អ្នកជំនាញមជ្ឍមណ្ឌលកងឯកភាពកំចាត់មីនទី៤ ហៅកាត់ថា ស៊ីម៉ាក់ បានបន្តជីកកកាយ និងប្រមូលគ្រាប់បែកដៃ ដែលមិនទាន់ផ្ទុះសល់ពីសម័យសង្គ្រាម បានចំនួន៨០គ្រាប់បន្ថែមទៀត បន្ទាប់ពីរកឃើញមុនចំនួន
ខេត្តសៀមរាប ៖ នៅរសៀលថ្ងៃទី១២ ខែកក្កដា ឆ្នាំ២០២១នេះ អ្នកជំនាញមជ្ឍមណ្ឌលកងឯកភាពកំចាត់មីនទី៤ ហៅកាត់ថា ស៊ីម៉ាក់ បានបន្តជីកកកាយ និងប្រមូលគ្រាប់បែកដៃ ដែលមិនទាន់ផ្ទុះសល់ពីសម័យសង្គ្រាម បានចំនួន៨០គ្រាប់បន្ថែមទៀត បន្ទាប់ពីរកឃើញមុនចំនួន៣២៥គ្រាប់ សរុប៤០៥ គ្រាប់កាលពីថ្ងៃទី១០ ខែកក្កដា ឆ្នាំ២០២១ នៅប៉ែកខាងជើងក្បែររបងវិទ្យាល័យ១០ មករា១៩៧៩ ស្ថិតក្នុងភូមិមណ្ឌល២ សង្កាត់ស្វាយដង្គំ ក្រុង ខេត្តសៀមរាប។ ហើយគ្រាប់បែកទាំងនេះ សុទ្ធតែមានសុពលភាពផ្ទុះ និងមានហានិភ័យខ្ពស់។
បើតាមលោក អ៊ាន សុធា ប្រធានកងឯកភាពកំចាត់មីនទី៤ ប្រចាំខេត្ដសៀមរាប និងខេត្ដកំពង់ធំ បានឱ្យដឹងថា គ្រាប់បែកដៃទាំង៤០៥គ្រាប់នោះ ផលិតនៅប្រទេសអង់គ្លេស ម៉ាក់ (36 UK ) វាអាចប្រឈមគ្រោះថ្នាក់ដល់មនុស្ស ប្រសិនបើមានការប៉ះទង្គិច ឬមិនបានប្រុងប្រយ័ត្នធ្វើជ្រុះធ្លាក់ទៅលើដី។ លោកបានបន្ដថា គ្រាប់បែកដៃនោះ ត្រូវគេបានកប់វាចោលជាច្រើនឆ្នាំមកហើយ ដែលនៅចំណុចនេះជាឃ្លាំងគ្រាប់មួយកន្លែងនៅក្នុងក្រុងសៀមរាប នាសម័យសង្គ្រាមអំឡុងទសវត្សទី៧០។
លោកបានបញ្ជាក់ថា គ្រាប់បែកទាំងនេះ គឺដំបូងឡើយប្រទះឃើញដោយក្រុមកម្មករនៃមន្ទីរប្រៃសណីយ៍ និងទូរគមនាគមន៍ខេត្តសៀមរាប ពេលកំពុងជីកដីកប់ប្រព័ន្ធខ្សែកាប្លិ៍ក្រោមដី កាលពីថ្ងៃទី ១០ ខែកក្កដា កន្លងមកនេះ ហើយពិតជាសំណាងណាស់ ដែលកាយឃើញគ្រាប់បែក តែមិនបានជីកប៉ះខ្លាំង បើសិនជីកប៉ះចំវាអាចនឹងផ្ទុះភ្លាមៗផងដែរ។
លោក អ៊ាន សុធា ក៏បានអំពាវនាវដល់ប្រជាពលរដ្ឋគ្រប់មជ្ឈដ្ឋានទាំងអស់ បើប្រទះឃើញគ្រាប់ ឬយុទ្ធភ័ណ្ឌមិនទាន់ផ្ទុះគ្រប់ប្រភេទ សូមផ្តល់ដំណឹង ឬរាយការណ៍ទៅអាជ្ញាធរដែនដី ឬក៏សមត្ថកិច្ចដែលនៅកៀកក្បែរលំនៅឋានបងប្អូន ឬមួយរាយការណ៍ទៅមន្ត្រីស៊ីម៉ាក់ដោយផ្ទាល់ក៏បាន។
បច្ចុប្បន្នគ្រាប់បែកទាំងនេះ ត្រូវបានយកទៅរក្សាទុកនៅទីបញ្ជាការ កងឯកភាពកំចាត់មីនទី៤ ខេត្តសៀមរាប ស្ថិតនៅឃុំត្រពាំងធំ ស្រុកប្រាសាទបាគង ខេត្ដសៀមរាប៕
ចែករំលែកព័តមាននេះ