- ភ្នំពេញ
ភ្នំពេញ៖ ដើម្បីទប់ស្កាត់ការឆ្លងរាលដាលជំងឺកូវីដ១៩ នៅពេលនេះ រដ្ឋបាលរាជធានីភ្នំពេញ បានចាប់ផ្តើមផ្អាកសកម្មភាពការងារ មុខរបរ ឬអាជីវកម្ម ការជួបជុំ និងការប្រមូលផ្តុំមនុស្សជាលក្ខណៈឯកជន រយៈពេល…
ភ្នំពេញ៖ ដើម្បីទប់ស្កាត់ការឆ្លងរាលដាលជំងឺកូវីដ១៩ នៅពេលនេះ រដ្ឋបាលរាជធានីភ្នំពេញ បានចាប់ផ្តើមផ្អាកសកម្មភាពការងារ មុខរបរ ឬអាជីវកម្ម ការជួបជុំ និងការប្រមូលផ្តុំមនុស្សជាលក្ខណៈឯកជន រយៈពេល…
ភ្នំពេញ៖ ដើម្បីទប់ស្កាត់ការឆ្លងរាលដាលជំងឺកូវីដ១៩ នៅពេលនេះ រដ្ឋបាលរាជធានីភ្នំពេញ បានចាប់ផ្តើមផ្អាកសកម្មភាពការងារ មុខរបរ ឬអាជីវកម្ម ការជួបជុំ និងការប្រមូលផ្តុំមនុស្សជាលក្ខណៈឯកជន រយៈពេល ១៤ថ្ងៃ ឡើងវិញហើយ គិតចាប់ពីម៉ោងសូន្យ ថ្ងៃទី២០មិថុនា រហូតដល់ថ្ងៃទី៣ ខែកក្កដា ឆ្នាំ២០២១។
សេចក្តីសម្រេចចុងក្រោយនេះ បានផ្អាកជាបណ្តោះអាសន្ន ចំពោះសកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់នៃការឆ្លងរាលដាលជំងឺកូវីដ១៩ ដូចខាងក្រោម៖ សាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋ និងឯកជន លើកលែងតែសាលារៀន ដែលធ្វើការបណ្តុះបណ្តាលតាមប្រព័ន្ធអនឡាញ។ អាជីវកម្មក្លិបកម្សាន្តគ្រប់ប្រភេទ ជាអាទិ៍ ខារ៉ាអូខេ រង្គសាល ឌីស្កូតែក បៀហ្គាឌិន និងកាស៊ីណូ។ រមណីយដ្ឋាន សារមន្ទីរ និងសួនកម្សាន្តនានា។ អាជីវកម្មម៉ាស្សា។ រោងភាពយន្ត រោងសម្តែងសិល្បៈ ក្លិបហាត់ប្រាណ និង មជ្ឈមណ្ឌលកី ឡា។
សេចក្តីសម្រេចដដែល ក៏បានលើកឡើងថា ក្នុងអំឡុងពេលនៃការដាក់ចេញវិធានការរដ្ឋបាល ត្រូវបានផ្អាកជាបណ្តោះអាសន្នការជួបជុំ ឬការប្រមូលផ្តុំមនុស្សជាលក្ខណៈឯកជន ដែលមានលក្ខណៈកកកុញ មិនឲ្យលើសពី ១៥នាក់ លើកលែងតែចំពោះករណី៖ ការជួបជុំក្នុងចំណោមសមាជិកគ្រួសារ និងរង្វង់សាច់ញាតិ ដែលរស់ នៅក្នុងលំនៅឋាន ឬទីសំណាក់ជាមួយគ្នា ក្នុងកម្មវិធីប្រពៃណី និងពិធីសាសនាផ្សេងៗ។ ការរៀបចំពិធីបុណ្យសព ដោយគោរពតាមការកំណត់របស់អាជ្ញាធរមានសមត្ថកិច្ច និងក្រោយពេលយកសំណាកសាកសព ទៅវិភាគ រកមេរោគកូវីដ១៩ ដោយទទួលបានលទ្ធផលអវិជ្ជមាន។ ការជួបជុំរបស់ស្ថាប័នសាធារណៈ ការប្រមូលផ្តុំមនុស្ស