុងរយៈពេល២ថ្ងៃ គិតចាប់ពីថ្ងៃទី១៣ ខែកក្កដា ឆ្នាំ២០២១ កន្លងមក បន្ទាប់ពីដំបូងឡើយបានពិនិត្យឃើញមានវិជ្ជមានលើក្រុមសន្តិសុខផ្សារចំនួន៣នាក់ កាលពីថ្ងៃទី១២ ខែឆ្នាំដដែល ។
លោកគ្រី ហ៊ុច អនុប្រធានគណៈកម្មការគ្រប់គ្រងផ្សារច្បារអំពៅបានប្រាប់កោះសន្តិភាពតាមរយៈទូរស័ព្ទអោយដឹងថា ៖ ដំបូងឡើយក្រុមគណៈកម្មការគ្រប់គ្រងផ្សារទាំងអស់បានធ្វើតេស្តរកមេរោគកូវីដ១៩ទាំងអស់គ្នា ក្រោយមកលទ្ធិផលបញ្ជាក់ថា ក្រុមសន្តិសុខផ្សារ៣នាក់ មានវិជ្ជមាន ។
បន្ទាប់ពីមានវិជ្ជមានហើយនោះគណៈកម្មការគ្រប់គ្រងផ្សារបានធ្វើការអំពាវនាវដល់បងប្អូនអាជីវករលក់ដូរក្នុង និងក្រៅផ្សារទាំងអស់ សូមរុះរាន់ទៅយកសំណាកអោយបានគ្រប់ៗគ្នាជៀសវៀងមានការចម្លងកាន់តែខ្ពស់ ។ បន្ទាប់ពីមានការណែនាំពីគណៈកម្មការគ្រប់គ្រងផ្សាររួចមកក្រុមបងប្អូន អាជីវករលក់ដូរក្នុង និងក្រៅផ្សារ បាននាំគ្នាទៅយកសំណាកជាបន្តបន្ទាប់រយៈពេល២ថ្ងៃ គិតចាប់ពីថ្ងៃទី១៣ ខែកក្កដា ឆ្នាំ២០២១ ដល់ថ្ងៃទី១៤ ខែឆ្នាំដដែលក៏លទ្ធិផល នៃការតេស្តសំណាកបញ្ជាក់ថា មានវិជ្ជមានកូវីដ១៩ចំនួន១៧នាក់ ក្នុងនោះ១៣នាក់ ជាអាជីវករលក់ដូរក្នុងផ្សារ និង៤នាក់លក់ដូរនៅខាងក្រៅផ្សារ ។
លោកគ្រី ហ៊ុច បានបន្តប្រាប់អោយដឹងថា តូចលក់ដូរនៅក្នុងផ្សារទាំងអស់មានសរុប១៤៤៧តូប ហើយនៅខាងក្រៅផ្សារមានជាង៣០០តូប ប៉ុន្តែចាប់គិតតាំងពីមានការបើកអោយដំណើរការផ្សារវិញមក ឃើញថា ការលក់ដូរមិនមានណែនណាន់តាន់តាប់ដូចមុននោះ ពោលទាំងក្នុងទាំងក្រៅ មានត្រឹម៥០ភាគរយ នៃការលក់ប៉ុណ្ណោះ ។ ហើយចំនួន៥០ភាគរយនៃតូបដែលលក់ទាំងក្នុង និងក្រៅនោះ គឺមានចំនួនមនុស្សសរុបប្រមាណជិត៥០០នាក់ ។
លោកអនុប្រធានគណៈកម្មការគ្រប់គ្រងផ្សារបានបញ្ជាក់ជាមួយកោះសន្តិភាពថា ៖ តាំងពីមានការសម្រេចអនុញ្ញាត្តិអោយផ្សារដំណើរអោយបងប្អូនអាជីវករលក់ដូរវិញមក សម្រាប់អាជីវករដែលមានកម្រិតជីវភាពធូរធារ គេមិនមកលក់ឡើយ ដោយទុកតូបចាក់សោរចោល ព្រោះខ្លាចមានការឆ្លងនៃជម្ងឺកូវីដ១៩ ។ ដោយឡែកអាជីវករដែលបន្តមកលក់ គឺភាគច្រើនជាអ្នកមានកម្រិតជីវភាពមធ្យម ឬធម្មតា ហើយពិសេសនោះ គឺអាជីវករខ្លះមានម៉ូយទិញអ៊ីវ៉ាន់ច្រើនក៏សម្រេចមកលក់នឹងគេនឹងឯងតែម្តង ៕
ចែករំលែកព័តមាននេះ