ADផ្ទាំងផ្សព្វផ្សាយពាណិជ្ជកម្ម

Picture

កម្ពុជា​ស្នើ​ឲ្យ​ក្រុមហ៊ុន​គ្រឿង​សង្ហា​រឹម ​IKEA និង​ក្រុមហ៊ុន​ផលិត​រថយន្ត Volvo មក​រកស៊ី​ក្នុង​ប្រទេស

2 ខែ មុន
  • ភ្នំពេញ

រាជធានី​ភ្នំពេញ ៖ រដ្ឋមន្ត្រីក្រសួង​ពាណិជ្ជកម្ម​កម្ពុជា​បាន​ស្នើ និង​ជំរុញ​ដល់​តំណាង​ប្រទេស​ស៊ុ​យ​អែ​ត​ជួយ​សម្របសម្រួល​ធុរជន និង​វិនិយោគិន​របស់​ខ្លួន​សំខាន់​ៗ​ដូច​ជា ក្រុមហ៊ុន​គ្រឿង​សង្ហា​រឹម IKEA និង​ក្រុមហ៊ុន​ផលិត​រថយន្ត Volvo មក​ស្វែងរក​ឱកាស​វិនិយោគ​នៅ​កម្ពុជា…

រាជធានី​ភ្នំពេញ ៖ រដ្ឋមន្ត្រីក្រសួង​ពាណិជ្ជកម្ម​កម្ពុជា​បាន​ស្នើ និង​ជំរុញ​ដល់​តំណាង​ប្រទេស​ស៊ុ​យ​អែ​ត​ជួយ​សម្របសម្រួល​ធុរជន និង​វិនិយោគិន​របស់​ខ្លួន​សំខាន់​ៗ​ដូច​ជា ក្រុមហ៊ុន​គ្រឿង​សង្ហា​រឹម IKEA និង​ក្រុមហ៊ុន​ផលិត​រថយន្ត Volvo មក​ស្វែងរក​ឱកាស​វិនិយោគ​នៅ​កម្ពុជា ដោយសារ​ការ​កែ​ច្នៃ​គ្រឿង​សង្ហា​រឹម និង​ការ​ផលិត​គ្រឿង​បង្គំ និង​បន្លាស់​យានយន្ត​កំពុង​មាន​កំណើន​ខ្លាំង​នៅ​កម្ពុជា ។

Picture

លោក​រដ្ឋមន្ត្រី​ថែម​ទាំង​បញ្ជាក់​ថា កម្ពុជា​មានឱកាស​លើ​ការ​វិនិយោគ​លើ​វិស័យ​ដទៃ​រួម​មាន ការ​កែ​ច្នៃ​ចំណីអាហារ និង​ផ្លែ​ឈើ​តំបន់​ត្រូពិច​ផង​ដែរ ។

សំណើ​របស់​លោក ប៉ាន សូរ​ស័ក្ដិ រដ្ឋមន្ដ្រីក្រសួង​ពាណិជ្ជកម្ម​បាន​ធ្វើ​ឡើង​នៅ​ក្នុង​ឱកាសលោក​ទទួល​ជួប លោក BJÖRN HÄGGMARK ឯកអគ្គរាជទូត​ប្រទេស​ស៊ុ​យ​អែ​ត​ប្រចាំ​កម្ពុជា ដើម្បី​ពិភាក្សា​ការងារ និង​ជម្រាបលា ខណៈ​ដែល​លោក​បាន​បញ្ចប់​អាណត្តិ​បេសកកម្ម​ការទូត​នៅ​កម្ពុជា ។

Picture

គួរ​បញ្ជាក់​ថា ប្រទេស​ស៊ុ​យ​អែ​ត បាន​ប្រកាស​ដក​ស្ថានទូត​ចេញពី​ភ្នំពេញ នៅ​ចុងឆ្នាំ​២០២១​នេះ ។ ទំនាក់ទំនង​ការទូត​កម្ពុជា និង​ស៊ុ​យ​អែ​ត​បន្ត​ធ្វើ​តាម​រយៈ​ឯកអគ្គរាជទូត​ប្រទេស​ស៊ុ​យ​អែ​ត នៅ​ទីក្រុង​បាងកក ប្រទេស​ថៃ ។