និងការជួបជុំរបស់បុគ្គលិកសុខាភិបាល ដើម្បីអនុវត្តវិធានការសុខាភិបាល ជាអាទិ៍ ការយកវត្ថុសំណាកមកវិភាគរកមេរោគកូវីដ១៩ និងការចាក់វ៉ាក់សាំងការពារជំងឺកូវីដ១៩។ ការជួបជុំរបស់បុគ្គលិកសុខាភិបាល ដែលបំពេញ ការងារសង្គ្រោះបន្ទាន់ផ្សេងទៀត។ ការជួបជុំរបស់អាជ្ញាធរមានសមត្ថកិច្ច និងកម្លាំងគណៈបញ្ជាការឯកភាព រដ្ឋបាលគ្រប់លំដាប់ថ្នាក់ ក្នុងការបំពេញការងារថែរក្សាសន្តិសុខ សណ្តាប់ធ្នាប់ និងរបៀបរៀបរយសាធារណៈ។ ការជួបជុំមនុស្ស ក្នុងអំឡុងពេលនៃកិច្ចនីតិវិធីរបស់មន្ត្រីនគរបាលយុត្តិធម៌ ឬរបស់សាលាជម្រះក្តី។ ការជួបជុំមនុស្ស ដែលមានភាពចាំបាច់សម្រាប់បម្រើផលប្រយោជន៍សាធារណៈ ឬក្នុងគោលបំណងផ្សេងទៀត តាមការកំណត់របស់អាជ្ញាធរមានសមត្ថកិច្ច។ ការជួបជុំ ឬការប្រមូលផ្តុំមនុស្ស ដើម្បីបំពេញការងារបម្រើឲ្យសកម្មភាពការងារ មុខរបរ ឬអាជីវកម្ម ដែលមិនត្រូវបានហាមឃាត់ ដូចក្នុងប្រការ២ នៃសេចក្តីសម្រេចនេះ។
វិធានការរដ្ឋបាលជាថ្មី ដែលអ្នកភ្នំពេញ បានស្គាល់រួចមកហើយ ចាប់តាំងពីដើមខែមេសា ឆ្នាំ២០២១ ហើយបន្តរហូតដល់ពាក់កណ្តាលខែឧសភា ឆ្នាំ២០២១ ក៏ដោយសារតែចំនួនអ្នកឆ្លងកូវីដ ហាក់ដូចជា កម្រើកឡើងវិញ ស្របពេលដែលប្រជាពលរដ្ឋយើងមួយចំនួន ហាក់ដូចជា ភ្លេចខ្លួននឹងវិធានការការពារកូវីដ។ នោះគឺបើទោះបីជាមួយថ្ងៃៗ កម្ពុជានៅតែបន្តឆ្លងដោយស្ងាត់ៗនូវកូវីដ១៩ ពិសេសនៅភ្នំពេញ រាប់រយនាក់ និងស្លាប់មិនក្រោម ១០នាក់ឡើយ ក្នុងរយៈពេលប៉ុន្មានថ្ងៃចុងក្រោយនេះក៏ដោយ តែមួយចំនួន ហាក់ដូចជាលែងខ្លាច និងមើលស្រាលកូវីដ ថែមទៀតផង។
របាយការណ៍របស់ក្រសួងសុខាភិបាល ចេញផ្សាយនៅថ្ងៃទី២០ ខែមិថុនា បង្ហាញថា ករណីឆ្លងជំងឺកូវីដ១៩ ថ្មី មានចំនួន ៦៥៩នាក់ ជាសះស្បើយ ៦២១នាក់ និងស្លាប់ ១៧នាក់ កាលពីថ្ងៃទី១៩ ខែមិថុនា ឆ្នាំ២០២១។ បើគិតជាករណីឆ្លងសរុប នៅទូទាំងប្រទេស មានចំនួន ៤២៧១១នាក់ ជាសះស្បើយសរុប ៣៧៤៨៩នាក់ និងស្លាប់សរុប ៤៣១នាក់។
ជាងនេះទៅទៀត កាលពីថ្ងៃទី១៩ ខែមិថុនា ក្រសួងសុខាភិបាល ក៏បានប្រកាសពីការរកឃើញករណីឆ្លងវីរុសកូវីដ១៩ ដែលបម្លែងថ្មី ប្រភេទ B.1.617-2 ( Delta ) ចំនួន ៧នាក់ ដែលជាប្រជាពលរដ្ឋខ្មែរយើង ជាអ្នកដំណើរវិលត្រឡប់មកពីប្រទេសថៃ នៅខេត្តបន្ទាយមានជ័យ ឧត្តរមានជ័យ ខេត្តសៀមរាប កំពង់ចាម និងខេត្តកំពត។
