ខេត្តសៀមរាប ៖ នៅរសៀលថ្ងៃទី០៧ ខែកក្កដា ឆ្នាំ២០២១នេះ រដ្ឋបាលខេត្តសៀមរាប បានប្រកាសរកឃើញអ្នកវិជ្ជមានជំងឺកូវីដ-១៩ថ្មី ចំនួន៥១នាក់ ក្នុងនោះមាន ៖ ក្រុងសៀមរាប ចំនួន២៨នាក់, ស្រុកជីក្រែង ចំនួន ១៣នាក់, ស្រុកប្រាសាទបាគង ចំនួន០៣នាក់, ស្រុកពួក ចំនួន០៣នាក់, ស្រុកស្រីស្នំ ចំនួន០២នាក់, ស្រុកសូទ្រនិគម ចំនួន០១នាក់ និងស្រុកក្រឡាញ់ ចំនួន០១នាក់។ គួររំលឹកថា ប្រភពចម្លងក្នុងចំណោមអ្នកវិជ្ជមានជំងឺកូវីដ-១៩ ចំនួន៥១នាក់នេះ គឺ ៖ ១.អ្នកវិជ្ជមានជំងឺកូវីដ-១៩ ចំនួន១៩នាក់ ជាប្រជាពលរដ្ឋត្រឡប់ពីប្រទេសថៃ មកដល់ខេត្តសៀមរាប ហើយជាករណីសង្ស័យ ត្រូវបានក្រុមគ្រូពេទ្យដាក់ឱ្យធ្វើចត្តាឡីស័ក នៅវិទ្យាល័យសម្តេចឪ។ ២.អ្នកវិជ្ជមានជំងឺកូវីដ-១៩ ចំនួន១៥នាក់ ពុំទាន់មានប្រភពចម្លងច្បាស់លាស់។
៣.អ្នកវិជ្ជមានជំងឺកូវីដ-១៩ ចំនួន១៣នាក់ មានប្រភពចម្លងចេញពីផ្សារលើធំថ្មី។ ៤.អ្នកវិជ្ជមានជំងឺកូវីដ-១៩ ចំនួន ០៣នាក់ មានប្រភពចម្លងចេញពីសង្កាត់ស្រង៉ែ។ ៥.អ្នកវិជ្ជមានជំងឺកូវីដ-១៩ ចំនួន០១នាក់ ជាអ្នកធ្វើដំណើរមកពីខេត្តបន្ទាយមានជ័យ។ ក្នុងឱកាសនោះដែរ រដ្ឋបាលខេត្តសៀមរាប បានធ្វើការអំពាវនាវដល់បងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានខាងលើ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនេះ ហើយប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
សូមបញ្ជាក់ថា ពាក់ព័ន្ធនឹងព្រឹត្តិការណ៍សហគមន៍២០កុម្ភៈ គិតត្រឹមរសៀលថ្ងៃទី០៧ ខែកក្កដា ឆ្នាំ២០២១នេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន ១.៨៦៥នាក់ ក្នុងនោះបានព្យាបាលជាសះស្បើយចំនួន ៦១៤ នាក់, កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក ចំនួន ១.២៣២នាក់ និងស្លា.ប់អ្នកវិជ្ជមានជំងឺកូវីដ-១៩ កើនឡើង ចំនួន១៩នាក់៕ ដោយ ៖ ច័ន្ទ រស្មី
ចែករំលែកព័តមាននេះ