រាជធានីភ្នំពេញ ៖ អ្នកវិជ្ជមានកូវីដ១៩ ចំនួន១៩នាក់ ក្នុងចំណោម២១នាក់ រស់នៅក្នុងសង្កាត់បឹងទំពន់ទី១ នៃខណ្ឌមានជ័យ ត្រូវ
រាជធានីភ្នំពេញ ៖ អ្នកវិជ្ជមានកូវីដ១៩ ចំនួន១៩នាក់ ក្នុងចំណោម២១នាក់ រស់នៅក្នុងសង្កាត់បឹងទំពន់ទី១ នៃខណ្ឌមានជ័យ ត្រូវបានអនុញ្ញាត្តិអោយសម្រាកព្យាបាល នៅតាមលំនៅឋានរៀងៗខ្លួន ក្រោយក្រុមគ្រូពេទ្យរកឃើញមានវិជ្ជមាននៅថ្ងៃទី១២ ខែកក្កដា ឆ្នាំ២០២១ ។
អ្នកវិជ្ជមានទាំង២១នាក់ខាងលើ គឺរកឃើញនៅ៣ទីតាំងផ្សេងគ្នា ក្នុងភូមិចំនួន២ មានភូមិចំរើនផលទី៤ និងភូមិសន្សំកុសលទី២ ។
លោកកុយ សាមឺឌី ស្មៀនសង្កាត់បឹងទំពន់ទី១ បានប្រាប់អោយដឹងថា អ្នកវិជ្ជមានកូវីដ១៩ ទាំង២១នាក់ មាន១៩នាក់ ត្រូវក្រុមគ្រូពេទ្យ អនុញ្ញាតអោយព្យាបាលដោយខ្លួនឯងនៅក្នុងផ្ទះ គឺក្រុមគ្រូពេទ្យបានធ្វើការពិនិត្យលើអាការះសុខភាព ឃើញថាមានសុខភាពមាំទាំល្អ ហើយទីសំណាក់របស់ពួកគេគឺមានលក្ខណះធំទូលាយ មានខ្យល់គ្រប់គ្រាន់ចេញចូល ទើបក្រុមគ្រូពេទ្យសម្រេចអនុញ្ញាត្តិអោយសម្រាកនៅផ្ទះព្យាបាល ដោយគោរពតាមគោលការណែនាំមួយចំនួន ពិសេសវិធានសុខាភិបាល ។ ដោយឡែកអ្នកវិជ្ជមាន២នាក់ទៀត ត្រូវក្រុមគ្រូពេទ្យដឹកយកទៅព្យាបាល ព្រោះពួកគេស្នាក់នៅបន្ទប់ជួល ដោយពុំមានលក្ខណះសម្បត្តិទីតាំងគ្រប់គ្រាន់ ( បន្ទប់តូច គ្មានខ្យល់ចេញចូល ) ។
ស្មៀនសង្កាត់ដដែលបន្តថា អ្នកវិជ្ជមានទាំង១៩នាក់ ដែលអនុញ្ញាត្តិអោយសម្រាកព្យាបាលនៅផ្ទះ ត្រូវបានណែនាំអោយដាក់ខ្លួនអោយនៅដាច់ដោយឡែក ពីសមាជិកក្នុងគ្រួសារ ហើយត្រូវពាក់ម៉ាស់ បាញ់អាល់កុលអោយទៀងទាត់ ត្រូវនៅកន្លែងដែលមានខ្យល់ចេញចូល ធ្វើលំហាត់ប្រាណជាប្រចាំ សម្រាក និងញ៉ាំម្ហូបអាហារដែលមានជីវជាតិគ្រប់គ្រាន់ ក៏ដូចជាញ៉ាំទឹកអោយបានច្រើន ហើយពិសេសនោះ បើក្នុងករណីអាការះសុខភាពមានការធ្វើទុក្ខណាមួយនោះ គឺត្រូវទំនាក់ទំនងទៅកាន់ក្រុមគ្រូពេទ្យដែលប្រចាំការក្នុងមូលដ្ឋានសង្កាត់ ដើម្បីចុះពិនិត្យតាមដានអាការះសុខភាពបន្តទៀត ។
លោកបានបន្តថា ចំពោះកុមារតូចៗ ឬមនុស្សចាស់ជរានោះ គឺពុំត្រូវអនុញ្ញាតអោយមានការសម្រាកព្យាបាលនៅផ្ទះឡើយ គឺត្រូវដឹកយកទៅព្យាបាល លើកលែងតែជាមនុស្សជំទង់ មានសុខភាពមាំទាំងពេញកម្លាំងប៉ុណ្ណោះដែលត្រូវបានអនុញ្ញាត ។ ទន្ទឹមនឹងការអនុញ្ញាតអោយសម្រាកនៅផ្ទះដោយខ្លួនឯងនោះ គឺពុំមានការផ្តល់ថ្នាំសម្រាប់លេបឡើយ ដោយសារមិនទាន់មានគោលការណ៍ក្នុងការផ្តល់ជូនសម្រាប់លេប ។ ក្នុងនោះក្រុមគ្រូពេទ្យបានណែនាំអោយ អ្នកជម្ងឺអាចពឹងពាក់បងប្អូនសាច់ញាតិ ឬអ្នកស្គាល់គ្នា ជួយទិញថ្នាំតាមឱសថស្ថាន មកលេបដោយខ្លួនឯង ឧទាហរណ៍ថា បើមានអាការះឈឺ ក សូមទិញថ្នាំឈឺ ក មានអាការៈឈឺក្បាលសូមទិញថ្នាំឈឺក្បាល ជាដើម ។
សូមបញ្ជាក់ថា ចំពោះទីតាំងដែលត្រូវរកឃើញមានអ្នកវិជ្ជមានកូវីដ១៩ហើយនោះ ក្រុមអាជ្ញាធរ បានសម្រេចធ្វើការផ្លុំបេទីតាំងជាបណ្តោះអាសន្ន ។ ក្នុងនោះដែរ សមាជិកដែលនៅក្នុងទីតាំង ក្រោយតេស្តសំណាកឃើញថា អវិជ្ជមានហើយនោះ គឺត្រូវតម្រូវអោយធ្វើចត្តាឡីស័ក្ត១៤ថ្ងៃទាំងអស់គ្នា ។
គួរបញ្ជាក់ថា ចំពោះការអនុញ្ញាតអោយអ្នកជម្ងឺសម្រាកព្យបាលនៅផ្ទះដោយខ្លួនឯងនោះ គឺពុំមែនជាការអនុញ្ញាត្តិអោយឯកឯងពីសំណាក់ក្រុមគ្រូពេទ្យឡើយ គឺដោយមានការស្នើសុំពីអ្នកជម្ងឺ ហើយបន្ទាប់ពីមានការស្នើរសុំរួច ក្រុមគណៈកម្មាការ មានគ្រូពេទ្យ និងអាជ្ញាធរតំបន់ នឹងពិនិត្យ ធ្វើការវាយតម្លៃ លើអាការៈអ្នកជម្ងឺ ទីតាំងសំណាក់ដែលកំពុងរស់នៅ បូករួមជាមួយចំនួនសមាជិកក្នុងគ្រួសារជាដើម មុនឈានដល់ការអនុញ្ញាតអោយសម្រាកព្យាបាលនៅផ្ទះដោយខ្លួនឯង ។ ហើយវិធាននៃការព្យាបាល និងការពារ គឺដូចបានរៀបរាប់ជូនខាងលើ ៕
ចែករំលែកព័តមាននេះ