ចូរកុំភ្លេចថា កាលពីខែមេសា ក្នុងពេលកូវីដឆ្លងរាលដាលខ្លាំង ពិសេសនៅភ្នំពេញ គឺដំបូងអាជ្ញាធរបានចាត់វិធានការរដ្ឋបាលដូចគ្នានេះ ត្រឹមតែផ្អាកជាបណ្តោះអាសន្ន ចំពោះសកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់នៃការឆ្លងរាលដាលជំងឺកូវីដ១៩ និងការជួបជុំ ឬការប្រមូលផ្តុំមនុស្សជាលក្ខណៈឯកជន ជាដើម។ ប៉ុន្តែនៅពេលការឆ្លងរាលដាលកូវីដ ពីម្នាក់ ទៅច្រើននាក់ កាន់តែច្រើនទៅៗរៀងរាល់ថ្ងៃ នោះច្បាស់ណាស់ថា វិធានការបិទខ្ទប់ ការដាក់បារ៉ាស ចងខ្សែនៅមុខផ្ទះ បារ៉ាសនៅលើផ្លូវបិទខ្ទប់ រួមទាំងខ្សែចងបិទផ្លូវ ការហាមឃាត់ធ្វើចរាចរណ៍ មិនថា យប់ ឬថ្ងៃ មុខរបរគ្រប់ប្រភេទត្រូវបិទទ្វារ រួមទាំងការបែងចែកតំបន់លឿង លឿងទុំ និងតំបន់ក្រហម ច្បាស់ណាស់ថា អ្នកភ្នំពេញ នឹងជួបប្រទះឡើងវិញ ជាមិនខាន។
ដូច្នេះក្នុងអំឡុងពេលនេះ ម្នាក់ៗ ចាំបាច់ត្រូវតែបន្ត និងបង្កើនការយកចិត្តទុកដាក់ការពារខ្លួន ព្រមទាំងប្រុងប្រយ័ត្នខ្ពស់ជាងមុន ដើម្បីចូលរួមកាត់ផ្តាច់កុំឲ្យឆ្លងបន្តពីម្នាក់ ទៅម្នាក់ ទោះជាក្នុងគ្រួសារ ក្នុងសហគមន៍ ឬនៅកន្លែងធ្វើការក៏ដោយ។
វិធានការទប់ស្កាត់ និងកាត់ផ្តាច់ការឆ្លងកូវីដ សាមញ្ញទេ គឺ៣ការពារ និង៣កុំ ដែលសម្តេចតេជោ ប្រមុខរាជរដ្ឋាភិបាល បានដាក់ចេញឲ្យអនុវត្ត តាំងពីពាក់កណ្តាលខែធ្នូ ឆ្នាំ២០២១ រួមទាំងការចូលរួមក្នុងយុទ្ធនាការចាក់វ៉ាក់សាំងកូវីដ១៩ ចាប់តាំងពីថ្ងៃទី១០ ខែកុម្ភៈ ឆ្នាំ២០២១។
យ៉ាងណាក៏ដោយ មកដល់ពេលនេះ អ្នកជំនាញមើលឃើញថា ការអនុវត្តវិធានការទប់ស្កាត់ការឆ្លងកូវីដ នៅមានចំណុចខ្វះចន្លោះ លើវិធានការ ៣កុំ គឺកុំជួបជុំគ្នា កុំចាប់ដៃ ប៉ះពាល់គ្នា និងកុំចូលទៅកន្លែងបិទជិត ហើយប្រើប្រាស់ម៉ាស៊ីនត្រជាក់ច្រើន។ ដូច្នេះ បុគ្គលគ្រប់រូប ត្រូវយកចិត្តទុកដាក់ឡើងវិញ និងបន្ថែមទៀត លើការកែប្រែឥរិយាបថរបស់បុគ្គល និងម្ចាស់ទីតាំងប្រមូលផ្តុំទាំងឡាយ ដោយត្រូវចូលរួមអនុវត្តវិធានការ ៣កុំ ជាចាំបាច់៕
ចែករំលែកព័តមាននេះ