ខេត្តព្រៃវែង ៖ អ្នកផ្ទុកមេរោគអេដស៍ ជនចាស់ជរាគ្មានទីពឹង និងជនទីទ័លក្រ សរុបចំនួន២.៦៧០គ្រួសារមកពីតាមបណ្តាស្រុកទាំង១៣ក្នុងខេត្តព្រៃវែង ត្រូវបានកាកបាទក្រហមសាខាខេត្តព្រៃវែង ធ្វើពិធីចែកអំណោយមនុស្សធម៌ ដើម្បីជួយកាត់បន្ថយការខ្វះខាត និងការលំបាករបស់ពួកគាត់ ។
ពិធីចែកអំណោយមនុស្សធម៌នេះ បានប្រារព្ធធ្វើឡើងកាលពីវេលាម៉ោង៨ព្រឹក ថ្ងៃទី២៨វិច្ឆិកា ២០១៥ នៅក្នុងបរិវេណពហុកីឡដ្ឋានខេត្តព្រៃវែង ក្រោមអធិបតីភាពសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំងមានការអញ្ជើញចូលរួមពីសំណាក់អស់លោក លោកជំទាវ ដែលជាសមាជិក សមាជិកា នៃកាកបាទក្រហមកម្ពុជា និងមន្ត្រីរាជការនៅគ្រប់ស្ថាប័នក្នុងខេត្តព្រៃវែងផងដែរ ។
សម្រាប់អំណោយដែលត្រូវចែកជូនដល់គ្រួសារងាយរងគ្រោះទាំងអស់នាពេលនោះ គឺជាអំណោយរបស់កាកបាទក្រហមកម្ពុជាផង និងជាអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផង ដែលក្នុង១គ្រួសារៗទទួលបានអង្ករ៣០គីឡូក្រាម មី១កេស ត្រីខ១យួរ មុង១ ភួយ១ ក្រមា១ សារុង១ ក្រណាត់ស១ដុំ និងថវិកា២ម៉ឺនរៀលផងដែរ ។
ថ្លែងនៅក្នុងពិធីចែកអំណោយនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានបញ្ជាក់ថា អំណោយដែលកាកបាទក្រហមកម្ពុជា ចែកជូននាពេលនេះ គឺមានចំនួនតិចតួចប៉ុណ្ណោះ មិនអាចផ្គត់ផ្គង់ឱ្យគ្រប់តម្រូវការរបស់បងប្អូនបានយូរអង្វែងនោះទេ ប៉ុន្តែវាអាចជួយចែករំលែកនូវការខ្វះខាត និងការលំបាករបស់បងប្អូនបានមួយគ្រាដែរ ។ អំណោយទាំងអស់នេះគឺបានមកពីការបរិច្ចាគនូវទ្រព្យសម្បត្តិផ្ទាល់ខ្លួនរបស់អស់លោក លោកជំទាវ មន្ត្រីរាជការ និងបងប្អូនប្រជាពលរដ្ឋជាច្រើន ដែលផ្តល់ជូនមកកាកបាទក្រហមកម្ពុជា សម្រាប់ជួយឧបត្ថម្ភ ដល់បងប្អូនដែលទីទ័លក្រ និងកំពុងជួបការលំបាកដូចជាបងប្អូនទាំងអស់ដែលនៅទីនេះ។
មានមតិសំណេះសំណាលក្នុងឱកាសនោះដែរ សម្តេចកិត្តិព្រឹទ្ធបណ្ឌិត ក៏បានលើកឡើងនូវបញ្ហាមួយចំនួនដែលបាននិងកំពុងកើតឡើង និងជះឥទ្ធិពលយ៉ាងខ្លាំងមកលើសង្គមរបស់យើង ដូចជាករណីគ្រោះថ្នាក់ចរាចរណ៍ដែលកើតឡើងពីការធ្វេសប្រហែស និងការមិនគោរពច្បាប់ចរាចរណ៍ ធ្វើឱ្យមានអ្នករងគ្រោះថ្នាក់រហូតដល់ស្លាប់ និងរបួសជារៀងរាល់ថ្ងៃ ។
ជាមួយគ្នានេះបញ្ហាថ្នាំញៀនក៏ជាបញ្ហាសំខាន់ដែលរាជរដ្ឋាភិបាលកំពុងតែយកចិត្តទុកដាក់ក្នុងការទប់ស្កាត់ និងបង្ក្រាបផងដែរ ។ ដូច្នេះទើបសម្តេចអំពាវនាវដល់បងប្អូនទាំងអស់ សូមយកចិត្តទុកដាក់មើលថែទាំកូនចៅឱ្យបានល្អឱ្យពួកគេរស់នៅឱ្យឆ្ងាយពីថ្នាំញៀន ហើយពេលធ្វើដំណើរទៅណាមកណា ត្រូវនាំគ្នាគោរពច្បាប់ចរាចរណ៍ទាំងអស់គ្នា ដើម្បីការពារអាយុជីវិតខ្លួនឯងផង និងអ្នកដទៃផង ៕
ចែករំលែកព័តមាននេះ