អភិបាលខេត្តព្រះសីហនុចុះពិនិត្យតាមដានដំណើរការបង្រៀន និងរៀនតាមប្រព័ន្ធអនឡាញនៅវិទ្យាល័យវាលរេញ
- ព្រះសីហនុ
ខេត្តព្រះសីហនុ ៖ នាព្រឹកថ្ងៃទី៦ ខែកក្កដា ឆ្នាំ២០២១នេះ ឯកឧត្ដម គួច ចំរើន អភិបាល នៃគណៈអភិបាលខេត្តព្រះសីហនុ…
ខេត្តព្រះសីហនុ ៖ នាព្រឹកថ្ងៃទី៦ ខែកក្កដា ឆ្នាំ២០២១នេះ ឯកឧត្ដម គួច ចំរើន អភិបាល នៃគណៈអភិបាលខេត្តព្រះសីហនុ អមដំណើរដោយលោកស្រី ប្រធានមន្ទីរអប់រំយុវជន និងកីឡាខេត្តព្រះសីហនុ, អភិបាលស្រុកព្រៃនប់ និងអង្គភាព ស្ថាប័នពាក់ព័ន្ធ បានអញ្ជើញពិនិត្យមើលពីដំណើរការបង្រៀន រៀន និងការងារគ្រប់គ្រងប្រឡងតេស្តតាមប្រព័ន្ធអនឡាញ ការបង្រៀនតាមប្រព័ន្ធពីចម្ងាយ រួមមានដូចជា Google Meet, Telegram, Messenger, E-school, Google Classroom និងការប្រឡងតេស្តតាមរយៈ Google Form។
លោក ងៀម ស៊ីដារ៉ា នាយកវិទ្យាល័យ ហ៊ុន សែន វាលរេញបានឲ្យដឹងថា ក្រៅពីការបង្រៀនតាមប្រព័ន្ធអេឡិចត្រូនិកខាងលើនេះ សាលាក៏មានការប្រើប្រាស់សន្លឹកកិច្ចការតាមបែបប្រពៃណី គឺការបែងចែក លោកគ្រូ អ្នកគ្រូចុះទៅតាមភូមិ/ឃុំ/ស្រុក ដោយវេចខ្ចប់សន្លឹកកិច្ចការបញ្ជូនដល់សិស្សានុសិស្សនៅតាមភូមិ/ឃុំ ធ្វើការចែកជូនដល់សិស្សដែលគ្មានស្មាតហ្វូន ពេលដែលសិស្សធ្វើកិច្ចការរួចលោកគ្រូ អ្នកគ្រូ ទទួលសន្លឹកកិច្ចការពីសិស្សមកសាលារៀនវិញ ត្រូវគោរពតាមការណែនាំរបស់ក្រសួងសុខាភិបាល។ ម្យ៉ាងទៀតសិស្សដែលនៅជិតសាលា អាចមកយកសន្លឹកកិច្ចការនៅសាលាបាន ពេលធ្វើរួចយកមកសាលាវិញ នៅពេលដែលប្រគល់សន្លឹកកិច្ចការជូនសាលា ត្រូវធ្វើតាមការណែនាំរបស់ក្រសួងសុខាភិបាល។
លោកនាយកបន្តថា វិទ្យាល័យ ហ៊ុន សែន វាលរេញ ស្ថិតនៅតំបន់ប្រជុំជនវាលរេញ បច្ចុប្បន្នមានគ្រូសរុប ៨៩នាក់ ស្រី២៥នាក់ សិស្សសរុបមានចំនួនសរុប ១,៧៥១ នាក់ ស្រី៩១៨នាក់ មានអគារសិក្សា ចំនួន២ខ្នង ស្មើនឹង ៦០បន្ទប់ ផ្ទះគ្រូ១ខ្នង ផ្ទះសិស្ស១ខ្នង ស្មើនិង ៤០បន្ទប់ និងទីធ្លាបាល់បោះ បាល់ទះ មានផ្លូវបេតុង របង ខ្លោងទ្វារខាងមុខ ជាអំណោយដ៏ថ្លៃថ្លារបស់ សម្តេចតេជោ ហ៊ុន សែន និងនៅឆ្នាំ២០២០នេះ វិទ្យាល័យ ហ៊ុន សែន វាលរេញ បានទទួលអគារធនធាន១ សាងសង់ដោយ ធនាគារអភិវឌ្ឍអាស៊ី ADB តាមរយៈក្រសួងអប់រំ។ លោក ងៀម ស៊ីដារ៉ា បានបន្ថែមថា នៅក្នុងឱកាស់នោះ ឯកឧត្តមអភិបាលខេត្តបានឧបត្ថម្ភ ដល់វិទ្យាល័យថវិកា១០លានរៀល សម្រាប់ការអភិវឌ្ឍន៍ក្នុងសាលា, ឧបត្ថម្ភដល់លោកគ្រួអ្នកគ្រួសរុប៨៩នាក់ ក្នុងម្នាក់ៗ១០ម៉ឺនរៀល ដល់លោកគ្រូកុំព្យូទ័រ៣នាក់ ក្នុងម្នាក់១លានរៀល និងដល់អ្នកអនាម័យក្នុងសាលា២នាក់ ម្នាក់១០ម៉ឺនរៀលដែរ។
ជាមួយគ្នានោះ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានកោតសរសើរដល់លោកគ្រូ អ្នកគ្រូ ដែលបានរៀបចំកម្មវិធីបង្រៀនងាយៗ ដើម្បីផ្តល់ឱកាសឱ្យសិស្ស បានរៀនសូត្រក្នុងដំណាក់កាលដែលសាលាមិនទាន់បានបើកដំណើរការឡើងវិញ ដោយសារតែជំងឺកូវីដ-១៩ កំពុងតែរាតត្បាតជាសកល។ ទន្ទឹមនឹងការខិតខំរបស់លោកគ្រូ អ្នកគ្រូ ក្នុងការជំរុញ និងការលើកទឹកចិត្ត ព្រមទាំងតាមដានមើលការសិក្សាពីសំណាក់មាតាបិតា អាណាព្យាបាល ក៏ជាកត្តសំខាន់ មួយទៀត ដើម្បីជំរុញការសិក្សារបស់សិស្សទទួលបានលទ្ធផលល្អ។ ឯកឧត្តមក៏បានស្នើឱ្យលោកគ្រូ អ្នកគ្រូ ដែលពាក់ព័ន្ធ ទាំងអស់ត្រូវរួមគ្នាជួយជំរុញតាមដានគ្រប់លទ្ធភាព និងមធ្យោបាយក្នុងការពង្រឹងធនធានយុវជនឱ្យយបានខ្លាំងក្លា ដើម្បីសម្រេចនូវចក្ខុវិស័យរបស់ក្រសួងអប់រំក្នុងការផ្តល់ចំណេះដឹង ជំនាញប៉ិនប្រសប់ និងឥរិយាបថថ្លៃថ្នូរសីលធម៌ល្អក្នុងសង្គម៕ ដោយ ៖ ហ៊ុយ ចាន់ធួន
ចែករំលែកព័តមាននេះ