រាជធានីភ្នំពេញ ៖ វាជារឿងមួយចម្លែកមែនទែន នៅពេលទីផ្សារអង្ករលើឆាកអន្តរជាតិមានកំណើនឡើង បែរជាការនាំចេញអង្កររបស់កម្ពុជារយៈពេល ១ ឆមាស ២០២១ នេះ មានការធ្លាក់ចុះទៅវិញពោល…
រាជធានីភ្នំពេញ ៖ វាជារឿងមួយចម្លែកមែនទែន នៅពេលទីផ្សារអង្ករលើឆាកអន្តរជាតិមានកំណើនឡើង បែរជាការនាំចេញអង្កររបស់កម្ពុជារយៈពេល ១ ឆមាស ២០២១ នេះ មានការធ្លាក់ចុះទៅវិញពោល គឺបានធ្លាក់ចុះរហូតដល់ជិត ៣០ ភាគរយបើធៀបនឹងរយៈពេលដូចគ្នាកាលពីឆ្នាំ ២០២០ កន្លងទៅ ។
បើតាមលោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជាថ្លែងក្នុងបទសម្ភាសន៍ជាមួយសារព័ត៌មានក្នុងស្រុកបានឱ្យដឹងថា រហូតមកដល់ពាក់កណ្ដាលឆ្នាំ ២០២១ នេះ បណ្ដាប្រទេសមួយចំនួននៅលើពិភពលោកនៅតែមានការបិទខ្ទប់ប្រទេសរបស់ខ្លួនដដែលដូច្នេះតម្រូវការស្បៀងនៃប្រទេសទាំងនោះក៏នៅមានខ្ពស់ ហើយបណ្ដាប្រទេសមួយចំនួនទៀតដែលមានស្ថានភាពកូវីដ ១៩ ល្អប្រសើរឡើងវិញ ក៏បានបើកសេដ្ឋកិច្ចឡើងវិញ ហើយនៅពេលដែលគេបើកសេដ្ឋកិច្ចឡើងវិញ មិនមែនមានតែស្បៀងអាហារមួយមុខទេដែលមានតម្រូវការគឺទំនិញស្ទើរតែគ្រប់មុខទាំងអស់ក៏មានតម្រូវការដូចគ្នា ។
លោកបន្តថា តម្រូវការស្បៀងអាហារដូចជាអង្ករនៅលើប្រទេសជាច្រើនចាប់ផ្ដើមមានខ្ពស់ ប៉ុន្តែការនាំចេញអង្កររបស់កម្ពុជានៅតែមានការធ្លាក់ចុះ ដោយសារកត្តាមួយចំនួន ។ លោកថា ៖ «ចុងឆ្នាំ ២០២០ និងដើមឆ្នាំ ២០២១ នេះ ទិន្នផលស្រូវរបស់កម្ពុជាយើងមិនមែនធ្លាក់ចុះទេ ពោលគឺមានភាពល្អប្រសើរជាមួយនឹងតម្លៃក៏ អាចទទួលយកបាន ប៉ុន្តែកង្វះមធ្យោបាយដឹកជញ្ជូនទៅកាន់ប្រទេសជាគោលដៅ ដែលជាហេតុដើមធ្វើឱ្យការនាំចេញរបស់យើងធ្លាក់ចុះ ។ មិនតែប៉ុណ្ណោះ តម្លៃនៃការដឹកជញ្ជូនក៏មានការកើនឡើងពី ៥ ទៅ ១០ ដងឯណោះបើធៀបនឹងឆ្នាំមុន ហើយក៏ពិបាកក្នុងការស្វែងរកកប៉ាល់ដឹកជញ្ជូនទៅទៀត» ។
លោកបន្ថែមថា អង្ករជាទំនិញមួយប្រភេទចាត់ទុកថា ជាទំនិញធន់ធ្ងន់ហើយពិបាកក្នុងការរកកុងតឺន័រសម្រាប់ផ្ទុកទៅទៀត ខណៈកុងតឺន័រជាច្រើនត្រូវបានយកទៅដឹកទំនិញធន់ស្រាលៗជំនួសវិញ ។ ទាំងនេះហើយដែលជាកត្តាធ្វើឱ្យការដឹកជញ្ជូនអង្កររបស់កម្ពុជាទៅកាន់ទីផ្សារអន្តរជាតិជាពិសេសប្រទេសឆ្ងាយៗដូចជាបណ្ដាប្រទេសនៅអឺរ៉ុបសហរដ្ឋអាមេរិកជាដើម មានការធ្លាក់ចុះ ។ ដោយសារការដឹកជញ្ជូនឡើងថ្លៃនេះហើយដែលធ្វើឱ្យអង្កររបស់កម្ពុជាលក់ទីផ្សារប្រទេសនីមួយៗត្រូវឡើងថ្លៃដូចគ្នា ធ្វើឱ្យឈ្មួញនាំចូលអង្ករស្ទាក់ស្ទើរក្នុងការបញ្ជាទិញអង្ករពីកម្ពុជា ។ លោកថា ៖«តម្លៃអង្ករកម្ពុជាមួយកុងតឺន័រមានតម្លៃប្រមាណ ១៧០០០ ដុល្លារអាមេរិក ហើយការដឹកជញ្ជូនត្រូវចំណាយប្រមាណពី ៧០០០ ដុល្លារទៅ ១ ម៉ឺនដុល្លារគឺស្ទើរតែស្មើនឹងតម្លៃអង្ករទៅហើយ ប៉ុន្តែប្រទេសមួយចំនួនដែលខ្សត់ស្បៀងនៅតែហ៊ានបង់លុយក្នុងការទិញអង្ករពីកម្ពុជា ហើយប្រទេសខ្លះទៀតក៏បានផ្អាកការបញ្ជាទិញពីកម្ពុជាមួយរយៈសិន» ។
លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា ក៏បានលើកឡើងផងដែរថា វាជាការពិតណាស់ដែលតម្លៃដឹកជញ្ជូនពីកម្ពុជាទៅប្រទេសប៉ែកអឺរ៉ុបនិងប្រទេសឆ្ងាយៗមានការកើនឡើង ។ សម្រាប់អង្ករ វារឹតតែពិបាកក្នុងការស្វែងរកកុងតឺន័រសម្រាប់ផ្ទុកទៅទៀត ពីព្រោះកុងតឺន័រដែលបញ្ជូនមកកម្ពុជា ភាគច្រើនជាកុងតឺន័រខ្នាតវែងសម្រាប់ដឹកទំនិញស្រាលដូចជាក្រណាត់ និងស្បែកជើង តែសម្រាប់ទំនិញអង្ករគឺត្រូវកុងតឺន័រខ្នាតខ្លី ព្រោះវាធ្ងន់ ដូច្នេះហើយទើបពិបាករកកុងតឺន័រខ្នាតខ្លីសម្រាប់ដាក់អង្ករណាស់ ។
លោកឧកញ៉ាបន្តថា ម្យ៉ាងទៀតដោយសារតែវិបត្តិកូវីដ ១៩នៅតែបន្តអូសបន្លាយធ្វើឱ្យចរាចរណ៍កប៉ាល់ក៏មិនសូវមានច្រើនដូចពីមុនទៅកាន់ប្រទេសឆ្ងាយៗដូច្នេះហើយ ទើបការដឹកជញ្ជូនក៏ត្រូវឡើងថ្លៃ និងពិបាកក្នុងការកក់កន្លែងសម្រាប់ដាក់កុងតឺន័រទៅកាន់ប្រទេសឆ្ងាយទៅទៀត ។ លោកបញ្ជាក់ថា សម្រាប់សកម្មភាពក្រុមហ៊ុនដឹកជញ្ជូនក្នុងស្រុកវិញ ក្នុងបរិបទកូវីដ ១៩ នេះក៏ទទួលរងផលប៉ះពាល់មួយចំនួនធំដែរ ដោយក្រុមហ៊ុនខ្លះត្រូវផ្អាកសកម្មភាពដោយសារតែការរីករាលដាលការបិទខ្ទប់ កាលពីអំឡុងខែមេសា និងឧសភា តែរហូតមកដល់ពេលនេះបើទោះបីជាកម្ពុជាបើកដំណើរការចរាចរណ៍ឡើងវិញក្ដីតែសកម្មភាពក៏មិនទាន់ជាសកម្មដូចកាលពីមុននោះឡើយ ។
គួរបញ្ជាក់ថា ក្នុងរយៈពេល ១ ឆមាសដើមឆ្នាំ ២០២១ នេះ កម្ពុជានាំចេញអង្ករទៅកាន់ទីផ្សារអន្តរជាតិមានចំនួន ២៨០.៤៥០តោន មានការថយចុះប្រមាណ ២៩,៤៧ ភាគរយ ។ គិតជាទឹកប្រាក់នាំចេញអង្កររយៈពេល ៦ ខែដើមឆ្នាំនេះមានចំនួន ២៣៧,៥៤ លានដុល្លារអាមេរិក ។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទកម្ពុជាចេញផ្សាយកាលពីដើមខែកក្កដា ២០២១ ៕
ចែករំលែកព័តមាននេះ