ខេត្តស្វាយរៀង ៖ ឈ្មួញនាំជ្រូក៣០ក្បាលឆ្លងដែនពីប្រទេសវៀតណាមដោយខុសច្បាប់ចូលមកក្នុងខេត្តស្វាយរៀងត្រូវសមត្ថកិច្ចអគ្គនាយកដ្ឋានផលិតកម្មសត្វចាប់ឃាត់បានខណៈឈ្មួញដឹកនៅតាមដងផ្លូវជាតិលេខ១ត្រង់ចំណុចភូមិបាក់រនាស់ សង្កាត់សង្ឃ័រ ក្រុងស្វាយរៀង ហើយបញ្ជូនទៅរាជធានីភ្នំពេញភ្លាមៗតែម្តងដោយខ្លាចពួកឈ្មួញនាំគ្នាមករំដោះជ្រូកវិញ ដូចកាលពីមុន។ ករណីនេះបានកើតឡើងកាលពីវេលាម៉ោង១១និង០៥នាទីយប់ ថ្ងៃទី២៧ ខែមិថុនា ឆ្នាំ២០២១ នៅលើកំណាត់ផ្លូវជាតិលេខ១ ស្ថិតនៅភូមិបាក់រនាស់សង្កាត់សង្ឃ័រ ក្រុងស្វាយរៀង។
បើតាមសមត្ថកិច្ចបានឲ្យដឹងថា កាលពីថ្ងៃទី២៣ ខែមិថុនា ឆ្នាំ២០២១ កន្លងទៅ ក្រុមចល័តនៃអគ្គនាយកដ្ឋានសុខភាពសត្វ និងផលិតកម្មសត្វបានឃើញឈ្មួញដឹកជ្រូកតាមរថយន្ត១គ្រឿងតាមបណ្តោយផ្លូវជាតិលេខ១ ចេញពីចំណុចខាងកើតផ្សារជីភូ ក្រុងបាវិត ឆ្ពោះមកក្រុងស្វាយរៀង សមត្ថកិច្ចសង្ស័យថា នាំជ្រូកពីប្រទេសវៀតណាមមកលក់ចែកចាយ នៅខេត្តស្វាយរៀង។ ប្រភពបន្តទៀតថា នៅវេលាម៉ោង៣រសៀល រថយន្តដឹកជ្រូកនោះមកដល់ចំណុចភូមិសាមគ្គី សង្កាត់ស្វាយតឿ ក្រុងស្វាយរៀងសមត្ថកិច្ចក៏បានឃាត់សួរនាំ លទ្ធផលជ្រូករស់ចំនួន១៥ក្បាលអត់មានច្បាប់ ទើបក្រុមចល័តប្រគល់ឲ្យសមត្ថកិច្ចមន្ត្រីការិយាល័យផលិតកម្ម និងបសុព្យាបាលមន្ទីរកសិកម្មរុក្ខាប្រមាញ់ និងនេសាទខេត្ត ដើម្បីបញ្ជូនមកពិនិត្យសុខភាពសត្វជ្រូក។ ក៏ប៉ុន្តែពួកឈ្មួញបានយកជ្រូក១៥ក្បាលមកទុកនៅការិយាល័យផលិតកម្ម បសុព្យាបាលខេត្តស្វាយរៀង ហើយតវ៉ាថា ជ្រូកទាំងនេះពួកគេទិញតាមផ្ទះប្រជាពលរដ្ឋស្រុករំដួល និងក្រុងស្វាយរៀង ការតវ៉ារហូតដល់ម៉ោង៩យប់ ពួកឈ្មួញបាននាំគ្នាមករំដោះជ្រូកយកទៅវិញបាត់ទាំងយប់។
ប្រភពបន្តទៀតថា មិនបានប៉ុន្មានថ្ងៃផងឈ្មួញញ៉ាម បានលួចនាំជ្រូកពីប្រទេសវៀតណាមឆ្លងដែនដោយខុសច្បាប់ម្តងទៀត នៅវេលាម៉ោង១១ និង០៥នាទីជិតអធ្រាត្រ ថ្ងៃទី២៧ ខែមិថុនា ឆ្នាំ២០២១ បាននាំជ្រូកឆ្លងដែនពីវៀតណាម ម្តងទៀត តាមច្រករបៀង សាលាក្រុងបាវិតចំនួន ៣០ក្បាល ក៏ត្រូវសមត្ថកិច្ចចាប់ឃាត់បាននៅវេលាម៉ោង១២ និង១០នាទីរំលងអាធ្រាត្រឈានចូលថ្ងៃទី២៨ ខែមិថុនា ឆ្នាំ២០២១ នៅចំណុចភូមិបាក់រនាស់ម្តងទៀត ដោយខ្លាចពួកឈ្មួញមករំដោះយកជ្រូកទៅវិញទៀត សមត្ថកិច្ចបានដឹកជ្រូកបញ្ជូនមករាជធានីភ្នំពេញវិញម្តង។ លោក ហ៊ុន សារ៉ាត់ អនុប្រធាននាយកដ្ឋាន សុខភាពសត្វ និងផលិតកម្មសត្វក្រសួងកសិកម្ម មានប្រសាន៍ថា ការឃាត់ចាប់នេះ ក្រោមការបញ្ជាដោយផ្ទាល់ពីឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ដោយមានការសម្របសម្រួលនិតិវិធីពីឯកឧត្តម ខាំ សុផារី ព្រះរាជអាជ្ញា នៃអយ្យការអមសាលាដំបូងខេត្តស្វាយរៀង។
បានឲ្យក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ចុះស្ទាក់ចាប់រថយន្តមួយគ្រឿង ម៉ាកHYUNDAI ពណ៌ស ពាក់ស្លាកលេខ ស្វាយរៀង ៣A-១២៥៦ ដឹកសត្វជ្រូករស់ចំនួន៣០ក្បាល នៅលើផ្លូវជាតិលេខ១ ស្ថិតនៅភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ដែលក្រុមឈ្មួញដឹកចេញពីប្រទេសវៀតណាម ចូលមកកម្ពុជាតាមច្រករបៀង ក្រុងបាវិត ខេត្តស្វាយរៀង ពុំមានលិខិតអនុញ្ញាតអ្វីទាំងអស់ (តាមការឆ្លើយបញ្ជាក់របស់អ្នកបើកបររថយន្តដឹកសត្វជ្រូក)។ ក្រុមការងារលែងទុកនៅខេត្តស្វាយរៀង ខ្លាចឈ្មួញមករំដោះសត្វជ្រូកទៀត ក៏បានបញ្ជូនបទល្មើស និងវត្ថុតាងទាំងនោះ ទៅរក្សាទុកទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ រាជធានីភ្នំពេញ ដើម្បីចាត់ការទៅតាមនិតិវិធីច្បាប់។ ប្រភពដដែលបានបញ្ជាក់ឲ្យដឹងថា ឈ្មួញនាំជ្រូករស់ពីប្រទេសវៀតណាមនេះឈ្មោះ អ៊ឹម សុផលលីន ភេទស្រី អាយុ៥០ឆ្នាំ មានទីលំនៅភូមិស្វាយចេក ឃុំព្រៃឈរ ស្រុកកំពង់ត្របែកខេត្តព្រៃវែង ម្តងនេះត្រូវទទួលខុសត្រូវចំពោះមុខច្បាប់ហើយ៕ ដោយ ៖ វ៉ាន់ ប៊ុនធឿន
ចែករំលែកព័តមាននេះ