អ្នកមានបំណងធ្វើអាជីវកម្មដំបូងមានភាពស្មុគស្មាញមែនទេ ? មករៀនពីវិធីសាស្ត្រខ្លះៗ ខាងក្រោមនេះដើម្បីត្រៀមមុនធ្វើអាជីវកម្មដំបូង ៖១. ការធ្វើអាជីវកម្មមិនត្រូវគិតត្រឹមថា ជាអារម្មណ៍ចង់ធ្វើប៉ុណ្ណោះទេ ៖ មនុស្សជាច្រើនបានគិតថា ត្រឹមតែជាចំណង់ចំណូល…
អ្នកមានបំណងធ្វើអាជីវកម្មដំបូងមានភាពស្មុគស្មាញមែនទេ ? មករៀនពីវិធីសាស្ត្រខ្លះៗ ខាងក្រោមនេះដើម្បីត្រៀមមុនធ្វើអាជីវកម្មដំបូង ៖
១. ការធ្វើអាជីវកម្មមិនត្រូវគិតត្រឹមថា ជាអារម្មណ៍ចង់ធ្វើប៉ុណ្ណោះទេ ៖ មនុស្សជាច្រើនបានគិតថា ត្រឹមតែជាចំណង់ចំណូល ឬចង់ធ្វើវានោះបានហើយ ប៉ុន្តែយើងត្រូវដឹងថា ចំណង់ចំណូលចិត្តវាតូចតាចទេ ក្នុងការដំណើរការអាជីវកម្មមួយនោះ ។ ត្រឹមត្រូវណាស់មនុស្សត្រូវតែធ្វើអ្វីដែលខ្លួនចូលចិត្ត ប៉ុន្តែក៏អ្នកត្រូវត្រៀមខ្លួនផងដែរថា អ្នកនឹងគ្មានពេលវេលាដូចមុននោះទេ ព្រោះអ្នកត្រូវយកពេលវេលាទាំងអស់នោះមកអភិវឌ្ឍយុទ្ធសាស្ត្រអាជីវកម្ម ធ្វើអន្តរកម្មជាមួយអតិថិជន ធ្វើទីផ្សារផលិតផលរបស់អ្នក និងធ្វើកិច្ចការរដ្ឋបាល ។ល។ ដូច្នេះនៅពេលអ្នកសម្រេចចិត្តចាប់ផ្តើមក្រុមហ៊ុនឬអាជីវកម្មនោះ ចូរអ្នកត្រៀមខ្លួននៃការងារទាំងនេះ ។
២. លំហូរសាច់ប្រាក់មានសារៈសំខាន់ណាស់ ៖ លំហូរសាច់ប្រាក់ គឺជាអាយុជីវិតនៃអាជីវកម្មមួយ ដូច្នេះមិនថាអ្នកធ្វើអ្វីក៏ដោយ អ្នកត្រូវប្រាកដថា ហិរញ្ញវត្ថុរបស់អ្នក ត្រូវបានគ្រប់គ្រងយ៉ាងត្រឹមត្រូវ និងតាមក្បួនខ្នាត ។ អ្នកនឹងជួបបញ្ហាលំបាក ប្រសិនបើការចំណាយលើសចំណូលរបស់អ្នក ដូច្នេះចាំបាច់ត្រូវមានតុល្យភាពនៃលំហូរសាច់ប្រាក់ ។ អ្នកគួរស្វែងរកអាជីវកម្មណាដែលអាចងាយស្រួលរកចំណូលមកវិញ តិចក្តីច្រើនក្តីឱ្យតែមានចំណូលខ្លះ ។ (ទ្រឹស្តីអាជីវកម្ម ប្រសិនអ្នកចាប់ផ្តើមអាជីវកម្មដំបូង អ្នកត្រូវត្រៀមប្រាក់ ៦ ខែ សម្រាប់ការខាតឬមិនមានចំណូលមកវិញលឿន) ។
៣. កុំសម្រេចចិត្តឈប់ធ្វើការ ប្រសិនបើអ្នកមិនទាន់មានហិរញ្ញវត្ថុរឹងមាំសម្រាប់ធ្វើអាជីវកម្ម ៖ ប្រសិនបើអ្នកមានបំណងចង់ធ្វើអាជីវកម្ម អ្នកត្រូវសន្សំលុយឱ្យបានច្រើន ទៅតាមទំហំនៃអាជីវកម្មនោះ នេះសំដៅទៅលើអ្នកដែលកំពុងធ្វើការឱ្យគេ ។ ហើយអ្វីសំខាន់នោះ អ្នកមិនគួរបោះបង់ចោលការងារ ដែលរកប្រាក់ចំណូលបានច្រើន ហើយទៅធ្វើអាជីវកម្មនោះទេ មានន័យថាអ្នកអាចចាប់ផ្តើមអាជីវកម្មរបស់អ្នកខណៈអ្នកកំពុងធ្វើការឱ្យគេ រហូតប្រហែលជាមួយឆ្នាំ ដែលអ្នកធ្វើវាមានភាពល្អប្រសើហើយ សឹមអ្នកឈប់ពីការងារនោះក៏បាន ធ្វើដូចនេះប្រសិនជាអាជីវកម្មអ្នកខ្វះខាត អ្នកនៅមានប្រាក់ចំណូលខ្លះដែរ ។
