សភាអង់គ្លេសកាលពីយប់ថ្ងៃទី២ ធ្នូ បានអនុម័តដោយសំឡេងភាគច្រើនគួរសមអនុញ្ញាតឱ្យចក្រភពអង់គ្លេសធ្វើការវាយប្រហារតាមអាកាសនៅស៊ីរីប្រឆាំងក្រុមរដ្ឋអ៊ិស្លាម ដែលនេះជាការឆ្លើយតបតាមការអំពាវនាវរបស់បណ្តាសម្ព័ន្ធមិត្តក្រោយការវាយប្រហារភេរវកម្មនៅក្រុងប៉ារីសមក ។
សភាអង់គ្លេសបានអនុម័តដោយ៣៩៧សំឡេងទល់នឹង២២៣សំឡេងប្រឆាំងដែលបែបនេះបង្ហាញថាសមាជិកសភានៃគណបក្សការងារជាច្រើន ក៏ចូលរួមអនុម័តជាមួយបណ្តាសមាជិកសភានៃគណបក្សអភិរក្សនិយមរបស់នាយករដ្ឋមន្ត្រី លោកដាវីដ កាមីរ៉ូន ដែរ ។
ការអនុម័តនេះធ្វើឡើងបន្ទាប់ពីការជជែកដេញដោលគ្នារយៈពេលជាង១០ម៉ោងក្នុងសភាមក ។ នាយករដ្ឋមន្ត្រីលោកកាមីរ៉ូន បានការពារសំណើឱ្យមានការវាយប្រហារនេះដោយលើកហេតុផលថា ប្រទេសត្រូវប្រកាន់យកការទទួលខុសត្រូវ ហើយជួយទ្រទ្រង់ដល់សម្ព័ន្ធមិត្ត ពិសេសបារាំងដែលជួបប្រទះការវាយប្រហារភេរវកម្មនៅក្រុងប៉ារីស បណ្តាលឱ្យមនុស្សស្លាប់១៣០នាក់ កាលពីថ្ងៃទី១៣ វិច្ឆិកា ។ លោកមានប្រសាសន៍ថា យើងត្រូវឆ្លើយតបចំពោះការអំពាវនាវរបស់សម្ព័ន្ធមិត្តយើង ។ សកម្មភាពដែលយើងធ្វើគឺស្របច្បាប់ ចាំបាច់ ហើយជារឿងល្អ ដែលត្រូវធ្វើដើម្បីសន្តិសុខរបស់យើង ។ យោងតាមលោកកាមីរ៉ូន ថា ការរួមចំណែកខាងយោធារបស់អង់គ្លេសអាចខុសប្លែកពីគេ ដោយសារការប្រើប្រាស់ជាពិសេសមីស៊ីលធុន BRIMSTONE ។
សភាអង់គ្លេសកាលពីឆ្នាំ២០១៣ ធ្លាប់បានបដិសេធការវាយប្រហារតាមអាកាសប្រឆាំងរបបលោកបាចា អាល់អាសាដ នៅស៊ីរី ដោយសារផលវិបាកនៃប្រតិបត្តិការនៅអាហ្វហ្គានីស្ថាននិងនៅអុីរ៉ាក់ ដែលបើកធ្វើកាលក្រោមការកាន់អំណាចរបស់នាយករដ្ឋមន្ត្រីគណបក្សការងារលោកតួនី ប្លែរ ។
យោងតាមរដ្ឋមន្ត្រីការបរទេសអង់គ្លេស លោក PHILIA HAMMOND ថា ការវាយប្រហាររបស់អង់គ្លេសនៅស៊ីរី អាចធ្វើភ្លាមៗប្រហែលជាយប់ថ្ងៃស្អែក ដោយបណ្តាយន្តហោះអង់គ្លេសធ្វើការហោះហើរស៊ើបការណ៍រួចហើយពីលើដែនអាកាសស៊ីរី ៕
ចែករំលែកព័តមាននេះ