អាជីវករផ្សារធំទួលសង្កែ ហៅផ្សារសាំហាន់ ប្រមាណ៥០នាក់តំណាងឱ្យរាប់រយនាក់ បាននាំគ្នាជួបប្រមូលផ្តុំគ្នា ដើម្បីទទួចស្នើសុំដល់រដ្ឋបាលរាជធានីភ្នំពេញ ក៏ដូចជារដ្ឋបាលខណ្ឌឬស្សីកែវ បើកដំណើរការផ្សារលក់ដូរឡើងវិញ ព្រោះពួកគាត់ម្នាក់ៗស្ទើរតែ
រាជធានីភ្នំពេញ ៖ អាជីវករផ្សារធំទួលសង្កែ ហៅផ្សារសាំហាន់ ប្រមាណ៥០នាក់តំណាងឱ្យរាប់រយនាក់ បាននាំគ្នាជួបប្រមូលផ្តុំគ្នា ដើម្បីទទួចស្នើសុំដល់រដ្ឋបាលរាជធានីភ្នំពេញ ក៏ដូចជារដ្ឋបាលខណ្ឌឬស្សីកែវ បើកដំណើរការផ្សារលក់ដូរឡើងវិញ ព្រោះពួកគាត់ម្នាក់ៗស្ទើរតែដាច់បាយទៅហើយ ។ទន្ទឹមនោះដែរ ក្រុមអាជីវករក៏បានស្នើសុំអោយថៅកែផ្សារផ្អាកយកលុយថ្លៃតូប ខណៈពេលផ្សារមិនទាន់ដំណើរនោះ។ ការតវ៉ានេះ បានផ្ទុះឡើងជាថ្មី កាលពីថ្ងៃទី២២ ខែមិថុនា ឆ្នាំ២០២១ ដោយពួកគាត់បានមកជួបជុំគ្នានៅមុខផ្សារសាំហាន់ ដែលស្ថិតនៅក្នុងសង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ។
តាមអាជីវករបានរៀបរាប់អោយដឹងថា ផ្សារធំទួលសង្កែ ហៅផ្សារសាំហាន់នេះ បានផ្អាកដំណើរប្រមាណជាង២ខែមកហើយ បន្ទាប់ពីមេរោគកូវីដ១៩ បានរីករាលដាល ហើយរដ្ឋបាលរាជធានីភ្នំពេញ ក៏ដូចជារដ្ឋបាលខណ្ឌឬស្សីកែវ សម្រេចបិទផ្សារជាបណ្តោះអាសន្ន ។ មួយរយៈពេលនេះ ស្ថានភាពកូវីដ១៩ វាបានធូរស្បើយឡើងវិញ ហើយផ្សាររដ្ឋនានាក៏ត្រូវបានរដ្ឋបាលរាជធានីពេញ បើកដំណើរការឡើងវិញដែរ ។ ពិសេសទៀត ផ្សារមិនរៀបរយនៅតាមដងផ្លូវខាងលិចផ្សារសាំហាន់, និងខាងមុខ ក៏បានបើកលក់វិញ និងម្យ៉ាងទៀតរោងចក្រនៅទល់មុខនោះ ក៏បានបើកដំណើរការឡើងវិញ។
ដោយឡែក ពួកគាត់ដែលលក់ដូរនៅក្នុងផ្សារសាំហាន់ ដែលជាទីតាំងមានផ្លូវធំទូលាយ និងតូបលក់ដូរ មានរបៀបរៀបរយល្អ ជាងផ្សាររដ្ឋមួយចំនួនផង ពុំត្រូវបានអាជ្ញាធរបើកអោយលក់ដូរបែបនេះទៅវិញ ។
អាជីវករក៏បាននិយាយត្អូញត្អែរថា មួយរយៈពេលកន្លងនេះ ពួកគាត់រស់នៅក្នុងតំបន់បិទខ្ទប់ លំបាកវេទនានិយាយមិនចេញ ខ្លះស្ទើរតែអត់បាយហូប ណាមួយលុយបង់ធនាគា, លុយបង់ថ្លៃផ្ទះជួល និងលុយបង់ថ្លៃតូប ដែលបិទផ្សារមិនបានលក់ដូរ ហើយត្រូវថៅកែផ្សារទារអោយបង់៥០ភាគរយទៀត ។ ដោយសារតែស្ថានភាពសេដ្ឋកិច្ចគ្រូសារធ្លាក់ចុះ ណាមួយឃើញផ្សាររដ្ឋមួយចំនួន រោងចក្រ បានដំណើរការឡើងវិញ ទើបពួកគាត់ស្នើសុំដល់អាជ្ញាធរ មេត្តាជួយសម្រួលបើកផ្សារសាំហាន់នេះ បានលក់ដូរ រកស៊ី ឡើងវិញ ដើម្បីផ្គត់ផ្គង់ជីវភាពបន្តទៅទៀត។
អាជីវករ ក៏បានអោយដឹងទៀតថា បើសិនជារដ្ឋបាលរាជធានីភ្នំពេញ មិនទាន់បើកដំណើរការផ្សារនេះឡើងវិញដោយយល់ថា ស្ថានភាពកូវីដ១៩ មិនអំណោយផល អាជ្ញាធរគួរជួយអន្តរាគមន៍ ដើម្បីអោយថៅកែផ្សារ កុំយកថ្លៃឈ្មួលតូបមួយរយៈនៅពេលដែលផ្សារកំពុងតែបិទទ្វារ។ ដោយសារតែ តម្រូវការជីវភាពប្រមាណជិត១សប្តាហ៍មកហើយ ពួកគាត់ប្រមាណជាង៤០០នាក់ ក្នុងចំណោមប្រមាណជាង១ពាន់តូប ក៏បានផ្តិតមេដៃស្នើសុំទៅសាលាខណ្ឌឬស្សីកែវ តែបាត់ដំណឹងរហូត ហើយចេះតែសន្យារង់ចាំរហូតមក ទើបពួកគាត់មកជួបប្រមូលផ្តុំ តែប្រកាន់យកនូវគម្លាតសុវត្ថិភាព ដើម្បីស្នើសុំដល់រដ្ឋបាលមេត្តាដោះស្រាយដោយក្តីអនុគ្រោះ ។
គួរបញ្ជាក់ថា ផ្សារធំទួលសង្កែ ហៅផ្សារសាំហាន់ ត្រូវបានរដ្ឋបាលខណ្ឌឫស្សីកែវ ផ្អាកដំណើរការជាបណ្តោះអាសន្នចាប់ពីថ្ងៃទី១៩ ខែមេសា ឆ្នាំ២០២១ ហើយបន្តរហូតដល់ពេលនេះ ដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ១៩៕
ចែករំលែកព័តមាននេះ