៤. សកម្មភាពមិនស្មើនឹងកំណើននោះទេ ៖ អាជីវកម្មខ្លះមើលទៅមានសាខា ប៉ុន្តែអ្នកកុំច្រឡំពាក្យថា ពង្រីក និងកំណើន វាមានភាពខុសគ្នា ។ ដូច្នេះការបន្ថែមការិយាល័យថ្មី និយោជិកច្រើននាក់ ឬមុខងារផលិតផលថ្មី មិនមានន័យថា ជាការរីកចម្រើននោះទេ ដរាបណាអ្នកមិនអាចមើលឃើញការកើនឡើងនៃប្រាក់ចំណេញ និងអតិថិជន ។ អ្នកដឹងអំពីភាពខុសគ្នារវាងការពង្រីក និងកំណើន ដើម្បីអាចវាស់វែងថា តើអាជីវកម្មរបស់អ្នកដំណើរការបានល្អប៉ុណ្ណា ។
៥. ជ្រើសរើសមនុស្សត្រឹមត្រូវ ដើម្បីធ្វើការងារអាជីវកម្មជាមួយអ្នក ៖ មិនថា អ្នកខ្លាំងពូកែប៉ុណ្ណា ឬអាចឈជើងធ្វើអាជីវកម្មខ្លួនឯងបានដោយកម្រិតណានោះទេ សំខាន់គ្រប់អាជីវកម្មទាំងអស់ ជាពិសេសការចាប់ផ្តើមដំបូង ត្រូវតែមានក្រុមការងារត្រឹមត្រូវមួយដែរ ។ ហើយវាក៏ជាពេលវេលាមួយដែលអ្នកត្រូវតែប្រយ័ត្នប្រយែងខ្ពស់ផងដែរ ព្រោះការជ្រើសរើសក្រុមខុស អាចធ្វើឱ្យខូចប្រយោជន៍ដល់អាជីវកម្មរបស់អ្នក ។ អ្នកត្រូវប្រាកដថា មនុស្សដែលអ្នកនាំយកមក ក្នុងក្រុមការងារមានគោលដៅត្រូវគ្នា ជាមួយអ្នកដែរ ឬទេ? ហើយពួកគេត្រៀមខ្លួនជួយអ្នកឱ្យដំណើរការអាជីវកម្មដោយចិត្តមោះមុតដែរ ឬទេ ?
៦. ការចូលរួមរបស់អតិថិជន គឺសំខាន់ណាស់ ៖ អាជីវកម្មអ្វីក៏ដោយ សុទ្ធតែត្រូវការអតិថិជន ដូចនេះពួកគេគឺសំខាន់ អ្នកត្រូវរកវិធីដើម្បីចងជើងអតិថិជនរបស់អ្នកឱ្យជាប់ ឬអាចនិយាយបានមានទំនាក់ទំនងល្អជាមួយអតិថិជន ។ មួយវិញទៀត អ្នកក៏ត្រូវដឹងដែរថា គ្មាននរណាម្នាក់ចង់ធ្វើអាជីវកម្មជាមួយយីហោ ដែលគ្មានឈ្មោះ ឬគ្មានមុខមាត់នោះទេ ។ ដូច្នេះវាមានសារៈសំខាន់ណាស់ក្នុងការចូលរួមយ៉ាងសកម្មជាមួយដៃគូ និងអតិថិជនរបស់អ្នក និងមានទំនាក់ទំនងជាមួយពួកគេ ។ នៅលើប្រព័ន្ធផ្សព្វផ្សាយសង្គម ប្លុក គេហទំព័រ ។ល។ របស់អ្នក ត្រូវមានសកម្មភាពឱ្យបានច្រើនតាមតែអាចធ្វើបាន អ្វីដែលសំខាន់អ្នកត្រូវធានាថារាល់សំណួរទាំងអស់ ត្រូវបានឆ្លើយតបយ៉ាងឆាប់រហ័ស តាមរយៈបណ្តាញសង្គមអ្នកអាចទទួលបានការឆ្លើយតប ដោយផ្ទាល់ពីអតិថិជន ហើយវានឹងបង្កើតអ្នកមានភាពល្បីល្បាញថែមទៀតផង ៕ ប្រភព ៖ Forbes
ចែករំលែកព័តមាននេះ