ទោះ​យ៉ាងនេះ​ក្តី​នៅ​ក្នុង​ជំនួប​ជាមួយ​លោក លោក ប៉ាន សូរ​ស័ក្ដិ លោក BJÖRN HÄGGMARK បាន​ឆ្លើយ​តប​ដោយ​ការ​ជឿជាក់ ស្ថានទូត​ស៊ុ​យ​អែ​ត ប្រចាំ​កម្ពុជា​ដែល​មាន​និវេសនដ្ឋាន​នៅ​ទីក្រុង​បាងកក នឹង​បន្ត​កិច្ច​សហប្រតិបត្តិការ​ល្អជា​មួយ​ក្រសួងពាណិជ្ជកម្ម ក្នុង​គោលបំណង​លើកកម្ពស់​កិច្ច​សន្ទនា និង​ទំនាក់ទំនង​ពាណិជ្ជកម្ម​កម្ពុជា​-​ស៊ុ​យ​អែ​ត ។

Picture

ទំហំ​ពាណិជ្ជកម្ម​កម្ពុជា​-​ស៊ុ​យ​អែ​ត នៅ​ឆ្នាំ​២០២០ មាន​ចំនួន ៦៤ លាន​ដុល្លារ​អា​មេ​រិ​ក ខណៈ​ដែល​រយៈពេល​៥​ខែ នៅ​ឆ្នាំ​២០២១ មាន​ចំនួន ២៣​លាន​ដុល្លារ​អា​មេ​រិ​ក ។ លោក​ឯកអគ្គរាជទូត បាន​កត់សម្គាល់​ផង​ដែរ​ពី​កំណើនសេដ្ឋកិច្ច​កម្ពុ​ជានា​ពេល​កន្លង​មក និង​ការ​ធ្វើ​សមាហរណកម្ម​សេដ្ឋកិច្ច ដោយ​ប្រកាន់ខ្ជាប់​នូវ​ប្រព័ន្ធ​ពហុភាគី​និយម ព្រមទាំង​វឌ្ឍនភាព​នៃ​ការ​បង្កើត​បទបញ្ញត្តិ ដែល​បម្រើ​ដល់​វិស័យ​ឯកជន និង​វិនិយោគិន​បរទេស​នៅ​កម្ពុជា ។

លោក​បាន​លើក​ឡើង​ពី​សារៈសំខាន់​នៃ​ការ​ចូលរួម​អភិវឌ្ឍន៍​សេដ្ឋកិច្ច​ប្រកបដោយ​បរិ​យា​ប័ន្ន តម្លាភាព និង​ការ​គិតគូ​អំពី​បញ្ហា​បរិស្ថាន តាម​រយៈ​ការ​ប្រើប្រាស់​ថាមពល​ដែល​អាច​កកើត​ឡើង​វិញ​។

ឆ្លៀតពេល​នេះ លោក​រដ្ឋមន្ត្រី បាន​សំណូមពរ​លោក​ឯកអគ្គរាជទូត ឱ្យ​ជម្រាប​ជូន​ថា្ន​ក់​ដឹកនាំ​រាជរដ្ឋាភិបាល​ស៊ុ​យ​អែ​ត និង​សហភាព​អឺរ៉ុប អំពី​កិច្ច​ខំប្រឹង​ប្រែង​របស់​កម្ពុជា ក្នុង​ខឿន​អភិវឌ្ឍន៍​ប្រកបដោយ​និរន្តរភាព និង​សមធម៌ ទាំង​ក្នុង​វិស័យសេដ្ឋកិច្ច សង្គមកិច្ច និង​បរិស្ថាន​ផង​ដែរ ៕